Kaala 24 - mzwDBL

Korowii ne o nɛra fɔo baa fɔwa wa

¹ Korowii berɔ ŋɔ Mosis be ŋɔ, “He ne Arɔn ne Nadab ne Abihu dɛ Israel nomonome fifraanuanɛ la teeh bwe ba n be. Hé che bojaŋ tama dɛɛ tom mɛ.

² Hen Mosis ɡbosoroo chɛ kɛŋɔ he ba n jwɛh, ba te laa. Bɛ ɡel Israel tena kar la bɛlbwa teeh ŋɔ wɛɛ ba n bee.”

³ Mosis aa la nɛra la be dɛ ka bol Korowii waa ne o Mmarare bwa ba be la, ba bwa kpɔ taa beŋkpoŋ sɛh ŋɔ, “Wobɛlbwa Korowii aa bol la, yaa ɛɔ.”

⁴ Mosis chwerɛ komɛlbwa Korowii aa bola. Tɔ aa dɛ per chɔmbibii la, o iro dɛ kwaa saraha kon tɛ Korowii bwe la lɔɡa, dɛ paaɡe bwea fi dɛ anɛ a che tɛ Israel deene fi dɛ anɛ la.

⁵ Asɛ o tomɛ Israel bonɔɔna ba ka fuh kwaa ɛ saraha, dɛ kpoo nabali ɛ deŋnesɔɔhna saraha tɛo.

⁶ Mosis kpɔ kwaa la chale la pera do loɡa bini, asɛ dɛ kpɔ a kar la merɛ saraha kon la ta.

⁷ Ate, dɛ kpɔ Korowii Ne Nɛwɛnyina Fɔo Tɔn la kure baɡle nɛra la. Ba bwa sɛh ŋɔ, “Yáa ɛ wobɛlbwa Korowii aa ŋɔa laanee, yaa dɛɛ teŋɛ a taa.”

⁸ Belaa o berɛ kpɔ chal la merɛ nɛra la nɛ dɛ ŋɔ, “Chal nɔɔ ɡela fɔo he ne Korowii aa fɔwa dɛ ŋɔ hɛɛ dɛɛ teŋɛ o Mmarare ta la won che tɛ heya.”

⁹ Ate, Mosis ne Arɔn ne Nadab dɛ Abihu ne Israel nomonome fifraanuanɛ la bwa teeh kaa bwe la doa,

¹⁰ dɛ ka na Korowii Israel tena aa dɛ tomɛ la. Harɛ waa cheɡɛ o ta la ɛ bobɛl baa mao bwea ne o ir nyundua, dɛ do ɡereŋ kɛŋɔ bwedɛɛɡe baa dɛ yerɔ safaaya la, dɛ ɛ burum kɛŋɔ nyundua ken.

¹¹ Kɛ Korowii ta Israel nomonome la wobɛlbwa ɛɛ. Ba na Korowii dɛ ta so le dɛ di kwaa dɛ nyɔ sen.

¹² Asɛ Korowii ŋɔ Mosis be ŋɔ, “Teeh ba bwe nɔ doa, dɛ́ ba soŋni n be bonɔ. Mɛɛ tɛɛ bwepɛle maa chwerɛ me Mmarare haa dɛɛ teŋɛ a ta, ásɛ nɛra la ka hweli dɛ́ jemɛ waa maa do ba a ta.”

¹³ Ate, Mosis ne Josua waa dɛ chao la kpɔ ba te le kaa Korowii be bwe la doa.

¹⁴ Mosis aa dɛ ba lee kaa la o ŋɔ nomonome la be ŋɔ, “Hɛ́ɛ kpa yaa bonɔ ka tel kɛŋɔ yaa berɛ ba he be. Arɔn ne Hur aa lɔ he be nɔ, hé bini bɛlbwa ne o dɔŋ dɔ waane aa, hé kpɔ la ba be.”

¹⁵ Mosis aa dɛ teeh Sinai Bwejen la, bam baa bɔle o bwa,

¹⁶ asɛ Korowii jirima tɔ o bwa. Tɔpera anumɛl dɛ bam la ta bɔle bwe la bwa ɡɛ, asɛ tɔpenuanɛ wee ta la, Korowii bol waa le bam la ta dɛ yerɛ Mosis.

¹⁷ Israel tena te be la, Korowii jirima aa lɔ bwejen la doa la do kɛŋɔ nii aa won kwaa chɔɡa kohona la ken.

¹⁸ Mosis jo bam la bini dɛ teeh kaa bwejen la doa. O soɡe bela tɔpera fifraanaarɛ chɔɔ ne jwaana.