Kaala 23 - mzwDBL

Kasinteŋ ne waa aa wera

¹ Korowii berɔ ŋɔ Mosis be ŋɔ, “He bɛ waa haa wola a bini jemɛ kɛrɛdɛ kpɔ dɛɛ ɡaaɡe. He bɛ dansewea di cha nɛnchɔɡe.

² He bɛ nɛndamanta nɛɛ teŋɛ dɛ́ ɡee ɛ wechɔɡa. He dɛ di waane danseɛ kɔɔto aa, he bɛ nɛndamanta nɛɛ teŋɛ dɛ́ berɛ waa la sie.

³ He bɛ nomɛl nyae waa koh dɛ́ sune o nɛɛ kɔɔto.

⁴ He na he dɔm nao kɛɛ keeɡo o yeŋe jo dɛɛ kaa laa, hé takapɔ dɛ́ lawɔ ba tɛo.

⁵ He na he dɔŋ waa haeh keeɡo o chole bone ɛɡɛ o nɛ aa, he bɛ on ɡarɛ ta kaa. He takapɔ kɛŋɔ hɛɛ chao.

⁶ He bɛ nɛn nyae waa koh dɛ́ pao bolchɔɡe kɔɔto.

⁷ He bɛ nyosone teŋe dawɛ nɛn nɛ. He bɛ nɛn waa wola waane bini jemɛ, kɛɛ nɛn o wa aa dɔ kasinteŋ bolchɔɡe pa dɛ́ kpoo. Maa nomɛlbwa waa di bolchɔɡe la bwaraa kpɔ kɛo.

⁸ He bɛ nɛn sen dɛɛ yawɛ, nɛn sen yawa dɛ tɔ nɛra baa dɛ bol waa la sie, dɛɛ ɡole nɛn o wa aa toɡra waa sie.

⁹ He bɛ nɛŋhɔɔhra hɔhɔrɔwa dɛɛ ɛ. He ɡbabir jemɛ ɡɛ hɔɔh wa aa doa, dɛkalkɛ dɛ ɡɛɛ he faa ɛ nɛŋhɔɔhra Ijipt harɛ ta.

Ona Tɔpere Mmarare

¹⁰ Bene anumɛlee chɛ kɛ hé parɛ dɛ́ kpɔ he kooni kondikwa,

¹¹ kɛ bennuanɛ ta te, hé ɡel harɛ la chɔ, he bɛ on parɛ. Anee dɛ́ ɡel nyaara baa lɔ he bini la ɡe dɔ anɔ la aa lee bela la di, ásɛ kpɔɡ bini ola ɡe dɔ a kar dɛ́ di. Hé ɛ ɡɛ tenten he daa kooni nɔna ne ɔleve daa nɔna bwa ta.

¹² Tɔpera anumɛlee hé dɔ kɛ he ɛ toma, kɛ tɔpenuanɛ wee ta te, he bɛ toma bɛlbwa ɛ, ásɛ he nabala ne keeɡore ne nɛndɔɔla baa lol ba he deremi dɛ nɛŋhɔɔhra ɡe won dɔ bɔr onɛ.

¹³ Hé do sie dɛ́ ɛ wobɛlbwa maa bol he be nɔ. He bɛ voɡare dɛɛ tomɛ. He bɛ ɡel ba no a sɔna kwaraa he nyoo.

Benanyoa Tɔpejena atoro ane wa

¹⁴ Hé di tɔpejena atoro benanyoa bɛlbwa n sɔn ta.

¹⁵ Hé di Paanoo Iisi Aa Wola Toole A Ta Tɔpejen la. Tɔpera anuanɛɛ chɛ kɛŋɔ hé di paanoo iisi aa wola toole a ta ɡɛ maa do heyaa la. Hé di tɔpejen nɔ tɔpera maa lea cheɡ tɛ heyaa ta Abib korobie la ta, dɛkalkɛ ɡɛ korobie la taa he le Ijipt harɛ ta. Bɛlbwa bɛ nɔŋɡbala kpɔ ba n sie.

¹⁶ Hé di Koo Kondikwaa Koma Tɔpejen la he koo kondikonloɡla ne. Hé di Koo Kondikwaa Nyoa Boara Tɔpejen la, benanyoa la aa ba kaa o jaɡa he yon boa he kooni kondikwaa bwa nyoa ba cheɡ dem la ta.

¹⁷ Kera atoroo chɛ kɛ baa bɛlbwa ba men Nemenɛ Korowii sie benanyoa bɛlbwa ɡɛ tɔpejena nɔ ta, dɛ́ ba tom mɛ.

¹⁸ He bɛ komɛlbwa baa kpo ɛ saraha chal kpɔ ja komɛlbwa iisi aa lɔ o ta tɛ mɛ. Ola baa kpoora n tɔpejena ta noorare ta chɛ kɛŋɔ hé cheɡa tɔɔ per a ta.

¹⁹ Hé kpɔ he koo kondikonloɡla ba men Korowii haa dɛ tom mɛ la Dea. He bɛ bombie daa o nya elnee ne.

Nyobaɡa ne webaɡla ane wa

²⁰ Hɛ́ɛ no, n dɛ tomɛ n nyundua torome ó tɔ he sie dɛɛ nyiŋi he nɛ, dɛ́ ba he ne bela maa kwaara tɛ heya.

²¹ Hé cheɡ deŋne dɛɛ no wobɛlbwa waa bol he be. He bɛ lwɛmkpeɡ ɛ, he ɛ lwɛmkpeɡ aa, waa he bwaraa kpɔ kɛ heya, dɛkalkɛŋɔ onee chiɡ n naa ta.

²² Dɛ he cheɡ deŋne o be kɛrɛdɛ dɛɛ ɛ anɔ la maa bola bwa naa, mɛɛ hah he dɔmaa, n ne baa jo ŋwɛnɛ bɛlbwa ta.

²³ N nyundua torome ɛɛ tɔ he siee, dɛ́ ba he ne Amɔre ne Hiti, ne Pɛrɛs ne Keenan ne Hivi, dɛ Jebus tena harɛ ta. Mɛɛ kpo ba bwaa harɛ la ta.

²⁴ He bɛ ba voɡare dɛɛ tomɛ a ba ɛ kɛŋɔ hɛɛ dɛɛ teŋɛ ba we-ɛɛla taa. Hé paɡre a ne ba bwea baa paaɡa dɛɛ duura la bwa burbur ken.

²⁵ Dɛ hɛɛ teŋɔ dɛɛ tomɛ men Korowii haa dɛ tom mɛ nɔɔ yaa, mɛɛ swee heyaa andɛɛɡaa he kondikwa ne he neerare dɛ weela bwa ta.

²⁶ Ásɛ nomɛlbwa aa har ta kɛɛ dɛ ɛ hambara he harɛ la ta. Mɛɛ tɛ heyaa mkpajaŋ tentenee.

²⁷ Mɛɛ ɡeloo ɔmee kohona chole he dɔma nɛ, ásɛ harɛ bɛlbwa ta tena haa ka chem ba bwa wili. Mɛɛ ɡeloo he dɔma bwa berɛ habɔɔ, dɛ́ chwa kaa.

²⁸ Mɛɛ ɡeloo jeŋibotoola tɔ he sie, dɛ́ doŋi Hivi ne Keenan dɛ Hiti tena le he ŋwɛnɛre ta.

²⁹ Benanyoa beŋkpoŋ ɡbo ta laa mɛɛ ba ba doŋa, dɛkalkɛ a ba ɡɛ naa, harɛ la dɛ ba pɛɛ chɔe, ásɛ kpɔɡ bini olchɔɡa warɛ he nɛ.

³⁰ Tama tamaa mɛɛ ba ba doŋa le he sie ka tel kɛŋɔ haa ba warɛ kohona, dɛ́ won kpɔ harɛ la.

³¹ Mɛɛ ɡeloo he jwɛh le Mposwɛm la ta ka le Mɛdetereenea Mpo ta, dɛ́ kpɔ ka le pua hɛŋle ɡbo harɛ ta, dɛ́ kaa Yufretis Moo la ta. Mɛɛ kpɔ nɛra baa soɡe harɛ la ta bela laanee do he nɔn ta, ásɛ he doŋ ba le he sie.

³² Hé ne ban, kɛɛ ba voɡa bɛ fɔo bɛlbwa fɔwɛ.

³³ He bɛ ɡel ba so he harɛ la ta, ásɛ a che ba nɛɛ he ba ɛɛ mɛ wechɔɡa, dɛkalkɛ ba voɡare toma la ɛɛ lawɛ heyaa kɛŋɔ baa harɛ heyaa bela ken.”