Kaala 22 - mzwDBL

Kwaa kema bɔe Mmarare

¹ Korowii berɔ ŋɔ Mosis be ŋɔ, “Dɛ nomɛlbwa ŋwɛ nao kɛɛ pee dɛ kpo kɛɛ dɛ yoɡu waa, a chɛ kɛŋɔ ó bɔ nae anue, kɛɛ dɛ bɔ peera anaarɛ chiɡ pee la naa ta.

² Ba lawɛ ŋwɛɛ wɛɛ ku bobɛl dɛ́ ka ŋwɛ asɛ ba lɔɔ o sewaa, naate waa lɔɔ la ta bolchɔɡe dii.

³ Kɛ dɛ bɔr chaahnɔ mɔɔ a chiɡ aa, dɛ naate la kpo nɛn dɛ di bolchɔɡe. Ŋwɛɛ bɛlbwa chɛ kɛŋɔ ó bɔ kon waa ŋwɛa la kem. Kɛ dɛ o ta komɛlbwa dɔe yaa, bá yoɡ o ɡbabir dɛ́ kpɔ bɔ kem la.

⁴ Dɛ kon waa ŋwɛa la ɛ kondɛɛre o ta sewɛ mɔɔ naa, nabal kɛɛ keeɡo kɛɛ dɛ pee kwaraa yoo, a chɛ kɛ ó bɔ bele anɛ.

⁵ Nomɛlbwa waa kpɔ kondɛɛra la dibɔr, dɛ ɡela a ka jo bɛl koo ta kɛɛ daa koo ta, dɛ ka di o bini kwaa la chɛ kɛŋɔ ó kpɔ o ɡbabir koo kondikwa kɛɛ daa nɔna aa ɛa kɛrɛdɛ la bɔ o dɔŋ la kem.

⁶ Dɛ nɛn do nii o koo ta asɛ a fuh ka jo nomɛl koo ta, dɛ fuh mea baa koma bil kɛɛ anɔ la a taa cheɡa kɛɛ dɛ koo la bwa sekwaraa naa, nɛn waa do nii la chɛ kɛŋɔ ó bɔ a bwa kem.

⁷ Dɛ nomɛl kpɔ suuɡapoŋa kɛɛ laala ane tɛ o dɔŋ ŋɔ o cheɡ, asɛ a ba kɛŋɔ ba ŋwɛa asɛ ba lawɛ ŋwɛɛ la aa, ó bɔ a bele anɛ.

⁸ Kɛ dɛ ba ta ŋwɛɛ la lawaa, dem te la chɛ kɛŋɔ bá la o ne nɛra baa bol waa dɛɛ pa bole sie, dɛ́ ka nyiŋi a ta kɛŋɔ o ɡbaɡba bee a ka kɛɛ.

⁹ Dɛ nomɛl nao kɛɛ keeɡo kɛɛ pee kɛɛ yal kɛɛ komɛlbwa nyoɡrɔ o ka nao o dɔŋ bɛl be dɛ ŋɔ o konee yaa, a chɛ kɛŋɔ nɛra banɛ la bwa kpɔ la nɛra baa bol waa dɛɛ pa bole la sie. Ba bini bɛlbwa baa na kɛŋɔ o di bolchɔɡe la chɛ kɛŋɔ ó bɔ ɡɛ kwaa aa nyoɡra la bele anɛ tɛ o dɔŋ la.

¹⁰ Nomɛl kpɔ keeɡo kɛɛ nao kɛɛ pee dɛ kondɛɛre bɛlbwa tɛ o dɔŋ o nyiŋi o ta dɛɛ tɛo, asɛ a ba kɛŋɔ o sewɔ kɛɛ dɛ bolee ba doo, kɛɛ lawaa nomɛl ba lawɔ bɛlbwa sie aa wola toole bela aa,

¹¹ ba nɛra banɛ la bwa la Korowii sie, ásɛ naate waa dɛ nyiŋi kon la ta la ŋwɛɛ kɛŋɔ kon la toole o be. Kon te la chɛ kɛ ó no a mun ɡɛ, ate komɛlbwa toole naate bɔ tɛo kpa.

¹² Kɛ dɛ a berɔ ba kɛŋɔ onee ŋwɛ o dɔŋ la kondɛɛre la aa, a chɛ kɛ ó nyin bɛl chiɡ o naa ta tɛo.

¹³ Dɛ kpɔɡ bini ol ɡee chweo waa, ó kpɔ bela waa kaa la ka baɡle á ɛ danseɛ. O bɛ bɛl nyin cheɡ o naa ta kpa.

¹⁴ Dɛ nɛn kemɛ o dɔŋ kondɛɛre, asɛ a ka ba kɛŋɔ ba doo bol kɛɛ o sewɛ dɛ kon te la toole bela aa, a chɛ kɛ ó nyin bɛl chiɡ o naa ta tɛ kon te la.

¹⁵ Kɛ dɛ kon te la siwi ta waa yaa, nɛn waa kemɛ kondɛɛre la ta komɛl bɔe dɔe dɛ́ tɛo kpa. Dɛ hanaa kon te la kpɔ hane aa, suuɡa waa lɛ la dɛ chiɡ kondɛɛre la kem bɔe naa ta.

Mmarare aa chɔ le tɛ Israel tena

¹⁶ Nomɛlbwa waa neɡre bitolo waa wola baa jemɛ, o nɛra ɡe ta sɛɛh kɛŋɔ o ne baa bɛlbwa so mɔɔ o lawɔ chɔ la, a chɛ kɛŋɔ ó ɛ o bwara wa, ásɛ o den ɛ o haah.

¹⁷ A balɔ kɛŋɔ haah la mɛɛ ta sɛɛh kɛ o kpɔɔ tɛo waa, a chɛ kɛ baa la bɔ suuɡa aa chɛa dɛ chɔ le tɛ bitolo waa wola baa jemɛ nyin suuɡa.

¹⁸ Haah bɛlbwa waa dɛɛ ɛ sɔm we-ɛɛla la chɛ kɛ bá kpoo.

¹⁹ Nomɛlbwa waa lawɛ kondɛɛre chɔ kɛ baa ne haah la chɛ kɛ bá kpoo.

²⁰ Nomɛlbwa waa kpo kwaa ɛ saraha tɛ voɡ bɛlbwa, dɛ ɡel men Korowii la chɛ kɛ bá kpoo.

²¹ Hɛ́ɛ berɛ nɛŋhɔɔh hɔhɔrɔwa doe kɛɛ dɛɛ fiiɡu, dɛkalkɛ he ɡe fa ɛ hɔɔhra Ijipt harɛ ta ka.

²² Hɛ́ɛ berɛ luhaahna kɛɛ bilalbii fiiɡa.

²³ He fiɡ ba asɛ ba wi no men Korowii aa, mɛɛ cha baa.

²⁴ Ásɛ n baah di he nɛɛ kohona he serewe laa ta. He haahna ɛɛ ɛ luhaahnaa, ásɛ he bii ɡe berɛ bilalbii.

²⁵ A hiah n nɛra baa ɛ he bini bane nɔ bɛlbwa he kemɔ suuɡa aa, he bɛ a nee kpɔ dawɛ kɛŋɔ nɛra baa dɛ kemɛ suuɡa yon dɛɛ ɛ la.

²⁶ He lɛ he dɔŋ yal cheɡ awɔba aa, berɛ o kon tɛo mɔɔ wee le harɛ,

²⁷ o ɡboo ken ɛ yal waa dɔa dɛ́ kpɔ tɔ. A ba ɡɛ naa, bɔkwaa wɛɛ ba dɔe dɛ́ kpɔ tɔ chɔɔ? O wio no men Korowii aa, mɛɛ no o bee, dɛ́ chao dɛkalkɛ n dɔ tedoma dɛ tɛ nɛra.

²⁸ He bɛ nɛnhɛlwobol bol yaɡɛ men Korowii kɛɛ dɛ́ taah he harɛ nomoa.

²⁹ Hé kpɔ he mea ne sen kɛɛ ɔleve noo ba ɛ saraha tɛ mɛ saŋ aa chɛa ta. Hé lawɛ he bibanloɡla ba tɛ mɛ.

³⁰ Gɛ tentenee chɛ kɛŋɔ hé ɛ he nae ne peera bwa ta. Hé ɡel a do a nyare be yawanyoa, ásɛ tɔpenuatoro ta la, hé kpɔa ba ɛ saraha tɛ mɛ.

³¹ A chɛ kɛ hé ɛ n nɛra haa do ɡoroŋ. Anomanta, he bɛ ol kpɔɡ bini olchɔɡaa aa kpoo la dɛɛ chwe. Nyootenaa chɛ kɛŋɔ hé kpɔa tɛ.”