Kaala 21 - mzwDBL

¹ Korowii ŋɔ Mosis be ŋɔ, “Mmarare nɔɔ chɛ kɛ he kpɔ tɛ Israel tena.

Hibru tena baa yaɡ ba yoma

² He bɛlbwa yawɛ Hibru te aa, bene anumɛlee chɛ kɛ ó tomɛ. Bennuanɛ te la chɛ kɛ ó dɔ o te. O ta komɛlbwa bɔe dɔe.

³ Dɛ o ɡboo he yawɛ aa, o ɡboo chɛ kɛ he ta ŋwɛnɛ ó kaa. Kɛ dɛ o ne o haahnee yaa, o ne o haah bwaa dɛ́ kaa.

⁴ Dɛ nɛn waa yawɔ la ɡe tɛo haah o ne o dɔ bihaahna kɛɛ bibaala aa, haah la ne bii la bwa ɛ nomoa la kwa. Baa la ɡboo dɛ́ dɔ o te kaa.

⁵ Kɛ dɛ yom la ŋɔ, o dɛ nyin o nomoa ne o haah dɛ bii ŋɔ waa kaa laa,

⁶ nomoa la chɛ kɛŋɔ ó la o ne nɛra baa bol waa dɛɛ pa bole sie, dɛ́ lawɛ o deŋne marɛ doonyoa daa keŋkeŋ, dɛ́ forɔ ó ɛ o nɛndɔɔle dɛɛ la, hale o serewe bena.

⁷ Dɛ baa yoɡ o bihaah tɛ nomɛl kɛŋɔ yom aa, baa o te ŋwɛnɛ ta ó dɔ o te kɛŋɔ, ba yon ta baala ŋwɛnɛ baa dɔ ba te la.

⁸ Dɛ a balɔ kɛŋɔ nɛn waa yawɔ kɛ o fe ɛ o haah la aa on nyin kpa aa, ó berɔ tɛ o nɛra dɛ́ lɛ o suuɡa. O bɛ on yoɡ tɛ nɛŋhɔɔhra dɛkalkɛ o neɡro.

⁹ Dɛ naate lawɔ tɛ o bibaa ɡe aa, a chɛ kɛ ó den kpɔɔ ɛ o bihaah.

¹⁰ A ɡɛ baa la berɔ kpɔ hanɛɛte ja o nɛ aa, a chɛ kɛ ó teŋɛ dɛɛ tɛ hanomoa la kondikwa ne yal, o ne wɛɛ chɔ saŋ bɛlbwa.

¹¹ Baa la ta wone ɛ a ɡɛ kombele atoro nɔ dɛɛ tɛ haah la aa, o dɔ ŋwɛnɛ kɛ ó kaa waa wola suuɡa bɛlbwaa bɔ tɛo.

Dɔŋa kpoora Mmarare

¹² Nomɛlbwa waa lɔ o dɔŋ o sewɛ la chɛ kɛŋɔ bá kpo o ɡe.

¹³ Kɛ dɛ o laa saahna, Korowii we-ɛɛlaa yaa, ó chwa kaa bela maa lea cheɡ heya, ásɛ o dɔ o nyu.

¹⁴ Kɛ dɛ nomɛlbwa dɔ o dɔŋ liire dɛ ka kpoo waa, hale o chwao ka marɛ n saraha kon la dɛ́ dɔ o nyu kwaraa naa, hé lawɔ le, ásɛ dɛ ka kpoo.

¹⁵ Nomɛlbwa waa lɔɔ o nya kɛɛ o mɛɛ la chɛ kɛŋɔ bá kpoo.

¹⁶ Nomɛlbwa waa ɡuɡri o dɔŋ dɛ lawɔ ka yoɡ, kɛɛ dɛ o ta lɔ o nɔn ta ba lawɔ waa, kpoe chɛ kɛ bá kpoo.

¹⁷ Nomɛlbwa waa taah o nya kɛɛ o mɛɛ la chɛ kɛ bá kpoo.

¹⁸ Dɛ a balɔ kɛŋɔ baala banɛ dɛ yo asɛ bɛl kpɔ bwe forɛ o dɔŋ, kɛɛ dɛ ume nɔn lɔɔ o ta sewɛ dɛ chɔ weela ta,

¹⁹ asɛ dɛ ba won ir kpɔ daŋɡbala valɛ le buse naa, ba bɛ naate la waa lɔɔ la deŋne tɛr. Kɛ ó cha weela te la o chɔe la bini ka tel kɛŋɔ waa dɔ bokpeɡa. A chɛ kɛ ó berɛ chao dɛɛ tɛo kwaa waa paŋa o weela ta chɔe bini la ɡe bwa.

²⁰ Nomɛlbwa waa dɔ yombaa kɛɛ yomhaah, dɛ kpɔ daa lɔɔ o sewɛ buɡ ta la chɛ kɛ bá tɛr o deŋne.

²¹ Kɛ dɛ o wono dɔ bokpeɡa tɔpebeŋkpoŋ kɛɛ tɔpera anɛ naa, ate a ta chɛ kɛ ó dɔ deŋnetɛra, dɛkalkɛ o ɡbaɡba suuɡa nee o yawɔ.

²² A balɔ kɛŋɔ baala banɛ dɛ yo, asɛ bɛl koni ka lɔ tekpoŋri o piɡri lolɛ dɛ waane ta a habɔɔ balaa, naate la chɛ kɛŋɔ haah la jaa yoɡu ɡɛ bwa waa dɛ nyin, ne ɡɛ nɛra baa bol waa dɛɛ pa bole la ɡe aa tɛ ŋwɛnɛ.

²³ Kɛ dɛ nɛn doe bol aa, he ɡe doo bol. Dɛ nɛn kpo o dɔŋ aa, bá kpo o ɡe.

²⁴ Dɛ nomɛl fome he siwii aa, hé ɡe fome o siwi. Dɛ o fome he nyen aa, hé ɡe fome o nyen. O nɔnee yaa, hé ɡe ɛ o kon ɡɛ, o napaa ɡee yaa, hé ɡe ɛ o kon ɡɛ.

²⁵ Niinii naate kpɔ bwɛ o dɔŋ aa, o ɡe bwɛo ɡɛ, bolee o doo waa, bá do o ɡe bol, dɛ o bwara malaa yaa, bá mali o ɡe bwara ɡɛ.

²⁶ Nomɛlbwa waa dɔ yomhaah kɛɛ yombaa dɛ lɔ o siwi ta o chɔɡ la, o siwi la nomanta, ó kaa pɛɛpɛɛ.

²⁷ Dɛ o yom nyenee o fome aa, a chɛ kɛŋɔ ó tɛo ŋwɛnɛ ó kaa.

²⁸ Dɛ nabal chuɡe baa kɛɛ haah o sewaa, a chɛ kɛ bá foɡre nao la bwea kpo. A ta chɛ kɛ bá chwe o ol, nao te la ɡe ta chɛ kɛ bá tɛr o deŋne.

²⁹ Kɛ dɛ ɡɛɛ nao la ɛɛ chuɡe nɛra asɛ ba ɡel kon te jemɛ, o vɛh o lawa dɛ do leɡ bini o kpo haah kɛɛ baa laa, a chɛ kɛ bá foɡre nao la kpo, dɛ́ kpo o dɔɔ la ɡe ja.

³⁰ Kɛ dɛ a chɛ kɛ nao te la bɔ komɛl dɛ́ charɛ o nyu aa, ɡɛ bwa baa dɛ nyin laanee bá maɡɛ tɛo ó bɔ.

³¹ Mmara beŋkpoŋ nɔɔ lole dɛ tɛ nao waa chuɡe bihaah kɛɛ bibaa bɛlbwa.

³² Dɛ nabal chuɡe yom waa ɛ haah kɛɛ baa laa, a chɛ kɛ nao te la bɔ suuɡapoŋa fifraatoro tɛ yom la dɔɔ, ásɛ ba foɡre nao la bwea kpo.

³³ Nomɛl pili bɔluŋ, kɛɛ dɛ kwii o kwiu dɛ vɛh o ta tɔe, asɛ nabal kɛɛ keeɡo ka le o bini dɛ sewaa,

³⁴ naate la chɛ kɛŋɔ ó bɔ kon la kem tɛ o dɔɔ ásɛ o ɛ o kon.

³⁵ Nomɛl nabal chuɡe o dɔŋ kon kpo aa, a chɛ kɛŋɔ bá yoɡ onɔ la o siwi taa lole la, ásɛ dɛ bɔne o suuɡa tɛ dɔŋa, dɛ́ berɛ bɔne onɔ la ɡe waa sewa la ol bini kɛrɛdɛ tɛ dɔŋa.

³⁶ Kɛ dɛ ba jemɛ ɡɛ nao la waa kɛŋɔ, ɡɛɛ wɛɛ chuɡri kwaa wubwa asɛ ba bol kon te be o vɛh o teɡa dɛ do leɡ bini naa, a chɛ kɛ kon te la nyin bɛl chiɡ onɔ la waa sewa la naa ta, dɛ́ kpɔ onsewe la.”