Kaala 20 - mzwDBL

Korowii Mmarare fi la wa

¹ Korowii bol waa aa teŋa nɔ bwa ɡe dɛ ŋɔ,

² “Menee Korowii haa dɛ tom mɛ n le he ne Ijipt harɛ ta somanjiri dii ta la.

³ He bɛ voɡ bɛlbwa tomɛ ka ja n nɛ.

⁴ He bɛ komɛlbwa waa lɔ nyundua kɛɛ harɛ ta hale nee bini bɛlbwa chaa ɛ.

⁵ He bɛ an ɡuŋi á ba ɛ kɛ hɛɛ tomaa, dɛkalkɛ menee Korowii haa dɛ tom mɛ la, n dɛ mee. N dɛ tɛr banɔ la baa hah mɛ deŋne, hale dɛ́ kpoŋe ka tel ba bii ne ba naanar bele batoro kɛɛ banaarɛ baa ka ba la nɛ.

⁶ Dɛɛ nyin banɔ la baa dɛ nyin mɛ dɛɛ teŋɛ me Mmara ta, hale dɛ́ kpoŋe ka tel ba naanar bele kaɡboŋ nɛ.

⁷ He bɛ men maa ɛ Korowii haa dɛ tom mɛ la dɛɛ ŋwɛɛ wesale bɛlbwa ta. Mɛɛ tɛr naate waa dɛ ŋwɛɛ mɛ ɡɛ la deŋnee.

⁸ Hé di Ona Tɔpere la, dɛ́ ɛo tɔpedɛɛɡe o do ɡoroŋ.

⁹ Tɔpera anumɛlee hé dɔ kɛŋɔ hé ɛ he toma bɛlbwa,

¹⁰ kɛ Ona Tɔpere la te ɛ men Korowii haa dɛ tom mɛ la tɔpere. O telaa, he bɛ toma bɛlbwa ɛ o ta. He ne he bibaala kɛɛ bihaahna kɛɛ bonɔɔna, kɛɛ toli bɛlbwa bɛ toma ɛ. Hale he kondɛɛra te bɛlbwa, ne hɔɔhra kwaraa baa lɔ he dem.

¹¹ Tɔpera anumɛlee n kpɔ ta nyundua ne harɛ, mpo ne koŋkwaa aa lɔ o ta bwa, asɛ dɛ onɛ tɔpere waa teŋa nuanɛ la ta. A waa n ɡel Ona Tɔpere la ɛ tɔpedɛɛɡe dɛ ɡel o do ɡoroŋ.

¹² Hé duu he nyare ne he mɛɛnanar. Anee dɛ́ ɡel he dɔ mkpajaŋ harɛ men Korowii aa kpɔa tɛ heyaa ŋɔ he so o ta la ta.

¹³ He bɛ nɛn kpo.

¹⁴ He bɛ jwamane dɛɛ bɔ.

¹⁵ He bɛ dɛɛ ŋwɛ.

¹⁶ He bɛ dansewea dɛɛ di.

¹⁷ He bɛ ɡel he sie beɡre he dɔŋa deremi. He bɛ ɡel he dɔŋa haahna pɛla dɔ heya. He bɛ ɡel he sie beɡre he dɔŋa bonɔɔna kɛɛ toli, ba nae ne keeɡore, dɛ komɛlbwa aa ɛ ba kwa.”

¹⁸ Nɛra la aa na bwaala nyɛɡla dɛ no o kɔɡra, ne bɛla la sii dɛ na chuu tɔ bwe la ta la, ɔmee laɡ ba dɛ kpɔ bochechela ta ba nɛ ba ka che bojaŋ.

¹⁹ Anee ba ŋɔ Mosis be ŋɔ, “He ɡbabir bol waa ya be, yaa noo. Bɛ ɡel Korowii bol ásɛ ya ba serewe.”

²⁰ Asɛ o ŋɔ nɛra la be ŋɔ, “He bɛ ɔmɛ. Korowiirii bala dɛ́ ba daah heyaa na, ásɛ hɛɛ ɔmɔ dɛ́ ɡel wechɔɡa ɛɛ.”

²¹ Dɛ ba ta cheɡɛ bojaŋ, asɛ Mosis ɡe ka bɛne bam waa bira kpirkpir bela Korowii aa lole la.

Voɡa ne kwaa baa dɛ ɛ saraha a ta

²² Belaa Korowii ŋɔ Mosis be ŋɔ, ó bol ɡɛ waa nɔ baɡle Israel tena ŋɔ, “He ɡbabir nao kɛŋɔ men Korowii aa le nyundua dɛ bol waa he be.

²³ He bɛ suuɡapoŋa kɛɛ suuɡaswɛm bɛlbwa kpɔ ɛ voɡa dɛɛ toma ka ja n nɛ.

²⁴ Hé kpɔ teera ma saraha kon haa lawɛ peera ne boohna ne nae dɛ́ fuah dɛɛ tɛ mɛ o ta, ásɛ dɛ berɛ ɛ deŋnesɔɔhna saraha ɡe tɛ mɛ o ta. Bela maa le tɛ heyaa ŋɔ hɛɛ tom mɛ la, mɛɛ ba he be belaa dɛ́ ba swee heyaa andɛɛɡa.

²⁵ He dɛ ba bwea kpɔe kwaa kon haa ɛ saraha o ta tɛ mɛ naa, hé ɡel bwea la do ɡɛ aa doa la, he bɛ an sɛh. Hé kpɔ kon sɛah aa, aa werii do tɛ n toma kpa.

²⁶ He bɛ n saraha kon ɛ tɛ mɛ dɛ́ ɛ sanjol teeh dɛɛ kaa o ta, dɛ he ɛ ɡɛ naa, dɛ he mumɡbalee he kpɔ dɛɛ baɡle la.”