Kaala 2 - mzwDBL

Mosis lola wa

¹ A ɡɛ saŋ baa dɛ kpoo Hibru bibaala ɡɛ la, baa bɛl le Lewi dea, dɛ mo a ɡɛ dea la haah,

² asɛ o haah la kpoŋe tea dɛ lolɛ bibaa. Haah la aa naa kɛ bie la wer kohona la, o kpɔɔ sɔh korobie atoro.

³ Waa baa na kɛ waa won sɔɔh la sie bɛlbwa kpa la, o nyin komɛl baa kpɔ kpɔɡa sɔɔh kɛŋɔ fufu ken, o ne o tɔ dɛ kpɔ kootal maa o habɔɔ ásɛ nee bɛ won jo o bini. Dɛ kpɔ bie la do o bini ka cheɡ kpɔɡjaŋa ane aa cheɡɛ Nael Moo nyoa.

⁴ Asɛ bie la nahaah ka che sie tama dɛɛ nyiŋi waa aa chiɡ bie la nɛ.

⁵ Belaa Ijipt kooro la bihaah la moo la ta ŋɔ o ka sɔ ne, dɛ o ne o tolii laŋa, asɛ ba kaa valɛ nee la nyoa. O baa ŋɔ o nyiŋi dɛ na fufu kpɔɡjaŋa la baah, asɛ dɛ tomɛ o toli la bɛl ŋɔ ó ka kpɔ ba.

⁶ Waa ba o ne ba tɛo la, o pilu dɛ na bechasɔɔhna o bini. Dɛ bie la dɛ wi asɛ o waa do o sum. Anee o ŋɔ, “Hibru tena bii la bɛlee nɔ.”

⁷ Anee bie la nahaah la ŋɔ Ijipt kooro bihaah la be ŋɔ, “Amɔ ń la ka yerɛ Hibru haah ó ba ɔro tɛɛ kɛɛ?”

⁸ Asɛ o chaŋe ŋɔ, “Ɔɔh, la dɛ́ ka yerɛ bɛl ba.” Asɛ o la dɛ ka kpɔ bie la nya ɡbaɡba ba.

⁹ Belaa Ijipt kooro bihaah la ŋɔ haah la be ŋɔ, “Kpɔ bie nɔ, dɛ́ ka dɛɛro tɛ mɛ ásɛ n bɔe kem.” Asɛ o kpɔ bie la dɛ kaa.

¹⁰ Bie la aa baa kpeɡ tama la, o kpɔɔ ka tɛ Ijipt kooro bihaah la o berɛ o bie. O ŋɔ, “O sɔne Mosis, dɛkalkɛ nee taa n kpɔɔ le.”

Mosis chwae kaa Midian harɛ ta wa

¹¹ Mosis aa kpeɡa la, awola bɛl, o iro dɛ ka chɔɔ o bala Hibru tena, dɛ na ɡɛ baa do ba baa ɛ tomkpeɡa. Asɛ Mosis na Ijipt te kɛŋɔ waa dɛ lɔɔ o bwɛɛ Hibru te.

¹² Waa nyiŋa bar o ta nomɛlbwa nae la, o kpo Ijipt te la dɛ ɡbaa hɛŋle tɔ o nɛ.

¹³ Tɔ aa pera la, o laŋɔ ŋɔ ó ka chɔɔ o bala la ja dɛ na Hibru tena baala banɛ aa dɛ yo. Belaa o bɔɔ onɔ la o kon aa wola maɡrɛ la ŋɔ, “Ɛrɛɛ hɛɛ lɔɔ he dɔŋ nɔɔ?”

¹⁴ Anee o chaŋe ŋɔ, “Umee cheɡe kora ta ŋɔ hé baa nyiŋi ya nɛɛ dɛ́ bol ya waa dɛɛ pa bole ɔ? He dɛ nyin he kpo mɛ ɡɛ haa kpo Ijipt te la kɛɛ?” Ate, Mosis ɔmɛ, dɛ lii kɛŋɔ, “Jamɔ nɛra na n waa maa ɛa la.”

¹⁵ Ijipt kooro baa no waa la, dɛɛ nyin ŋwɛnɛre waa kpɔ a ta dɛ́ kpo Mosis, asɛ o chwa le bela dɛ ka so Midian harɛ ta.

¹⁶ Dɛ kɔlɔŋ bɛl lɔ bela, asɛ awola bɛl, Mosis la ka so o nyoa. Dɛ Midian sɔfo bɛl sɔne Jetro, o bihaahna banuanɛ ba ba viine ne dɛ́ ba dɔ nee tɛ ba mɛɛ peera ne boohna a nyɔ bela.

¹⁷ Belaa peteɡra bane den ba dɛ ba doŋi Jetro bihaahna la. Dɛ ɡɛɛ ba yon dɛɛ ɛɛ ba. Kɛ Mosis ta sɛɛh, o lɛɛ ba ta dɛ ɡbabir ir dɔ nee tɛ ba kondɛɛra la a nyɔ kɛrɛdɛ.

¹⁸ Bihaahna la aa bera la dem ba mɛɛ be la, o bɔɔ ba ŋɔ, “Ɛrɛɛ fini te he ba warane ken?”

¹⁹ Anee ba chaŋe ŋɔ, “Ijipt te bɛlee lɛ yaa ta peteɡra bane nɔn ta. O ɡbabirii dɔ ya nee tɛ yaa dɛ tɛ kondɛɛra la ɡe ane a nyɔ.”

²⁰ Belaa o bɔɔ ba ŋɔ, “Leperaa o dɔɔ? Ɛrɛ waa he ɡelo bela nɔɔ? He la ka yerɔ ó ba ya di kwa.”

²¹ Ba kaa yerɛ Mosis ó ba, waa bala la o sie baa lɛ kɛŋɔ wɛɛ so ba bee. O ne baa soɡa la sie tama la, sɔfo Jetro lawɛ o bihaah Sepora tɛo o mo.

²² Ba lolɛ bibaa, asɛ Mosis ŋɔ, “O sɔne Gɛɛsɔm dɛkalkɛŋɔ, hɔɔhree men harɛ nɔ ta.”

²³ A biɡro tama, asɛ Ijipt kooro la ba sewɛ. Kɛ dɛ Israel tena ta dɛ ɛ ba tomkpeɡa la, dɛ wi dɛɛ yerɛ Korowii ŋɔ ó ba lɛɛ ba.

²⁴ Korowii no ba wii, dɛ lii fɔo o ne Abraham ne Aesek dɛ Jekɔb aa fɔwa la wa.

²⁵ Korowii na Israel tena wenaale, asɛ ba waa we o nɛɛ kohona.