Kaala 18 - mzwDBL

Jetro kaa chɔɔ Mosis

¹ Mosis helabaa Jetro waa ɛ Midian harɛ sɔfo la, no Korowii waa waa ɛa tɛ Mosis ne o nɛra Israel tena, dɛ kpɔ ba le Ijipt harɛ ta la wa.

² Mosis fa ɡelɔ o haah Sepora kaa o helabaa Jetro be ka so,

³ o ne o bibaala banɛ bwa. Ba bini bɛl sɔne Gɛɛsɔm dɛkalkɛ Mosis ŋɔ, “N kaa ɛ hɔɔh harɛfale ta.”

⁴ O pa binɛɛte la sɔn Eliesa dɛ ŋɔ, “Korowii n mɛɛwa aa tomɔ laanee cha mɛ dɛ lɛɛ mɛ le Ijipt kooro nɔn ta, o ta men kpoe.”

⁵ Jetro ne Mosis haah ne o bibaala banɛ la bwaa la o be pua hɛŋle ɡbo harɛ ta, bela waa soɡa dɛ baŋre o tɛnte dea Korowii bwe la jwɛɛh la.

⁶ Dɛ Jetro tɔ sie kpɔ kala tɛ Mosis ŋɔ, “Men maa ɛ he helabaa, ne he haah dɛ he bibaala banɛ la dɛ ba he be.”

⁷ Ate, Mosis le dɛ ka chemo, dɛ ɡuŋu harɛ dɛ jaamo. Ba jam dɔŋa tonɛ dɛ lawɛ dɔŋa ka jo tɛnte Dea la bini.

⁸ Asɛ Mosis bol o helabaa be ɡɛ bwa Korowii aa koh Israel tena wa dɛ ɛ Ijipt kooro ne o nɛra, dɛ laɡ ba le ba harɛ ta. O berɔ bol ba wekpeɡa baa naa ŋwɛnɛ ta, ne lɛɛ Korowii aa lɛɛ ba bwa la wa.

⁹ Jetro aa no ɡɛ la, o sie lɛ wedɛɛɡa Korowii aa ɛ Israel tena dɛ lɛɛ ba le Ijipt tena nɔn ta la ta.

¹⁰ Asɛ Jetro ŋɔ, “Korowiirii dɔ jam kɛŋɔ waa lɛ heyaa le Ijipt tena ne ba kooro nɔn ta.

¹¹ N deno jemɛ name kɛŋɔ Korowii kpeɡri ɡwaa voɡa bwa kpeɡri, dɛ le anɔ waa kpɔa ɛ nɛra baa dɛ nyiŋi Israel tena nyubaahna la wa.”

¹² Ate, Jetro kpɔ kon waa fuh ɛ saraha ne saraha kwaa ane ɡe ba tɛ Korowii. Asɛ Arɔn ne Israel nomonome bwa le ba, asɛ ba ne o di kwa Korowii sie.

Nɛra baa bol waa dɛɛ pa bole lee wa

¹³ Tɔ aa pera la, Mosis soɡe ba waa ta dɛɛ bola. Asɛ nɛra la ba che baro ka tel jɔmɔra.

¹⁴ O helabaa Jetro aa nao la, o bɔɔro ŋɔ, “Bɔkwa waa he ɛ dɛɛ tɛ nɛra la bwa nɔɔ? Ɛrɛɛ he ɡbo so ba waa ta dɛɛ bola, hale ba che bare dɛ le chɔɔ ka tel jɔmɔra bwa nɔɔ?”

¹⁵ Asɛ Mosis chaŋe ŋɔ, “Nɛra la ba n be dɛ́ ba hweli waa Korowii aa dɛ nyin.

¹⁶ Dɛ bɛl ne o dɔŋ dɔ waane aa, n siee ba yon ba a ne, ásɛ n so a ta dɛ́ pa bole dɛ́ ɡel ba jemɛ Korowii Mmarare la wa.”

¹⁷ Anee o helabaa chaŋo ŋɔ, “Aŋwɛnɛ ta laa hɛɛ ɛa ɡɛ la.

¹⁸ Koeh he ne nɛra nɔ baa dɛ ba he be nɔ ɛɛ koh la. Toma la ɡwaa he nɛ, he ɡbo aa won ɛa.

¹⁹ Cheɡ deŋne dɛɛ no n be ń tɛɛ a wejema, ásɛ Korowii ja he nɛ. A chɛ kɛ he che tɛ nɛra la Korowii sie, dɛ́ kpɔ ba waa baa bil o sie.

²⁰ Gel ba jemɛ Korowii Mmarare la, dɛ́ baɡ ba ɡɛ baa so sodɛɛɡa.

²¹ Berɛ le ba bini wejerema, baa dɛ ɔmɛ Korowii ba wa aa dɔ kasinteŋ, ba siwi aa wola suuɡa beɡre. Dɛ́ kpɔ ba chɔ nɛra kaɡboŋa ne lafare, ne fifraanunue dɛ fifi nyoo.

²² Dɛ waane aa kpeɡe kohona naa, ɡel tɛɛ ba ba ɡbo ɛɛ bola saŋ bɛlbwa. Kɛ dɛ ane baa do kpeɡri dɛɛ tɛɛ ba aa, bá kpɔ ba he sie, anee dɛ́ ɡel he toma do fɛɡre.

²³ He wono ɛ ken ɡɛ Korowii aa dɛ doe la aa, haa koeh ba kohona kpa. Ásɛ dɛ nɛra nɔ bini bɛlbwa berɔ dɛɛ kaa o dem aa, o kaa tetoora ne.”

²⁴ Mosis no o helabaa waa waa bola la dɛ ɛ a bwa.

²⁵ O le Israel baala bini wejerema la ba ɛ nomonome dɛ chɔ ba nyoo. Nɛra kaɡboŋa ne ba nomonome, nɛra lafare ne ba nomonome, nɛra fifraanunue ne ba nomonome, asɛ nɛra fifi ɡe ne ba nomonome.

²⁶ Banee chɔ ba bala nyoo dɛɛ bol ba waa saŋ bɛlbwa. A bini ane baa do kpeɡri aa, bá kpɔ ba Mosis be, anɔ la aa wola kpeɡe ɡe la, ba ɡbabir bola.

²⁷ Ate, Mosis ka do o helabaa Jetro ŋwɛnɛ o kaa o bwɛ.