Kaala 17 - mzwDBL

Nee aa bula le bwetal ta wa

¹ Israel tena bwa iro le Sen pua hɛŋle ɡbo harɛ ta dɛɛ ɡaaɡe, dɛ so dɛɛ ir ɡɛ Korowii aa dɛ do ba la. Ba ɡaaɡɔ dɛ ka baŋre ba tɛnte deene so bobɛl ɡe baa dɛ yerɔ Refidim. Dɛ nee toole harɛ la ta bá nyɔ.

² Anomanta, ba ne Mosis naɡrɔ, asɛ ba ŋɔ, “Tɛ́ yaa nee yá nyɔ.” Asɛ o chaŋe ŋɔ, “N ne he naɡra munii ame o? Ɛrɛɛ hɛɛ nyin he daah Korowii dɛ́ na nɔɔ?”

³ Nyɔɡre kohona nomanta, ba teŋɔ naɡre Mosis waa bela. Ba ŋɔ, “Ɛrɛɛ he lawɛ yaa le Ijipt harɛ ta, dɛ ɡel nyɔɡre baa kpo ya ne ya bii ne kondɛɛra ya bwa serewe nɔɔ?”

⁴ Ate, Mosis soŋe Korowii ŋɔ, “N Naa Korowii, ɛrɛɛ yaa ba wona ɛ tɛ nɛra nɔ te nɔ? Ba dɛ nyin kɛ ba foɡ mɛ bwea kpo kwara.”

⁵ Anee Korowii chaŋe Mosis ŋɔ, “Tɔ nɛra la sie. Kpɔ nomonome la bini bane ja he nɛ, dɛ́ kpɔ daŋɡbala la haa kpɔa lɔ Nael Moo sie la ɡe kpoŋe kaa.

⁶ Mɛɛ ka che bwe bɛl jwɛɛh Sinai Bwejen ta belaa dɛɛ kpa heya. Dɛ he tel belaa, kpɔ daŋɡbala la lɔ bwe la, nee ɛɛ le o taa ba, ásɛ nɛra la dɔ nyɔ.” Asɛ Mosis ɡe ɛ ɡɛ waa nɔ bwa Israel nomonome la siwi ta.

⁷ Mosis pa bela sɔn Maasa ne Mɛreba, dɛkalkɛ Israel tena la naɡre wa dɛ daah Korowii na dɛɛ bɔɔ ŋɔ, “Korowii ja ya nɛɛ kɛɛ o ta ya nɛɛ jae yɔ?”

Israel tena yo Amalɛk tena

⁸ Amalɛk tena balɔ ba lɔ tɔ Israel tena nɛ Refidim dɛ yoo ba.

⁹ Anee Mosis ŋɔ Josua be ŋɔ, “Le ya baala nɔ bini bane, ásɛ he ka yoo ba. Kere mɛɛ ka che deŋɡare bɛl doa belaa dɛ́ kpoŋe Korowii daŋɡbala la.”

¹⁰ Anomanta, Josua leɔ dɛ kaa yo Amalɛk tena la ɡɛ Mosis aa doo la, asɛ Mosis ne Arɔn dɛ Hur kaa deŋɡare la doa.

¹¹ Mosis baa ir o nɔɔra aa, dɛ Israel tena dɛ pɔ ba nɛ. O ba nɔɔra ne harɛ naa, dɛ Amalɛk tena ɡe berɔ dɛɛ pɔ Israel tena nɛ.

¹² O nɔɔra aa baa koh la, Arɔn ne Hur kpɔ bwe ba bil Mosis o so o ta. Bɛl lɔ o ɡal asɛ bɛl ɡe do o diɡ, asɛ ba ɡɔɔ o nɔɔra nyundua, ásɛ o nɔɔra won che dɛ́ ka tel kɛŋɔ wee aa baa jo.

¹³ Gɛɛ a do Josua ka yo Amalɛk laa tena dɛ pɔ ba nɛ.

¹⁴ Asɛ Korowii ŋɔ Mosis be ŋɔ, “Chwerɛ ɡɛ waa nɔ do tɔn bini á ɛ waa aa chɔ kerekere. Gel Josua no dɛkalkɛ n dɛ ba Amalɛk tena chɔɡa baa wola ba waa no harɛ nɔ ta bobɛlbwa kpa.”

¹⁵ Mosis ɛ kon waa ɛ saraha o ta dɛɛ tɛ Korowii bela, dɛ pa o sɔn ŋɔ, “Korowiirii yoa dɛɛ tɛ mɛ.”

¹⁶ Dɛ berɛ ŋɔ, “Korowii nɛɛ n kpɔ sie dawɛ o yo dɛɛ tɛ mɛ. Korowii ɛɛ teŋɔɔ yo Amalɛk tena saŋ bɛlbwa dɛɛ la!”