Kaala 15 - mzwDBL

Mosis yel

¹ Belaa Mosis ne Israel tena la ɡo yel kpɛɛ Korowii ŋɔ, “Mɛɛ ɡo yelee kpɛɛ Korowii, dɛkalkɛ o lɛ sɔn kohona. O kpɔ jaɡre ne nɛra baa soɡe a ta bwa ka do mpo bini.

² Korowiirii n bokpeɡa, o sɔn ber mɛ yel mɛɛ ɡo, onee n Lɛɛ, onee mɛɛ tomɛ dɛɛ kpɛɛro, Korowii n naa wa aa tomɔ laanee on, o sɔnee mɛɛ ba yera dɛɛ tomɔ.

³ Korowiirii yoa dɛɛ tɛ yaa, Korowiirii o sɔn.

⁴ Ijipt kooro kwaa baa vɔwa pɛl jaɡre ne o laa tena, o taɡɛ a bwa do mpo bini, Kooro nomonome tenten bwa sirimi mpo la bini.

⁵ Vil tentenee bɔle ba nɛ, ba chɔ vil la mun ta kɛŋɔ bwe ken.

⁶ N Naa Korowii, he nɔn diɡ dɔ jirima kpeɡri do o ta, he kpɔ chɔɡ ya dɔma.

⁷ He kpeɡri ne he jirimaa he kpɔ taɡɛ he dɔma ta. He ɡelɔ he bandia kohona ba fuuh ba kɛŋɔ kpɔɡa ken.

⁸ He nyoa peu ɡbo ɡelɔ mpo bini pere, dɛ che diɡ ne ɡal kɛŋɔ danjwɛ, o holɔ vile aa lɔ o baah ta chɔ pɛɛ.

⁹ Ya dɔma tamanɔ dɛ ŋɔ, ‘Mɛɛ ti baa dɛ́ ka pɔ ba nɛ. Ba kondɔɔh bwaa mɛɛ ba pae ɡɛ maa dɛ nyin. Mɛɛ tɛr n kere ba nɛɛ dɛ́ chɔɡ ba bwa.’

¹⁰ Kɛ haa hweera kerabeŋkpoŋ ɡbo la, a ɡelɔ mpo nee bɔle banɛ. Ba sirimo kɛŋɔ kpana aa sirimi vil bini la ken.

¹¹ N Naa Korowii, voɡ bisoo do kɛ hen ɔ? He do ɡoroŋ ɡa, he jirima do kan kohona. Umee won nyokpowaa ɛɛ kɛ he nɔ?

¹² He tɛr he nɔndiɡ, asɛ harɛ kpɔ ya dɔma lile.

¹³ He nyina aa wola jaɡa dɔe nomanta, hɛɛ tɔ he nɛra haa lɛɛ ba la siee. Hɛɛ kpɔ he kpeɡrii dɛɛ nyiŋi ba nɛ, dɛ́ kpɔ ba kaa harɛ waa do ɡoroŋ ta.

¹⁴ Harɛre ta nɛra ɛɛ no he waa ásɛ ɔmee laɡ ba, bambichɔɡ ɛɛ ɡeloo Filisti tena bwara yɔr kɛŋɔ loltea yon lɔ haah la.

¹⁵ Ɔmee ɛɛ lawɛ Edom koranaree kohona, Moab nomonome bwara yɔr baa chel, Keenan tena ɡe bwa ɛɛ heo kwara.

¹⁶ Ɔmee kohona ɛɛ chole ba nɛɛ, á che he kpeɡri ta bá ka che bobeŋkpoŋ kɛŋɔ bwe ken, dɛ́ ka tel kɛŋɔ he nɛra aa teŋe ba kaa mɔɔ. N Naa Korowii, nemenɛ he nɛra haa lɛɛ ba le Ijipt harɛ ta la teŋe ba kaa mɔɔ.

¹⁷ He kpɔ ba ka so he be bwe doa, bwe la doa waa ɛ he soŋnibɔr la, he ɡbaɡba Dea waa do ɡoroŋ he che he kpeɡri ta cheɡo la.

¹⁸ N Naa Korowii, hɛɛ di kora saŋ bɛlbwaa dɛɛ la.”

¹⁹ Gɛɛ a do Ijipt kooro kwaa aa do kɛŋɔ torɔɡo ba vɔwɛ dɛɛ pɛl jaɡre, ne baala baa soɡe jaɡre ta bwa jo mpo la bini, asɛ Korowii ɡel nee la ba bɔle ba nɛ. O ɡelɔ Israel tena la te valɛ harɛpɛɛ waa hola ta mpo la bini dɛ le.

²⁰ Belaa Arɔn nimambie Miriam waa ɛ Korowii keame kpɔ loŋ, asɛ haahna la bwa ɡe ja dɛ kpoŋe ane ba yiiɡa dɛ sa teŋɛ dɔŋa nɛ.

²¹ Asɛ Miriam ɡo yel dɛ ŋɔ, “Hé ɡo yela kpɛɛ Korowii. O lɛ sɔn kohona ɡa. O kpɔ jaɡre ne nɛra baa soɡe a ta bwa ka ta mpo bini.”

Neerare ane aa lɔ Mara ne Elim wa

²² Ate, Mosis tɔ Israel tena la sie le Mposwɛm la nyoa, dɛ kpɔ ba kaa pua hɛŋle ɡbo harɛ ta bobɛl baa dɛ yerɔ Suur. Ba ɡaaɡe harɛ la ta tɔpera atoro dɛ ba ta nee nae.

²³ Ba baa tel bobɛl baa yerɔ Mara dɛ na nee bɛl. Ba ta wone nyɔɔ, dɛkalkɛ dɛ o kpeli. Gɛɛ a do baa yerɛ bela Mara. O munii kpeli.

²⁴ Anomanta, nɛra la naɡre wa dɛ pɛɛ Mosis ŋɔ, “Leperaa ya dɔ nee dɛ́ nyɔɔ?”

²⁵ Ate, Mosis wi no Korowii asɛ o baɡlo daa bɛl. O kpɔ ta nee la ta nee la do som ba bwa nyɔ. Bela la, Korowii do Mmarare tɛɛ ba asɛ dɛ kpɔ daah ba na.

²⁶ Korowii bol ba be ŋɔ, “Dɛ hɛɛ cheɡ deŋnee dɛɛ no men Korowii haa dɛ tom mɛ nɔ dɛɛ ɛ anɔ la aa toɡra n be, dɛ́ swɛɛ siwi dɛɛ teŋɛ me Mmarare bwa ta ɡɛ naa, ate maa weela maa kpɔa ba ta Ijipt tena nɛɛ la bɛlbwaa kpɔ ba he nɛ. Menee Korowii maa dɛ chah heya weela.”

²⁷ Ba berɔ ba tel Elim. Buli fi dɛ anɛ dɛ bambie daa fifraanuanɛ lɔ bela, asɛ ba baŋre ba tɛnte deene nee la jwɛɛh bela.