Kaala 14 - mzwDBL

Mposwɛm ɡala wa

¹ Ate, Korowii ŋɔ Mosis be ŋɔ,

² “Ŋɔ Israel tena be ŋɔ ba berɛ ba baŋre ba tɛnte deene Pi Haherɔt jwɛh waa lɔ Miɡdol ne Mposwɛm baah ta la. Bá so mpo nyoa ásɛ Baal Sefon ɡe do baŋ bɛl.

³ Ijipt kooro ɛɛ liiruu kɛŋɔ Israel tena nyoɡre pua waa ɛ hɛŋle ɡbo harɛ ta belaa dɛɛ ɡaaɡe ba bɔr.

⁴ Mɛɛ ɡeloo o deŋne do kpeɡri o ŋɔ wɛɛ ti baa. Mɛɛ pɔ o ne o laa tena nɛɛ dɛ́ dɔ jirima. Ásɛ Ijipt tena bwa jemɛ kɛŋɔ menee Korowii kpela.” Anomanta, ɡɛɛ Israel tena ɛ.

⁵ Baa baa bol Ijipt kooro be ŋɔ nɛra la chwao la, o ne o nomonome charɛ ba liire dɛ ŋɔ, “Bɔkwa waa ya ɛ ken ɔ? Ya ɡelɔ Israel tena la kaa yaa wola ban dɔ ba ɛ ya tomare kpa.”

⁶ Ate, kooro ɡel ba kpɔ kon waa do kɛ torɔɡo ba vɔwɛ pɛl jaɡre dɛɛ so a bini ba cheɡ, asɛ dɛ boa o laa tena nyoa.

⁷ O kpɔ kwaa aa do kɛ torɔɡo aa lɔ Ijipt harɛ bwa ta ne anɔ la aa kpeɡa kɛrɛdɛ la lafraanumɛl, asɛ dɛ le o laa nomonome ba chɔ a nyoo.

⁸ Korowii ɡelɔ Ijipt kooro la deŋne do kpeɡri, asɛ o ti Israel tena baa kpɔ silɛɛ le dɛɛ kaa la.

⁹ Kooro kwaa aa do kɛ torɔɡore la bwa, ne nɛra baa soɡe jaɡre ta, dɛ laa tena la ti Israel tena, dɛ ka bɛn ba bela baa baŋre tɛnte deene Mposwɛm nyoa la. Bela bɛne Pi Haherɔt asɛ Baal Sefon ɡe do baŋ bɛl.

¹⁰ Kooro ne o laa tena aa dɛ bɛn ba asɛ Israel tena ke nyiŋi la, ba nao kɛŋɔ Ijipt tena puu ba tonɛ. Asɛ ɔmee kohona nomanta, ba wi dɛɛ yerɛ Korowii ŋɔ ó ba cha ba.

¹¹ Dɛ bɔɔ Mosis ŋɔ, “Lalbɔɔnee wola toole Ijipt harɛ ta waa he ba ya ne pua hɛŋle ɡbo harɛ ta ŋɔ yá ba serewe nɔ kɛɛ? Bɔkwa waa he ɛ yaa ken?

¹² Ya ta he be bolɛ Ijipt ŋɔ he ɡel ya so dɛɛ tom ba aa? A wer kɛŋɔ ya fe aa lɔ bela dɛɛ tom ba, ɡwaa kɛŋɔ yaa lɔ pua hɛŋle ɡbo harɛ ta bonɔ dɛɛ ba serewa nɔ.”

¹³ Asɛ Mosis chaŋ ba ŋɔ, “He bɛ ɔmɛ, hé che kiŋkiŋ dɛ na lɛɛ Korowii aa dɛ ba heyaa lɛɛ fini. Ijipt tena haa dɛ na ba fini nɔ, haa ban na kpa bwa.

¹⁴ Korowiirii dɛ́ yo tɛ heya, hé te hel.”

¹⁵ Anee Korowii ŋɔ Mosis be ŋɔ, “Ɛrɛɛ he wi dɛɛ yer mɛ nɔɔ? He te ŋɔ Israel tena la be ŋɔ bá pa sie dɛɛ la.

¹⁶ Tɛr he daŋɡbala la pa Mposwɛm la ta, ásɛ o bini pere Israel tena la won valɛ o bini le kɛŋɔ harɛpɛɛ ta.

¹⁷ Mɛɛ ɡeloo Ijipt tena deŋne do kpeɡri, ásɛ ba ti heya. Belaa mɛɛ ba n jirima dɔe dɛ́ le Ijipt kooro ne o laa tena ne kwaa aa do kɛ torɔɡore, dɛ nɛra baa dɛ so jaɡre ta la bwa nɛ.

¹⁸ Maa ba pɔ kooro ne o nɛra nɛɛ la, anee baa ba jema kɛŋɔ menee Korowii.”

¹⁹ Korowii torome waa tɔ Israel tena sie o ne baa valɛ la le ba sie dɛ ba che ba habɔɔ. Bam la waa tɔ ba sie la ɡe le ba sie dɛ ba che ba habɔɔ,

²⁰ dɛ do Ijipt laa tena ne Israel laa tena baah ta. Awola jwaana la, bam la baa tɔ baŋ bɛl, baŋ bɛl tena do biro ta asɛ bɔr chaah baŋ bɛl tena ɡe be. Anomanta, bɛlbwa ta wone la o dɔŋ be awola jwaana la bwa.

²¹ Mosis tɛr daŋɡbala waa lɔ o nɔn ta la pa mpo la ta, asɛ awola jwaana la bwa Korowii ɡel peujen bɛl ta le wee leebɔr, dɛ taɡɛ nee la kaa habɔɔ o berɛ harɛpɛɛ dɛ hol chɔ. Mpo la bini pero,

²² asɛ Israel tena valɛ harɛpɛɛ waa hola ta dɛ le o baŋ. Nee la pero che kɛŋɔ danjwɛ dɛ do ba diɡ ne ɡal,

²³ ne Ijipt tena baa soɡe jaɡre ta, ne kwaa aa do kɛ torɔɡo la bwa ti ba dɛ ka jo mpo la ta.

²⁴ Aa baa ka tama bɔr chaah la, Korowii cheɡɛ bam waa do jaŋne kaa nyundua la ne nii waa tɛra kaa nyundua la ta dɛ nyiŋi Ijipt laa tena dɛ chɔɡ ba liire.

²⁵ O ɡelɔ kwaa aa do kɛŋɔ torɔɡore la nakpale chɔɡ a tɛɡra do kpeɡri. Asɛ Ijipt tena la ŋɔ, “Hé ɡel ya ɡel Israel tena nɔ nɛɛ teŋa oo! Korowiirii cha ba dɛɛ yo yaa la.”

²⁶ Ate, Korowii ŋɔ Mosis be ŋɔ, “Tɛr daŋɡbala waa lɔ he nɔn ta la pa mpo la ta, ásɛ o palɛ tɔ Ijipt tena ne kwaa aa do kɛ torɔɡore dɛ nɛra baa soɡe jaɡre ta la bwa nɛ.”

²⁷ Asɛ Mosis tɛr pa mpo la ta, bɔr chaahna bini la, o berɛ ba che o buɡ ta. Dɛ Ijipt tena chwao dɛ fe ɛɛ ba lee, asɛ Korowii taɡ ba do mpo la bini.

²⁸ Nee la palɔ dɛ ba tɔ o laa tena la bwa nɛ. Kwaa aa do kɛŋɔ torɔɡo ne nɛra baa soɡe jaɡre ta dɛɛ ti Israel tena la bwa ka mpo la bini, beŋkpoŋ kwaraa ta kae.

²⁹ Kɛ Israel tena la te valɛ harɛpɛɛ waa hola ta mpo la bini, nee la pere kɛŋɔ danjwɛ dɛ do ba diɡ ne ɡal ta ba le o baŋ.

³⁰ Kenii Korowii lɛ Israel tena le Ijipt tena nɔn ta awola tɔpere, asɛ Israel tena na ba kɛ baa serewa dɛ chɔ Mpo la nyoa.

³¹ Israel tena aa na Korowii kpeɡri kohona waa kpɔa chɔɡ Ijipt tena la, ba ɔmɔ asɛ dɛ yarada Korowii ne o bonɔɔ Mosis.