Kaala 13 - mzwDBL

Bibanloɡla kpɔe dɛ́ tɛ Korowii

¹ Korowii ŋɔ Mosis be ŋɔ,

² “Le bibanloɡle bɛlbwa cheɡ tɛ mɛ ó ɛ n kon. Israel te bibanloɡle bɛlbwa ne kondɛɛre bɛlbwa ɡe biloɡle ombal bwa ɛ n kwa.”

³ Belaa Mosis ŋɔ nɛra la be ŋɔ, “Hɛ́ɛ lii a ɡɛ tɔpere nɔ haa kpɔa le Ijipt harɛ he fa aa dɛ di somanjiri o ta la, dɛkalkɛ Korowii kpeɡri ne o bokpeɡaa o kpɔ lɛ heya. He bɛ paanoo iisi aa lɔ o ta di.

⁴ Fini haa dɛ le Ijipt harɛ ta nɔ ɛ Abib korobie ta.

⁵ Dɛ Korowii baa kpɔ heyaa tel Keenan ne Hiti ne Amɔre ne Hivi, dɛ Jebus tena harɛ waa ŋwɛɛra baɡle he naawa ŋɔ wɛɛ kpɔɔ tɛ heya ó ɛ he kon la ta, harɛpare ondɛɛɡe ta naa, a chɛ kɛ hé di a ɡɛ tɔpere nɔ korobie nɔ ta. Dɛkalkɛ o ba he ne harɛ o taa soma ta.

⁶ Tɔpera anuanɛɛ hɛɛ ba paanoo iisi aa wola toole a ta la dii. Kɛ tɔpenuanɛ wee la te, hé ɛo tɔpejen tɛ Korowii.

⁷ Hé di paanoo iisi aa wola toole a ta tɔpera anuanɛ la ta. He bɛ ɡel komɛlbwa iisi aa lɔ o ta do he be. Hale he harɛ jwɛh ta bobɛlbwa kwara.

⁸ Awola haa dɛɛ di tɔpere la, hé ŋɔ he bii be ŋɔ, ‘Korowii kpeɡri ne bokpeɡa waa kpɔa lɛ yaa le Ijipt harɛ ta la waa yaa ɛ ɡɛ.’

⁹ Gel tɔpere la dii do kɛŋɔ nɔnloɡ, kɛɛ komɛl haa kpɔ vɔwɛ he tile ta, dɛɛ liiri Korowii Mmara la ta teŋa. Dɛkalkɛ Korowii kpeɡri ne o bokpeɡaa o kpɔ lawɛ le Ijipt harɛ ta.

¹⁰ Hé teŋɛ ɡɛ waa nɔ ta dɛɛ ɛa tɔpere waa chɛa ta bena bɛlbwa.

Bibanloɡla wa

¹¹ Korowii baa kpɔ heyaa ba Keenan harɛ ta, dɛ kpɔ tɛ heyaa ɡɛ waa ŋwɛɛra dɛ baɡɛ he ne he naawa nyoa la tonaa,

¹² a chɛ kɛ hé kpɔ bibanloɡle bɛlbwa tɛo. Kondɛɛre bɛlbwa ɡe biloɡle ombal ɛ Korowii kon.

¹³ Keeɡo biloɡle bɛlbwa chɛ kɛŋɔ hé kpɔ pee charɔ. Kɛ dɛ haa on charaa, hé ku o baŋa. Hɛɛ won charɛ bibanloɡle bwa ɡe nyu.

¹⁴ Tɔpebɛl dɛ he bibaa bɔɔre ŋɔ ɛrɛɛ ɡɛ waa nɔ ɛɛ chaɡle aa, he ŋɔ, ‘Korowii kpeɡri ne o bokpeɡaa o kpɔ lawɛ yaa le somanjiri dii ta Ijipt harɛ.

¹⁵ Ijipt kooro aa ɛ deŋnekpeɡ dɛ vɛh yaa ŋwɛnɛ tɛɛ ya kaa la, Korowii kpoo nɛra bii baa ɛ bibanloɡla ne kondɛɛre bɛlbwa biloɡle Ijipt harɛ ta. Anee ɡela n kpɔ n kondɛɛra biloɡla ambala dɛɛ tɛ Korowii, dɛ́ berɛ charɛ n bibanloɡle nyu la.’

¹⁶ Gɛ waa nɔ do kɛŋɔ nɔnloɡ kɛɛ kon yaa kpɔ vɔwɛ tili ta aa lii yaa Korowii kpeɡri, ne o bokpeɡa waa kpɔa lawɛ yaa le Ijipt harɛ ta la.”

Korowii tɔ Israel tena sie ba ɡale Mposwɛm

¹⁷ Ijipt kooro tɛ nɛra la ŋwɛnɛ ŋɔ bá kaa, kɛ Korowii ta ba sie tɔe ba kpɔ ŋwɛnɛ waa chɔa kaa Filisti tena harɛ ta la, dɛ onee fe bora. Asɛ Korowii lii ŋɔ, “Dɛ ba kaa cheme laa laa, baa charɛ ba liiree dɛ́ berɛ kaa Ijipt harɛ ta.”

¹⁸ Anomanta, o kpɔ ba bar kpɔ ŋwɛnɛ waa chɔa kaa pua hɛŋle ɡbo harɛ ta, Mposwɛm pera. Dɛ Israel tena vɔwɛ ntoa, dɛ le Ijipt harɛ dɛɛ ba ba yo.

¹⁹ Mosis aa dɛ kaa la, o pa Josef hoɡa dɛkalkɛ Josef ɡelɔ Jekɔb bii fa ŋwɛɛ baɡlo. O ŋɔ, “Korowii ɛɛ ba lɛ heyaa, anomanta, a chɛ kɛ hé kpɔ n chɔɔ le bonɔ harɛ nɔ ta.”

²⁰ Baa le Sukot la, ba kaa baŋre ba tɛnte deene Etaam. O chɔ pua hɛŋle ɡbo harɛ ta nyoa bobɛl.

²¹ Korowii kpɔ bam bɛl waa do jaŋne kaa nyundua ba tɔ ba sie webaŋa wɛɛ chaɡ ba ŋwɛnɛ, asɛ jwaana ɡe o kpɔ nii waa tɛra kaa nyundua tɔ ba sie wɛɛ chaah ba won vala. Gɛɛ a ɛ ba won webaŋa ne jwaana bwa vala.

²² Bam la teŋɔ dɛɛ tɔ ba sie webaŋa, asɛ nii la ɡe teŋɛ dɛɛ chaah ba bɔr jwaana.