Kaala 12 - mzwDBL

Galekaa Tɔpejen dii

¹ Korowii bol waa baɡle Mosis ne Arɔn Ijipt harɛ ta ja,

² dɛ ŋɔ, “Hé kpɔ korobie nɔ ɛ he korobiloɡle bena bɛlbwa.

³ Hé ŋɔ Israel tena be ŋɔ a ɡɛ korobie nɔ tɔpera fi ta la, bɛlbwa lawɛ pebie ó che tɛ o ne o dem tena. Dem te bɛlbwa lawɛ pebie beŋkpoŋ.

⁴ Dɛ dem bɛl nɛra aa kanɛ dɛ́ won chwe pebir la aa, ba ne dem waa bɛna ɛɛ won bɔne. Hé bɔna ɡɛ del aa chɛ kɛ bɛlbwa dɔ.

⁵ Kondɛɛre ombal waa wola kirihiah bɛlbwa dii, dɛ di benanyoa laanee chɛ kɛ hé lawɛ ba ɛ ɡɛ waa nɔ. He ta pebie dɔe yaa, bohnee chɛ kɛ hé lawɛ.

⁶ Hé nyiŋa dɛ ka tel korobie nɔ tɔpera fi dɛ anaarɛ ta, a ɡɛ saŋee Israel tena ɛɛ ba a kpoora jɔmɔra.

⁷ Ásɛ ba kpɔ a chale la ane ɛ ba doonyoo daa nyundua, ne a keŋkeŋni dem bela baa dɛ ba ola la chwee la.

⁸ Awola jwaana la tenten la, bá wɔɔ ola la, dɛ́ kpɔ papooni aa kpela ne paanoo baa wola iisi a ta doe la ja a ta dɛ́ di.

⁹ He bɛ ola la an lwɛɛ kɛɛ an daala chwe. Hé wɔɔ ane a nyuune ne nakpale ne a tea bini kwaa te bwa.

¹⁰ He bɛ di a ka tɔɔ per a ta. Anɔ la aa ka la bwa chɛ kɛ hé fuah.

¹¹ Gɛ haa dia laanee nɔ. Hé bini bɛlbwa kpɔ o batakaarejaŋ dɛ́ kpɔ kiriso vɔwɛ o ta, dɛ́ do naŋɡawa ásɛ dɛ kpoŋe o daŋɡbala kɛŋɔ waa dɛ ba ŋwɛnɛ bɛl kaala. Warane ɡee chɛ kɛŋɔ hé dia. Anee ɛ Galekaa kondikwa haa dɛ ba dii n sɔn ta.

¹² Awola jwaana la tenten la, mɛɛ valɛ Ijipt harɛ ta bwaa, dɛ́ kpo bibanloɡle bɛlbwa waa ɛ binyoa, ne kondɛɛre bɛlbwa ɡe biloɡle ombal. Mɛɛ chɔɡ voɡa aa lɔ Ijipt harɛ ta bwaa. Menee Korowii.

¹³ Chal haa kpɔ ɛ he doonyoo laanee dɛ́ baɡle deene haa soɡe a bini. N teŋo baa kaa dɛ na chal laa, maa heyaa wobɛlbwaa ɛ, mɛɛ ɡale heyaa ta, ásɛ dɛ jo Ijipt tena la deremi dɛ́ tɛr ba deŋne.

¹⁴ Hé di a ɡɛ tɔpere nɔ saŋ bɛlbwa dɛɛ la, dɛ́ kpɔ lii men Korowii waa maa ɛa tɛ heya. Hé ɡel tɔpere nɔ chɔ le tɛ he ne he naanar baa ka ba saŋ bɛlbwa dɛɛ la.

¹⁵ Hé di paanoo iisi aa wola toole a ta tɔpera anuanɛ. Tɔpere waa tɔ sie la, hé laa iisi bɛlbwa kpɔ he deene bini. Nomɛlbwa waa di paanoo iisi aa do o ta a ɡɛ tɔpera nɔ ta la, dɛ o ta n nɛra baa ɛ Israel tena la bini jae kpa.

¹⁶ Tɔpere waa tɔ sie ne tɔpenuanɛ wee la taa chɛ kɛ hé cheme dɛ́ tom mɛ. Nomɛlbwa ta chɛ kɛ ó ɛ toma bɛlbwa, nemenɛ kondikwaa waa ɛ dɛ́ di ɡbo.

¹⁷ Hɛ́ɛ di Paanoo Iisi Aa Wola Toole a ta Tɔpejen la dɛ́ kpɔ lii men Korowii, dɛkalkɛ a ɡɛ tɔpere la taa n lawɛ heyaa le Ijipt harɛ ta denaa ta. Hé ɡel tɔpere nɔ chɔ le tɛ he ne he naanar baa ka ba saŋ bɛlbwa dɛɛ la.

¹⁸ Korobie waa tɔ sie la, tɔpera fi dɛ anaarɛ ta jɔmɔra, hé pa mun di paanoo iisi aa wola toole a ta ka tel korobie la tɔpera fifraanɛ dɛ beŋkpoŋ la ɡe jɔmɔra.

¹⁹ He bɛ ɡel ba na iisi he deremi tɔpera anuanɛ la ta. Nomɛlbwa wáa di kondikwa iisi do a ta la, bá doŋu le Israel tena bini. Dɛ nɛŋhɔɔh kɛɛ bwɛɛlembiee yoo, bá doŋu.

²⁰ He bɛ iisi kondikwa bɛlbwa di. Bobɛlbwa haa so la, hé di paanoo iisi aa wola toole a ta.”

²¹ Belaa Mosis yerɛ Israel nomonome la bwa cheme dɛ ŋɔ, “He bɛlbwa ka lawɛ pee kɛɛ booh waa ka kpo o ne o dem tena kpɔ di Galekaa la.

²² Hé kpɔ hesɔp daa li ola la chal ta loɡbaa bini ɛ he doonyoo keŋkeŋna ne a nyundua daa la ta. He bini bɛlbwa bɛ buse le ka tel kɛ tɔɔ aa pera chɔɔ mɔɔ.

²³ Korowii dɛ ba harɛ la ta joe, dɛ́ kpo Ijipt tena bibanloɡla bwa. O teŋo baa kaa dɛ na chal la doonyoo daa nyundua ne a keŋkeŋni ɡɛ naa, wɛɛ ɡelaa dɛ́ ba kaa. Waa ɡel Korowii nyundua torome waa dɛ kpoo Ijipt bibanloɡla la jo he deremi ta dɛ́ kpoo heya.

²⁴ Hé ne he bii ne naanar teŋɛ waa maa dɛ do heyaa nɔ ta saŋ bɛlbwa dɛɛ la.

²⁵ He baa tel harɛ Korowii aa baɡɛ heyaa nyoa ŋɔ wɛɛ kpɔɔ tɛ heyaa la ta naa, hé teŋɛ tɔpejen nɔ dii waa ta dɛɛ ɛa.

²⁶ Dɛ he bii baa bɔɔ heya ŋɔ, ‘Ɛrɛɛ a ɡɛ tɔpejen nɔ dii mun ɛɛ chaɡle aa,’

²⁷ hé ŋɔ ba be ŋɔ, ‘Galekaa saraha taa Korowii kpoo Ijipt tena bibanloɡla bwa ba deremi ta, dɛ ɡale ya Israel tena deremi ta kaa.’ ” Mosis aa bol waa tonɛ la, Israel tena ɡuŋo dɛ tomɛ Korowii.

²⁸ Asɛ ba la dɛ ka ɛ ɡɛ Korowii aa do Mosis ne Arɔn ŋɔ ba ɛ la.

²⁹ Bɔr aa joa harambaŋa la, Korowii kpo Ijipt tena bibanloɡla bwa. O kpɔɔ le Ijipt kooro waa soɡe kara ta la bibanloɡle nɛ, dɛ ba nɛn baa lawɔ do dea bibanloɡle nɛ, dɛ kondɛɛra bwa ɡe biloɡla nɛ.

³⁰ Awola jwaana la, kooro ne o nomonome bwa ne Ijipt tena iro dɛɛ wi kohona harɛ la ta bobɛlbwa, dɛkalkɛ dɛ dem bɛlbwa toole nɛn aa wola o ta sewɛ.

³¹ Jwaana la tenten la, Ijipt kooro yerɛ Mosis ne Arɔn dɛ ŋɔ, “Hé kaa! He ne Israel tena bwa ir le harɛ nɔ ta. Hé kaa dɛ́ ka tomɛ Korowii ɡɛ haa soŋa la.

³² Hé kpɔ he peera ne boohna ne nae bwa kaa ɡɛ haa bola la, ásɛ dɛ soŋe andɛɛɡa le he Korowii be tɛ mɛ.”

³³ Ijipt tena la iro che ba nɛɛ ŋɔ, “Hé ɛ warane dɛ́ le ya harɛ nɔ ta.” Ba liiro ŋɔ dɛ ba ta ɡelɛ ba kaa laa, ba bwa ɛɛ serewoo.

³⁴ Anomanta, ba kpɔ men baa wola iisi a ta doe mɔɔ dɛ kpɔ ɛ paanoo do loɡa bini, dɛ kpɔ yale vɔrɔwa dɛ kpɔ chɔŋɛ ba vaama ta.

³⁵ Ba ɛ ɡɛ Mosis aa do ba la, dɛ soŋe Ijipt tena la suuɡapoŋa ne suuɡaswɛm kwa dɛ yale.

³⁶ Korowii ɡelɔ Ijipt tena sie lɛ ba nɛ, dɛ ɡel ba tɛɛ ba komɛlbwa baa soŋ ba la. Anɔ taa a che ba che Ijipt kondɔɔh bwa kaa.

³⁷ Israel tena le Rameses waa lɔ Ijipt harɛ ta dɛ ba Sukot. Baala baa valɛ naa ta la ɡbo ɛɛ ɛ kaɡboŋa lafraanumɛlee. Haahna ne bechale te ta jae.

³⁸ Nɛmpɛɛne warɔ dɛ ja ba nɛɛ kaa. Peera ne boohna dɛ nae kohona bwa ɡe jao.

³⁹ Ba kpɔ men baa ɛa dɛ le ane Ijipt la ɛ paanoo iisi aa wola toole a ta. Dɛkalkɛ baa doŋ ba le bela la, ba ta bɔr dɔe dɛ́ ɛ ba kondikwa bɛlbwa.

⁴⁰ Bene lafraanaarɛ fifraatoroo Israel tena so Ijipt harɛ ta.

⁴¹ A ɡɛ bene lafraanaarɛ fifraatoro nɔ jaɡa taa Korowii nɛra baa lɔ Ijipt harɛ la bwa ir le bela.

⁴² Awola baa le harɛ la ta la ɛ jwaana, asɛ Korowii kpɔ nɔn tɔ ba nɛ dɛ daah ba. Anomanta, benanyoa bɛlbwa chɛ kɛ Israel tena bwa nyiŋi daahna Korowii aa daah ba dɛ kpɔ ba le Ijipt harɛ awola jwaana la kɛrɛdɛ, dɛ́ ɡe so dɛɛ daah dɛ́ kpɔ jirima tɛ Korowii, á chɔ le tɛ ba naanar baa ka ba.

Mmara aa lɔ Galekaa Tɔpejen dii ta

⁴³ Belaa Korowii ŋɔ Mosis ne Arɔn be ŋɔ, “Ŋwɛnɛre haa kpɔ a ta di Galekaa kondikwa laanee nɔ. A ta chɛ kɛŋɔ hɔɔh dia.

⁴⁴ Yom bɛlbwa haa yawɔ ba teŋe o pen la ɛɛ won di,

⁴⁵ kɛ hɔɔh waa baa choɡe tama dɛ kaa, ne nɛn waa ba toma ɛɛ bɔr dɛ́ ba nyin o suuɡa kaa la aa won dia.”

⁴⁶ “Hé dɛ ba a dii yaa, dembeŋkpoŋ taa chɛ kɛŋɔ hé dia, dɛ bɛ ol la bɛlbwa kpɔ le fɔɡ. He bɛ a hoɡa ɡe paɡre.

⁴⁷ Israel tena bwaa chɛ kɛ bá di a ɡɛ tɔpere nɔ.

⁴⁸ Nɛŋhɔɔh bɛlbwa waa baa so he bini dɛ nyin o di Galekaa kondikwaa nɔ Korowii sɔn ta naa, a chɛ kɛŋɔ ó teŋe o bibaala ne baala baa lɔ o dem bwa pena, ásɛ he ne ba bwa ɛ nɛnsiwi beŋkpoŋ mɔɔ dɛ́ won di ane. Bibaa te bɛlbwa baa wola o pen teŋe la ta chɛ kɛŋɔ ó di ane.

⁴⁹ Gɛ mmara nɔ chɔɔ tɛ harɛ nɔ ta bie ne nɛŋhɔɔhra baa soɡe o ta bwa.”

⁵⁰ Asɛ Israel tena la bwa ɛ ɡɛ Korowii aa do Mosis ne Arɔn ŋɔ ba ɛ la.

⁵¹ Awola tɔpere la tentenee Korowii lawɛ o nɛra Israel tena bwa le Ijipt harɛ denaa ta.