Kaala 11 - mzwDBL

Ijipt tena bibanloɡla sewa wa

¹ Asɛ Korowii berɛ ŋɔ Mosis be ŋɔ, “N dɛ ba deŋnetɛra beŋkpoŋ kpɔe ba ta Ijipt kooro la ne o nɛra nɛɛ ja. A habɔɔ la, wɛɛ ɡeloo he kaa. Doŋa kwaraa wɛɛ ba heyaa doŋa.

² Berɛ ɡel Israel tena no kɛŋɔ, ba baala ne haahna bwa soŋe ba bala Ijipt tena suuɡaswɛm ne suuɡapoŋa kwa.”

³ Korowii ɡelɔ Ijipt tena sie lɛ Israel tena la nɛ, asɛ kooro ne o nomonome ne harɛ la ta nɛra bwa kpɔ Mosis ɛ nɛnjen.

⁴ Belaa Mosis ŋɔ Ijipt kooro be ŋɔ, “Kenii Korowii ɛɛ bol, dɛ wɛɛ valɛ harɛ nɔ bwa ta harambaŋaa,

⁵ ásɛ dɛ kpoo Ijipt tena bibanloɡla bwa. Dɛ́ le kooro waa soɡe kara ta bibanloɡle nɛ, dɛ́ ba le yomhaah waa lɔ nam ta bibanloɡle nɛ dɛ nae biloɡla.

⁶ Nɛra ɛɛ dɛɛ dooɡe lɔŋɔree dɛɛ wi kohona harɛ la ta a dɔŋa aa wola chiɡ bwa. A dɔŋa ɡe aa chiɡ kpa bwa.

⁷ Kɛ Israel tena te bini la, nyoate aa nɛn kɛɛ kondɛɛre kwaraa wor. Anee dɛ́ ɡel he jemɛ kɛŋɔ Korowii dɛ nyin o nɛra Israel tena dɛ ɡel ba korɛ Ijipt tena bini.

⁸ He nomonome nɔ bwa ɛɛ berɔɔ ba n be, dɛ́ ba ɡuŋ mɛ dɛ́ ŋɔ ń kaa, n ne n nɛra bwa baa teŋɛ n nɛ. Ásɛ mɔɔ ń kaa.” Belaa Mosis kpɔ bandia kohona le kooro sie kaa.

⁹ Korowii fa bol Mosis be ŋɔ, “Ijipt kooro ɛɛ ɛ deŋnekpeɡii dɛ́ vɛh he be noe, ásɛ n nyokpowaa maa ɛ Ijipt harɛ la do kan.”

¹⁰ Mosis ne Arɔn ɛ nyokpowe-ɛɛla nɔ bwa kooro sie. Korowii ɡelɔ o deŋne ta do kpeɡri o ta ɡelɛ Israel tena la le o harɛ ta kaa.