Kaala 1 - mzwDBL

Israel tena fiiɡa wa

¹ Jekɔb bibaala ne ba haahna ne bii baa ja o nɛɛ dɛ kaa Ijipt harɛ laanee nɔ.

² Rubin ne Simeon ne Lewi dɛ Juda,

³ ne Isaaka ne Sebulon dɛ Bɛnjamen,

⁴ ne Dan ne Naftale ne Gad dɛ Aasa.

⁵ Nɛra baa le Jekɔb luɡe ta nɔ bwa lɔ fifraanuanɛ, kɛ dɛ Josef te soɡe Ijipt harɛ ta.

⁶ Aa ba dɛ la sie la, Josef ne o dɔɔranar ne nimanar ne ba bii la te kapa baa serewe,

⁷ kɛ ba bii baa lola la baa warɛ, dɛ ɡel Israel tena mun ya kohona, dɛ su Ijipt harɛ bwa ta.

⁸ Belaa koofale bɛl waa wola Josef waa jemɛ ba di kara Ijipt harɛ ta.

⁹ Awola bɛl, kooro la iro dɛ ŋɔ o nɛra la be ŋɔ, “Israel tena baa lɔ ya harɛ nɔ ta berɔ dɛɛ warɛ kohona, dɛ́ ba di kpeɡri ya nɛɛ tɔpetooro bɛl.

¹⁰ Hé ɡel ya kpɔ liire ɡɛ yaa ɛ ásɛ ba bɛ won warɛ ya harɛ nɔ ta kohona kpa. Gɛ laa dɛ laa baa chole harɛ nɔ ta naa, baa ja ya dɔma nɛɛ dɛ́ yo yaa dɛ́ chwa le harɛ nɔ ta kaa.”

¹¹ Anomanta, ba le nomonome ba chɔ ba nyoa, dɛ do ba baa ɛ tomkpeɡa. Dɛ ɡel ba do bwɛjena Petɔm ne Rameses, dɛɛ cheɡ kondikwaa a bini dɛɛ tɛ kooro.

¹² Kɛ Ijipt tena la aa dɛ fiɡ ba kohona la, dɛ nae ba ɡe na dɛɛ ya kwara dɛɛ perɛ harɛ la bwa ta. Asɛ Ijipt tena berɛ dɛɛ ɔmɛ Israel tena la kohona.

¹³ Ijipt tena ta ɡelɛ ba sie lɛ ba soɡa bini, ba do ba baa ɛ tomkpeɡa.

¹⁴ Ba ɡelɔ baa teŋe berekese, dɛɛ ma Ijipt tena deene, dɛɛ ɛ ba kooni toma te bwa soo siwi. Ba ta ba nɛɛ sune, ba fiɡ ba taeh.

¹⁵ Dɛ haahna bane lole baa yer ba Sifra ne Pua baa dɛ lɛ Hibru haahna lol. Awola bɛl, Ijipt kooro la ŋɔ ba be ŋɔ,

¹⁶ “Dɛ he dɛ lɛ Hibru haahna lol dɛ na kɛŋɔ bibaalaa yaa, hé kpoo ba, kɛ dɛ bihaahnaa tenaa, hé ɡel ba.”

¹⁷ Haahna la baa dɛ lɛ haahna lol la dɛ ɔmɛ Korowii, anomanta, ba ta ɡɛ Ijipt kooro aa ŋɔ ba be la ta teŋɛ. Ba ɡelɔ bii la do le.

¹⁸ Belaa Ijipt kooro la yer ba dɛ bɔɔ ba ŋɔ, “Ɛrɛɛ hɛɛ ɡel bii la haa wola ban kpoo nɔɔ?”

¹⁹ Anee ba chaŋo dɛ ŋɔ, “Hibru haahna lola aa kpeɡe kɛŋɔ Ijipt haahna. Ba lola aa kpeɡri doe dɛɛ tɛɛ ba. Ba lolɛ ba bii dɛɛ tonɛ mɔɔ ya yon tel bela.”

²⁰ Anomanta, Korowii nyiŋi haahna baa dɛ lɛ haahna lol la nɛ, dɛ ɡel Israel tena mun ya kohona.

²¹ Haahna baa dɛ lɛ lol la aa ɛ ɡɛ nomanta, Korowii ɛɛ ba andɛɛɡa dɛ ɡel ba dɔ bii.

²² Ate, Ijipt kooro la ŋɔ nɛra bwa be ŋɔ, “Bibaa bɛlbwa Hibru te haah naa lolɔ la, hé lɛo dɛ́ kpɔɔ ka ta Nael Moo ta. Kɛ dɛ bihaahnee te naa, hé ɡel ó do le.”