Tɔn Jud Aa Chwera 1 - mzwDBL

¹ Tɔn nɔ le men Jud maa ɛ Yeesu Kristo bonɔɔ dɛ ɛ Jems nime la be. N chwerɔ dɛɛ tɛ he nɛra N Naa Korowii waa bera ɛ ya Mɛɛ la aa dɛ nyin heya, dɛ le heyaa tɛ o te, asɛ Yeesu Kristo ɡee nyin heyaa la.

² Kórowii na he sum kohona, dɛ́ tɛ heyaa bosɔɔhna kohona, dɛ́ cha heyaa hɛɛ nyin dɔŋa kohona.

Nyosonteŋna baa dɛ chaɡle Korowii wa

³ N dandɛɛɡa, n siwi fe swɛɛrɔ mɛɛ nyin kɛ ń chwerɛ heyaa tɔn dɛ baɡle lɛɛ Yeesu aa lɛ n ne he bwa la wa, asɛ n berɛ na kɛŋɔ a chɛ kɛ ń chwerɛ heyaa buɡ nɔ ta dɛ́ do heyaa ɡbemba, ásɛ hɛɛ yo waa yaa dɛ yarada la wa. Korowiirii fa baɡle o nɛra ba wa aa toɡra ɡɛ baa dɛɛ tomɔ. Gɛ waa baɡ ba la aa berɛ bwa.

⁴ Nɛra bane sɔɔh dɛ ba koo he baah haa wola jemɛ. Baa Korowii tomɛ, dɛɛ bol ŋɔ nɛra ɛɛ wonoo dɛɛ ɛ wedoŋa, dɛkalkɛ Korowii dɛ sune nɛra nɛ. Ba dɛ ɛ ɡɛ ásɛ dɛ fe dɔ bɔr che dɛ́ɛ ɛ wedoŋa baa dɛ nyin. A ɡɛ nɛra nɔ vɛh ya Nomoa beŋkpoŋ Yeesu Kristo waa dɔ yaa la kɛŋɔ ba Dɔɔree on. Saŋ la bwaa Korowii Tɔn baɡle ɡɛ Korowii aa pa ba bolchɔɡe dɛɛ ba ba deŋne tɛra.

⁵ N jemɔ kɛŋɔ he jemɔ, kɛ n dɛ nyin kɛ n lii heyaa ɡɛ Korowii fa aa lɛ Israel tena le Ijipt tena nɔn ta, asɛ a habɔɔ bane aa wola o waa yaradae, o kpoo ba la.

⁶ Nyundua toroma ɡe aa wola ɡelɛ bela Korowii aa tɛɛ ba ŋɔ bá di kpeɡri maɡre ba ne, dɛ́ le ba dobɔr la, ó tɔ ba do biro ta, dɛ́ do ba jɔɡrɔre waa wola ban foo ta bwa, dɛ́ ka tel kɛŋɔ o tɔpejen waa dɛ ba nɛra waa bola dɛ́ pa bole la.

⁷ Gɛɛ Sodom ne Gomoora tena ne bwɛɛre a fa aa lɔ ba jwɛɛh la tena, ɡe fa aa chɔ dɔŋa baa ne haah ŋwɛnɛdoŋ ta, aa wola were ne bola, dɛɛ chɔɡ ba te. Baa ɛ ɡɛ la, Korowii ɡelɔ nii le ba nɛ, ásɛ nɛra bwa na dɛ́ jemɛ kɛŋɔ Korowii dɛ tɛr wechɔɡ-ɛɛ deŋne nii aa wola dime bwa ne.

⁸ Gɛ a saŋ la tena fa aa ɛa Korowii hah ba la, ɡɛɛ nɛnchɔɡa baa lɔ he baah nɔ che ba deera baa dɛ dee ta, dɛɛ ɛ wedoŋa ba bwadabii ne, dɛ vɛh Korowii ɔma, dɛɛ ɛ nyundua toroma nɛnhɛlwa.

⁹ Nyundua toroma bwa nomoa Maekel ɡba ta a dɔŋa ɛɛ bwa. O ne Bɔnsam aa dɛ yo dɛɛ tɔŋle dɔŋa Mosis lale waa dɛ́ jemɛ ba bini onɔ la waa dɔɔ la, Maekel kwaraa ta liire kɛ ó bol Bɔnsam wobochɔɡe. O waa waa bola bwaa kɛŋɔ, “Korowiirii dɛ́ dii kasinteŋ.”

¹⁰ Waa nɛra nɔ aa wola a mun jemɛ la, wobochɔɡaa ba bol dɛɛ yaɡa. Ba ne ola bwa beŋkpoŋ, dɛkalkɛ ola ta liire dɔe. Waa aa ɛ á bwara sɔɔhna la, anee aa ɛ. Gɛɛ ba ɡe do. An ɡee dɛɛ chɔɡ ba.

¹¹ Bá bwɛɛlɛ! Ba teŋɛ Keen ŋwɛnɛchɔɡe la ta. Ba koh suuɡanyin waa dɛ kpɔ ba te jo wechɔɡa Balam fa aa ɛa la ta. Ba dɛ vuuɡi Korowii kɛŋɔ Kora fa aa dɛ ɛ la. Korowii ɛɛ chɔɡ baa kɛŋɔ waa chɔɡ Kora la ken.

¹² He yon cheme dɛ pɛ dɛɛ di kondikwaa aa dɛ baɡle beŋkpoŋri ɛɛ haa dɔa he Dɔɔ tom nɔ ta la, a ɡɛ nɛra la lɔ he baah kɛŋɔ doŋa dɛɛ chɔɡ he wer. Ba ta sihiih dɔe. Ba ɡbo waa baa dawɛ, baa nɛra waa dawɛ. Ba waa ta hwɛɡa dɔe kɛŋɔ baama peu aa dɛ kaa a ne aa wola bwaala nee ne ba la. Ba do kɛŋɔ daa aa wola won a nɔna saŋ nɔnɛ, asɛ ba chuɡra ta a den serewe kwaraa la.

¹³ Ba do kɛ mpo nehɛma a nyoa aa kpeɡa kohona ken. Gɛ a yon dɛɛ vuuɡi, a fufuɡ doŋa ɛɛ le baŋ la, ɡɛɛ baa vuuɡi wa, ásɛ ba sihihwa ɛɛ le baŋ. Ba do kɛ weweela aa wola chebɔr beŋkpoŋ dɔe, baa wola hwɛɡa kpɔe dɛɛ do a nɛɛ dɛɛ valɛ jwaana la. Biro kpirikpirii Korowii kwaa ba cheɡ bá ka do bela saŋ bɛlbwa.

¹⁴ Adam natɛɛ ɡe naa Enɔk fa na ba waa dɛ bol ba waa ŋɔ, “N Dɔɔ ɛɛ ba o nyundua toromedɛɛɡa kaɡboŋa nee,

¹⁵ dɛ́ ba bol nɛra bwa waa dɛ́ pa bole. Wɛɛ pa ba bolchɔɡe ba wechɔɡa baa ɛa dɛ vɛh Korowii waa ta teŋa la waa, dɛ́ pa nɛra baa wola Korowii tomɛ bolchɔɡe ba nɛnhɛlwobochɔɡa baa bola dɛɛ yaɡɔ la wa.”

¹⁶ Gɛ nɛra nɔ, saŋ bɛlbwaa baa naɡre wa, wa aa ba siwi su. Wedoŋa ba sie aa dɛ lɛ a ta laanee baa ɛ. Ba dɛ ta nyoa. Kwaane dɔe dɛ le nɛra be waa baa bol nɛra wedɛɛɡe.

Wejaala ne webaɡla

¹⁷ N dandɛɛɡa, hɛ́ɛ lii waa ya Dɔɔ Yeesu Kristo toroma la fa aa bol he be la.

¹⁸ Ba ŋɔ he be ŋɔ, “Tɔpera aa ka mun la ta la, nɛra ɛɛ leo dɛɛ mamɛ heya. A ɡɛ nɛra nɔ aa Korowii ɔmɛ. Wedoŋa ba sie aa dɛ lɛ a taa baa ɛ.”

¹⁹ A ɡɛ nɛra nɔɔ ɡela he ne he asɔre tena dɔŋa baah ɛɛ peɡri la. Harɛ bonɔ som lɛ ba liire bwa. Korowii Domadɛɛɡe la toole ba nɛɛ kwaraa.

²⁰ N dandɛɛɡa, hé te swɛɛ siwi dɛ́ɛ cha dɔŋa dɛ́ won che kiŋkiŋ, ásɛ he yarada haa dɔa Yeesu Kristo ŋwɛnɛɡoroŋ nɔ ta la do kan kohona. Hɛ́ɛ soŋe Korowii o Domadɛɛɡe la kpeɡri ne.

²¹ Korowii dɛ nyin heya, anomanta, hɛ́ɛ pɛlo, dɛ́ɛ kpa ya Dɔɔ Yeesu Kristo waa dɛ sune nɛra nɛɛ la, ásɛ o tɛ heyaa mkpa aa wola jaɡa dɔe.

²² Hɛ́ɛ sune nɛra baa dɛ ɛ aahna-aahna Yeesu Kristo waa nɔ ta baa wola an yarada kɛrɛdɛ la nɛ.

²³ Hɛ́ɛ lɛ nɛra baa dɛ ba wechɔɡa ta joe kɛŋɔ baa dɛ to kon dɛ́ le nii ta la. Hɛ́ɛ sune bane ɡe nɛɛ dɛ́ɛ cha ba, kɛ hɛ́ɛ nyiŋi kɛrɛdɛ ásɛ ba wechɔɡa bɛ heyaa ba bu.

Korowii kpɛɛra

²⁴ Korowii waa wona dɔ kpeɡri dɛ lawɛ heyaa haa wola chole, dɛ laa he doŋa bwa kpɔ he nɛ, dɛ ɡel he dɔ silɛɛ dɛ che o sie dɛ na o jirima la,

²⁵ o ɡboo Korowii ne ya Lɛɛ, ya Dɔɔ Yeesu Kristo nomanta. O chɛ jirima. O dɔŋ toole. Onee dɔ komɛlbwa kpeɡri, dɛ ɛ komɛlbwa Dɔɔ dɛ le saŋ la bwa ba le fini, dɛ dɔ a bwa saŋ bɛlbwa! Aamen.