Josua 9 - mzwDBL

Gebeɔn tena neɡra baa neɡre Josua

¹ Koranar baa lɔ Jɔɔdan Moo wee cholibɔr no ɡɛ Josua ne Israel tena aa dɛ pɔ nɛra nɛ, banɔ la baa lɔ deŋɡarere ta ne banɔ la baa lɔ deŋɡarere harɛbɔr wee cholibɔr, ne banɔ la baa lɔ Mɛdetereenea Mpo nyoa bwa, dɛ kpoŋe kaa weekaŋle nyundua Lɛbanɔn harɛ ta. A ɡɛ koranar laanee, Hiti ne Amɔre ne Keenan ne Pɛrɛs ne Hivi dɛ Jebus tena koranar.

² A ɡɛ koranar nɔ bwa pɛo dɛ vɔrɔwe kɛŋɔ bá yo Josua ne Israel tena.

³ Gebeɔn tena aa no ɡɛ Josua ne Israel tena aa ɛ bwɛjena Jeriko ne Ai la,

⁴ ba kpɔ neɡra ŋwɛnɛ ta dɛ dɔ ba nyu. Ba nyin bɔɡtɔ bena do kondikwa, dɛ kpɔ ola tɔmbena dɛ nyarɛ loŋa baa kpɔ sen do a ta dɛ vɔrɔwe choɡ keeɡore.

⁵ Ba kpɔ naŋɡaobena aa kɛɛra baa nyara do, dɛ pa laala jɛɡle do. Dɛ paanoo baa kpoŋa la bwa holɔ dɛ kɔlɔme.

⁶ Belaa nɛra la la Josua ne Israel tena la be bela baa baŋre ba tɛnte deene Gelɡal. Ate, Gebeɔn tena la ka ŋɔ ba be ŋɔ, “Ya le bojaŋ harɛ bɛl ta, ya dɛ nyin kɛ ya ne he fɔwɛ darame fɔo.”

⁷ Anee Israel tena la ŋɔ ba be ŋɔ, “Ɛrɛɛ ya ne hɛɛ ba wona fɔwɛ fɔo a maɡre ɔ? He ken ka soɡe ya jwɛɛh bonɔ tenten.”

⁸ Anee Gebeɔn tena la chaŋe ŋɔ, “Kɛ he bonɔɔnaa yaa ɔ?” Asɛ Josua bɔɔ ba ŋɔ, “Nɛmbesooree heya ɔ? Leperaa he leɔ?”

⁹ Ba ŋɔ, “Bojaŋ harɛ bɛl taa he bonɔɔna le, noe ya no Korowii haa dɛ tomɔ la wa. Ya no wejena waa ɛa Ijipt harɛ ta,

¹⁰ ne ɡɛ waa ɛ Amɔre tena koranar banɛ bane Jɔɔdan Moo la wee leebɔr. Kooro Sihon o fa aa soɡe bwɛjen Hɛsbɔn, ne Kooro Ɔɡ o ɡe fa aa ɛ kooro Basan harɛ ta, dɛ so bwɛjen Astarɔt ta.

¹¹ A waa ya harɛ ta nomonome ne nɛra baa lɔ ya harɛ la ta bwa ŋɔ ya be ŋɔ, ‘Yá kpɔ kondikwa do ya be ya vala la bini, dɛ́ ba bol ya harɛ nɔ waa baɡle heya kɛŋɔ he bonɔɔnaa yan. Ásɛ ya ne he fɔwɛ darame fɔo.’

¹² Hé na ya paanoo, dɛ a wɔrɔbe ya kpɔ do ya bone bini dɛ chiɡ ŋwɛnɛ ta, taraken a holɔ dɛ kɔlɔme.

¹³ Ola tɔne yaa do sen a bini nɔ, dɛ anfalaa, kɛ hé nyiŋi na ɡɛ aa doa taraken, a bwa kɛɛrɔ. Ya laala ne naŋɡaware yaa doa bwa kɛɛrɔ, jaŋne ŋwɛnɛ la aa doa nomanta.”

¹⁴ Josua ne Israel tena ta Korowii bɔɔrɛ no kɛŋɔ ba sɛh ba ne ba fɔwɛ ba fɔo la.

¹⁵ Asɛ Josua ne Gebeɔn tena la fɔwɛ darame fɔo kɛŋɔ waa ban kpoo, asɛ Israel nomonome la ɡe ŋwɛɛ ntam dawɛ waa la ta.

¹⁶ Fɔo la tɔpetooro wee la, Israel tena la noɔ kɛŋɔ nɛra la ta bojaŋ bobɛlbwa leɛ, ba lɔ ba jwɛɛh tenten.

¹⁷ Belaa Israel tena la ir chiɡ ŋwɛnɛ ta dɛɛ kaa nɛra la be, tɔpera atoroo ba kpɔ jo ba bwɛjena la ta. Bwɛjena laanee Gebeɔn ne Kefira ne Beɛrɔt dɛ Kiriat Jearim.

¹⁸ Israel tena la ta ban kpoorɛ, dɛkalkɛŋɔ dɛ ba nomonome ne ba fa tɔ sie fɔwɛ darame fɔo Israel tena Korowii baa dɛ tomɔ sɔn ta. Dɛ Israel tena la dɛ naɡre ba nomonome la waa kɛŋɔ baa ɛ ɡɛ la.

¹⁹ Anee nomonome la ŋɔ, “Ya ŋwɛɛ Korowii ya Israel tena aa dɛ tomɔ la ntam, anomanta, a ta chɛ kɛŋɔ yá kpɔ nɔn leɡ ba.

²⁰ A chɛ kɛŋɔ yá ɡel ba dɔ ba nyu ntam la wa, ásɛ Korowii baah bɛ ya nɛɛ ba di kɛŋɔ ya to ntam yaa ŋwɛɛra baɡ ba la.”

²¹ Ba berɔ ŋɔ, “Bá so, kɛ baa teŋni daa dɛ che nee dɛɛ tɛ Israel tena bwa.” Asɛ ba no waa nomonome la aa kpɔa baɡ ba nyoa la ta.

²² Ate, Josua yerɛ Gebeɔn tena la bwa cheme dɛ pɛɛ ba ŋɔ, “Ɛrɛ waa he ba neɡre yaa ŋɔ he le bojaŋ, jaah dɛ he le ya mee lɔɡa bonɔ tenten nɔɔ?

²³ A ɡɛ waa haa ɛa nɔ, Korowii taah heya, haa ba he ba dɔ he nyu dɛɛ di pɛɛpɛɛ kpa bwa. Le fini dɛɛ kaa hɛ́ɛ dɛɛ teŋni daa, dɛ́ che nee dɛɛ la Korowii Dea.”

²⁴ Asɛ Gebeɔn tena la ŋɔ Josua be ŋɔ, “Nomoa, yan yaa ɛ he bonɔɔna, ya noɔ kɛŋɔ Korowii aa do o bonɔɔ Mosis ŋɔ ó kpɔ harɛ nɔ bwa tɛ he Israel tena, ásɛ dɛ kpoo nɛra baa soɡe o ta bwa le he sie nomanta, ɔmee lawɛ yaa ɡɛ yaa ɛ dɛ́ dɔ ya nyu, a waa ya ɛ ɡɛ la.

²⁵ Yanee la, ya lɔ he nɔn ta, anɔ la bwa aa wera kɛ hé ɛ yaa la, hé ɛ.”

²⁶ Josua lɛɛ ba Israel tena nɔn ta, ba ta ban kpoorɛ.

²⁷ Le awola tɔpere la ba le fini, ɡɛɛ Gebeɔn tena ɛɛ teŋni daa, dɛ che nee dɛɛ tɛ Israel tena, dɛ kpɔ ane dɛɛ la saraha kon la ta bobɛlbwa Korowii aa baɡ ba.