Josua 8 - mzwDBL

Bwɛjen Ai chɔɡa wa

¹ Korowii berɔ ŋɔ Josua be ŋɔ, “Dɛɛ berɛ ɔma, bɛ ɡel he bwara yɔr. Kpɔ he laa tena bwa dɛ́ ka pu Ai tena yo. N kpɔ ba kooro ne o nɛra ne bwɛjen la dɛ harɛ la bwa do he nɔn ta.

² Gɛ haa chɔɡ Jeriko ne o kooro la, he ka ɛ Ai ɡe ɡɛ. Kɛ laala ne kondɛɛra te, he bɛ an chɔɡ, hɛɛ won kpɔ a te. He ka sɔh bwɛjen la dahara dɛ́ chɔ kpaa ba.”

³ Ate, Josua ne o nɛra kpɔ ba te dɛ kaa Ai dɛ ka yoo ba. Josua kpɔ nɛra kaɡboŋa fifraatoro baa jemɛ laa yoi le Israel tena la bini dɛ tom ba jwaana,

⁴ dɛ ŋɔ ba be ŋɔ, “Hɛ́ɛ no kɛrɛdɛ, hé ka sɔh chɔ bwɛjen la dahare dɛɛ kpa. He bɛ ɡel he ne o baah do jaŋne kohona. Bɛlbwa ɡel o sie chɔ harɛ kɛrɛdɛ.

⁵ N ne banɔ la baa ja n nɛɛ la bwa ɛɛ kpɔ sie pa bwɛjen la taa dɛɛ kaa ba be. Bwɛɛ la baala leɔ dɛɛ ba dɛ ba pu yaa yo, ɡɛ ba fa aa ɛa la aa, yaa berɔɔ dɛɛ chwa.

⁶ Baa chwao ti yaa ka tel kɛŋɔ yaa kpɔ ba le bwɛjen la ta. Baa ŋɔɔ, ‘Israel tena la berɔ chwa dɛɛ kaa ɡɛ ba fa aa ɛa la.’ Dɛ ya baa chwa le ba be tonaa,

⁷ he banɔ la haa kaa sɔh chɔ dɛɛ kpa la ɛ warane, dɛ́ ka lɛ bwɛjen la dɔɔh. Korowii haa dɛ tomɔ la ɛɛ kpɔ bwɛjen laanee do he nɔn ta.

⁸ Hé baa lɛ bwɛjen la tonaa, hé kpaa nii do o ta. Hé no waa maa do heyaa a ta nɔ kɛrɛdɛ.”

⁹ Ate, Josua tɛ laa tena la ŋwɛnɛ ba kaa bela baa sɔah chɔ dɛɛ kpa ɡɛ waa ŋɔa la. Ai wee cholibɔr dɛɛ kaa Bɛtel baah taa ba ka sɔh. Josua ɡe ne laa tena baa kaa la kaa chɔ bela baa baŋre ba tɛnte deene la.

¹⁰ Tɔ aa pera chɔmbibi la, Josua yerɛ o laa tena la cheme, o ne Israel nomonome tɔ ba sie ba valɛ kaa bwɛjen Ai ta.

¹¹ O ne laa tena bwa baa ja o nɛɛ la valɔ dɛ ka tel bwɛjen la doonyojen ta, dɛ baŋre ba tɛnte deene bwɛjen Ai weekaŋle nyunduabɔr, asɛ fɛlembɔjen la chɔ bane bwɛjen Ai baah ta.

¹² Dɛ Josua kpɔ laa tena la dɛ ɛ kaɡboŋa banue ka sɔh ba chɔ dɛɛ kpa Bɛtel ne bwɛjen Ai baah ta, o wee cholibɔr.

¹³ Josua kpɔ laa tena la, bɛlbwa ka che o chebɔr, banɔ la baa wara la lɔ bwɛjen la weekaŋle nyunduabɔr, ba bini tama la ɡe sɔh dɛ chɔ bwɛjen la wee cholibɔr. Josua kaa chɔ fɛlembɔjen la bini awola jwaana la ne.

¹⁴ Bwɛjen Ai kooro aa na Josua laa tena la, kooro ne o bwɛɛ tena la bwa kpɔ ba te dɛ le warane chɔmbibii la ne, dɛ le ka pu Israel tena la yo bobɛl waa lɔ Jɔɔdan Moo Fɛlembɔjen la nyundua. Dɛ o ta jemɛ kɛŋɔ Israel tena sɔɔh chɔ dɛɛ kpa o bwɛɛ la dahare.

¹⁵ Josua ne o nɛra saahnɔ berɛ habɔɔ dɛɛ chwa dɛ ɡel Ai tena ɛɛ doŋ ba, ba chwao dɛ kpɔ sie chaɡɛ pua hɛŋle ɡbo harɛ la ta.

¹⁶ Dɛ bwɛjen Ai nomonome yerɛ baala bwa baa lɔ bwɛɛ la ta ŋɔ bá ba, dɛ́ ba ti Josua ne o nɛra, asɛ ba chwa ti ba. Ba le bwɛɛ la ta kwaraa.

¹⁷ Baa bɛlbwa ta bwɛjen Ai ne Bɛtel kae baa wola leɛ dɛ ti Israel tena. Ba ɡel bwɛjen la o chɔ pɛɛ dɛ ti ba kaa. Baa bɛlbwa toole o ta dɛ́ yo kpa.

¹⁸ Ate, Korowii ŋɔ Josua be ŋɔ, “Tɛr he lampea la pa bwɛjen Ai ta, he nɔn taa mɛɛ ba bwɛɛ la kpɔe dɛ́ do.” Asɛ Josua tɛr o lampea pa Ai.

¹⁹ Josua aa ɛ ɡɛ la, laa tena baa sɔah dɛɛ kpa la leɔ warane dɛ ka jo bwɛjen la ta dɛ lɛ o bwa dɔɔh, dɛ kpaa nii do o ta.

²⁰ Bwɛjen Ai tena la kaa ke nyiŋi dɛ na kɛŋɔ chuu tɛrɔ le ba bwɛjen la ta dɛɛ kaa nyundua, dɛ lee ta kpaɔ. Ba ta bɔr dɔe ba chwa kpɔ. Dɛ Israel tena baa chwaa kaa pua hɛŋle ɡbo harɛ ta la kaa laa berɛ, dɛ kpɔ sie pa Ai tena baa dɛ ti ba la nɛ.

²¹ Josua ne Israel tena la bwaa naa kɛŋɔ laa tena baa kaa sɔh chɔ dɛɛ kpa la kaa lɛ bwɛjen la dɔɔh asɛ chuu tɛr dɛɛ le o ta la, ba laa berɛ dɛɛ kpoo ba.

²² Israel tena ba fa aa kaa sɔh chɔ dɛɛ kpa dɛ jo bwɛɛ la bini la berɔ le ba, dɛ ba cheme bwɛjen Ai tena, asɛ Israel tena do baŋ bɛl, ba tɔ ba do baah ta dɛ kpoo ba bwa, ba bɛlbwa ɡe ta bɔr dɔe dɛ chwa, beŋkpoŋ kwaraa ta kae,

²³ nemenɛ ba kooro ɡbo. O te ba lawɔ ka tɛ Josua.

²⁴ Israel tena aa ti bwɛjen Ai tena dɛ ka kpoo ba kooni ne pua hɛŋle ɡbo harɛ ta tonɛ la, ba berɔ la bwɛjen Ai ta ɡe dɛ ka kpoo nɛra baa ka o bini bwa.

²⁵ Baala ne haahna nɛra kaɡboŋa fi dɛ banɛɛ ba kpoo awola tɔpere, Ai tenaa ba bwa.

²⁶ Josua tɛr o lampea la pa bwɛjen Ai ɡɛ dɛ ka tel kɛŋɔ baa kpoo o ta nɛra bwa tonɛ.

²⁷ Kondɛɛra ne laala aa ka laa la ta te, Israel tena kaa ane, ɡɛ Korowii aa do Josua la.

²⁸ Josua ɡelɔ ba fuh bwɛjen Ai o berɛ dimɡbia, o chɔ ɡɛ ba le fini.

²⁹ O ɡelɔ ba saɡɛ bwɛjen Ai kooro daa ta, ka tel jɔmɔra. Wee aa baa jo la, o ɡelɔ ba fooru dɛ kpɔɔ ka ta Ai doonyojen baa cheɡɛ o ta dɛɛ jo bwɛɛ la ta la. Ba pa bwea dawɛ o nɛɛ a daŋɛ, dɛ ta chɔ bela ba le fini.

Korowii Mmara kura Ebal Bwejen ta

³⁰ Asɛ Josua ma kon baa dɛ ɛ saraha o ta tɛ Korowii Israel tena aa dɛ tomɔ la, Ebal Bwejen ta,

³¹ ɡɛ Korowii bonɔɔ Mosis aa do Israel tena la. Josua ɡelɔ ba ɛ kon baa dɛ ɛ saraha o ta ɡɛ tenten baa chwera do Mosis Mmara Tɔn la bini. Ba ta buni kon kpɔe sɛh bwea la bɛlbwa. Ba ɛ saraha baa dɛ fuah dɛ kpoo kwaa ɛ deŋnesɔɔhna saraha o ta tɛ Korowii.

³² Ebal Bwejen la taa Josua berɛ kwaa chwerɛ Mosis Mmara o fa aa chwera la tenten bwea ta, Israel tena bwa siwi ta.

³³ Dɛ Israel tena bwa, hɔɔhra ne deela, koranar ne nomonome, dɛ ba bini nɛra baa bol waa dɛɛ pa bole bwa kaa che Korowii Ne Nɛwɛnyina Fɔo Daka la baŋne anɛ ta, ba sie chaɡɛ Lewi dea sɔfore baa cheɡɛ daka la. Nɛra la bini bane cheɡɔ ba habɔɔ chaɡɛ Geresim Bwejen la, asɛ ba pera ɡe che ba habɔɔ chaɡɛ Ebal Bwejen la. Ba cheɡɔ ɡɛ Korowii bonɔɔ Mosis aa do ba la, asɛ Korowii ɡel sɔfore la swee andɛɛɡa tɛɛ ba.

³⁴ A habɔɔ la, Josua kure Mmara la bwa baɡ ba, anɔ la Korowii aa swee andɛɛɡa do a ta, ne anɔ la aa ɛ taahna waa bwa. O kura ɡɛ tenten baa chwera la.

³⁵ Wobɛlbwa toole Mosis aa chwera, Josua aa wola an kure. O kure wobɛlbwa kɛrɛdɛ ken dɛ baɡle Israel tena la baa cheme bela la bwa. Haahna ne bechale ne hɔɔhra ba ne baa soɡa bwa.