Josua 7 - mzwDBL

Akan wechɔɡa waa ɛa

¹ Israel tena la ɛ deŋnekpeɡ, dɛ kpɔ kwaa baa lea cheɡ tɛ Korowii waa ŋɔa ba bɛ kpɔ la ta. Baa bɛl baa dɛ yerɔ Akan, o mɛɛ sɔne Kaami. Kaami ɡe mɛɛ sɔne Simri, asɛ o nabaa sɔne Sɛra, o le Juda dea. A ɡɛ Akan nɔɔ kpɔ kwaa baa lea cheɡ tɛ Korowii waa ŋɔa ba bɛ kpɔ la, asɛ a che a ta Korowii baah di ba nɛɛ kohona la.

² Josua tomɛ nɛra bane le bwɛjen Jeriko ŋɔ bá la bwɛjen Ai ta. O bɛne bwɛɛ Bɛt Avɛn, dɛ do Bɛtel wee leebɔr. O ŋɔ baala la be ŋɔ, “Hé la dɛ́ ka sɔh nyiŋi harɛ la.” Ate, ba la dɛ ka sɔh nyiŋi bela.

³ Baa bera ba la, ba ŋɔ Josua be ŋɔ, “Ya bwa laa chɛ kɛŋɔ yá ka pu Ai tena yo, baa kanɛ. Gel nɛra kaɡboŋa banɛ kɛɛ batoro ka yoo ba, ya bwa bɛ koh ta pɛɛ.”

⁴ Ate, baala dɛ ɛ kaɡboŋa batoro la bela, kɛ Ai tena kpeɡri ɡwaa banɛ, asɛ ba laa berɛ.

⁵ Ai tena doŋi Israel tena la le ba bwɛɛ doonyojen ta, dɛ kaa ba ne bobɛl baa dɛ pɛɡre bwea baa yerɔ Sebarem, dɛ kpoo ba nɛra fifraatoro dɛ banumɛl ŋwɛnɛ waa chɔa tu deŋɡare la ta. Israel tena baa ka dem la aa no waa la, ba bwara yɔrɔ taeh, ba sɔɔh kɛŋɔ noo ken.

⁶ Ate, Josua kɛɛ laala waa doa la, dɛ kpɔ sie pi harɛ Korowii Ne Nɛwɛnyina Fɔo Daka la sie, dɛ chɔ bela ka tel jɔmɔra. Israel nomonome la ɡe ɛ ɡɛ, ba ne Josua bwa ɛ teera do ba nyuune ta a baɡle kɛŋɔ ba loo kuu.

⁷ Asɛ Josua ŋɔ, “Nemenɛ Korowii, ɛrɛɛ he le ya ne Jɔɔdan Moo nɔ baŋ bonɔ dɛ ba do Amɔre tena nɔn ta bá kpoo yaa nɔɔ? Ya fe ta soɡe Jɔɔdan Moo la baŋ le fe bɔ.

⁸ Korowii, n ta ɡɛ bwa maa bol nae kpa. Israel tena dɔma teŋɛ ba nɛ ba laa berɛ.

⁹ Keenan tena ne nɛra baa lɔ harɛ la ta bwa ɛɛ no waa nɔɔ, dɛ́ ba bar yaa, dɛ́ kpoo yaa, dɛ́ ɡel ya sɔn nyoɡre harɛ nɔ ta. Ɛrɛɛ nɛra ɛɛ ba ɛɛ dɛ́ jemɛ kɛŋɔ he sɔn kan ɔ?”

¹⁰ Anee Korowii ŋɔ Josua be ŋɔ, “Ir che! Ɛrɛɛ he kpɔ sie pi harɛ ɡɛ nɔɔ?

¹¹ Israel tena ɛ wechɔɡa, ba chɔɡ n ne ba fɔo yaa fɔwa n do ba ŋɔ baa teŋɛ a ta la ta. Ba kpɔ kwaa maa ŋɔa ba le cheɡ tɛ mɛ la ane. Ba ŋwɛa dɛ teŋe nyosone, dɛ paa ja ba laala ta.

¹² Anɔ waa Israel tena aa wola won che ba dɔma sie la. A chɛ kɛ bá sewɛ ba wechɔɡa la wa. Maa he nɛɛ ja kpa, nemenɛ he chɔɡ kwaa maa ŋɔa he le cheɡ tɛ mɛ, a do he be la bwa.

¹³ Ir la nɛra la be, dɛ́ ka sɔ ba doŋa bɛlbwa aa lɔ ba nɛɛ ta. Ŋɔ ba be ŋɔ bá sɔ ba doŋa ta dɛɛ kpa kere. Ŋɔ men Korowii Israel tena aa dɛ tom mɛ la ŋɔ, kwaa maa ŋɔa he le cheɡ mɛ la lɔ he be. Haa won che he dɔma sie dɛ he ta a ne leɛ.

¹⁴ Ŋɔ ba be ŋɔ chɔɔbɔr, denaa bɛlbwa tena ba n sie, dea bɛlbwa men Korowii aa lawɛ la, bá le ba n sie, dɛ́ le denaa ta ba n sie lolanar ta, ásɛ lolanar bɛlbwa nɛra maa lawɛ la, bá ba n sie beŋkpoŋa beŋkpoŋa.

¹⁵ Naate maa lawɔ ŋɔ kwaa maa ŋɔa ba le cheɡ mɛ la lɔ o be la chɛ kɛŋɔ, bá fuh o ne komɛlbwa waa dɔa. O chɔɡ n fɔo n ne baa fɔwa la, dɛ ɛ sihihwa Israel harɛ ta.”

¹⁶ Tɔ aa pera chɔɔ la, Josua ɡelɔ Israel tena la le denaa bɛlbwa tena ba Korowii sie, asɛ a ba kɛŋɔ Juda dea tenaa o lawɛ.

¹⁷ Ate, Juda dea tena le dɛ ba che sie, asɛ Korowii lawɛ Sɛra tena. Asɛ o ɡel Sɛra tena ba o sie lolanar ta, asɛ o lawɛ Simri dem tena.

¹⁸ Asɛ Josua ɡel Simri ne o lolanar le ba che beŋkpoŋa, asɛ Korowii lawɛ Akan, o mɛɛ sɔne Kaami. Kaami mɛɛ sɔne Simri, Simri ɡe mɛɛ sɔne Sɛra, dɛ le Juda dea.

¹⁹ Anee Josua ŋɔ Akan be ŋɔ, “N bie, ɔmɛ Korowii, kpɔ duure tɛ Korowii Israel tena aa dɛ tomɔ la, dɛ́ bol he wechɔɡa haa ɛa la, dɛ bɛ nyosone teŋe. Bol wobɛlbwa haa ɛa, bɛ kpɔ sɔɔh mɛ.”

²⁰ Asɛ Akan ŋɔ, “Kpelaa, n ɛ wechɔɡa dɛ jo Korowii Israel tena aa dɛ tomɔ la nɛ. Waa maa ɛa laanee nɔ.

²¹ Laa la ta la, n na batakaaredɛɛɡe bɛl Babelɔn tena aa sɔɔh, suuɡapoŋa lafraanɛ ne suuɡaswɛm bwe o tɔɡre aa ɛ suuɡapoŋa fifraanue del, asɛ n pɛla lawa kohona n kpɔ. N kpɔ suuɡaswɛm la ne batakaare la ka huɡe harɛ n tɛnte dea bini, asɛ suuɡapoŋa la do mun ta.”

²² Ate, Josua tomɛ toroma Akan tɛnte dea bini, ba kpɔ chwae la dɛ ka na kɛŋɔ o kpɔ kwaa la sɔh o tɛnte dea la bini, asɛ suuɡapoŋa la do a mun ta.

²³ Ba kpɔ kwaa la le tɛnte dea la bini, dɛ kpɔ ba tɛ Josua ne Israel tena la bwa, dɛ kpɔa bil Korowii sie.

²⁴ Ate, Josua ne Israel tena la lawɛ Akan, dɛ kpɔ suuɡapoŋa la ne batakaare la ne suuɡaswɛm bwe, ne o bii bwa ne o nae ne keeɡore ne peera, dɛ o tɛnte Dea ne komɛlbwa waa dɔa bwa, dɛ kpɔ ba ne a bwa kaa Akɔ Fɛlembɔjen bini.

²⁵ Asɛ Josua bɔɔro ŋɔ, “Ɛrɛɛ he tɛ yaa waa ken? Fini he ne Korowii ɛɛ dɔɔ taeh.” Israel tena bwa foɡro bwea dɛ kpoo, dɛ foɡre ba kabora, dɛ pɛ fuh ba bwa.

²⁶ Ba pa bwea dawɛ Akan nɛɛ a daŋɛ kohona, a ta chɔ le ba le fini. Asɛ Korowii baah waa dia kohona la sɔɔh. A waa baa yerɛ bela Akɔ Fɛlembɔjen saŋ la bwa ba le fini la.