Josua 5 - mzwDBL

Pena teŋa Gelɡal

¹ Amɔre tena baa lɔ Jɔɔdan Moo la wee cholibɔr koranar, ne Keenan tena baa lɔ Mɛdetereenea Mpo nyoa koranar aa noa kɛŋɔ Korowii ɡelɔ Jɔɔdan Moo la teŋe, asɛ Israel tena won ɛɡɛ le o baŋ la, ba jum jaoh, ba hwɛɡa bwa tonɛ kɛŋɔ ba ne Israel tena aa won yo.

² A ɡɛ saŋ la, Korowii ŋɔ Josua be ŋɔ, “Gel bá kpɔ kwɛrboɔ loɡɛ keri, dɛ́ teŋni Israel tena baa wola ba pena teŋne la pena.”

³ Asɛ Josua ɛ ɡɛ Korowii aa doo la. O kpɔ kwɛrboɔ loɡɛ keri dɛ teŋni ba pena, bobɛl baa dɛ yerɔ Penteŋ Deŋɡare ta.

⁴ Waa aa bala Josua ɛ ɡɛ waa nɔ laanee nɔ. Gɛ saŋ Israel tena aa ira le Ijipt harɛ ta dɛɛ ba la, ba bini baala baa tela ne laa yoi la kɛrɛdɛ bwa serewe ŋwɛnɛ ta pua hɛŋle ɡbo harɛ ta.

⁵ Banɔ la baa lol ba Ijipt harɛ ta la te, ba teŋni ba pena, kɛ banɔ la baa lol ba ŋwɛnɛ ta la, ba ta ba pena teŋni.

⁶ Israel tena aa le Ijipt harɛ ta la, ba ɡaaɡe pua hɛŋle ɡbo harɛ ta bene fifraanaarɛ, ka tel kɛ baala baa tela ne laa yoi bwa aa serewa. Ba ɛ deŋnekpeɡ ba ta Korowii waa la ta teŋɛ. Dɛ Korowii ŋwɛɛrɔ kɛŋɔ, nomɛlbwa waa wola o waa ta teŋɛ la aa harɛpare ondɛɛɡe o kpɔ baɡɛ ba naawa nyoa la taa tel.

⁷ A ɡɛ baala baa ɛ deŋnekpeɡ nɔ, dɛ ba ta ba bii pena teŋni, ba habɔɔ biirii Josua teŋni pena.

⁸ Josua ɡelɔ ba teŋni nɛra la bwa pena, asɛ dɛ ɡel ba so ba buɡ ta bela ka tel kɛŋɔ ŋwɛra la aa tona.

⁹ Asɛ Korowii ŋɔ Josua be ŋɔ, “N laa yoma haa ɛa Ijipt harɛ ta la sihiih kpɔ he sie ta fini.” Anomanta, ba dɛ yerɛ bela Gelɡal dɛ ba le fini.

¹⁰ Israel tena kaa baŋre ba tɛnte deene dɛ so Gelɡal, o bɛne bwɛjen Jeriko harɛ waa chɔa kaa ta. Dɛ ba dɔ Galekaa Tɔpejen dɛɛ ba dii korobie la tɔpera fi dɛ anaarɛ ta jɔmɔra.

¹¹ Baa di ba tɔpejen la asɛ tɔɔ per awola tenten la, a taa ba di Keenan harɛ ta kondikwa ane soo siwi. Ba di paanoo baa wola iisi a ta doe ne mea baa hala.

¹² Baa dena di Keenan harɛ kondikwaa la habɔɔ, maana ta leere ba dɔ ane di kpa. Harɛ la ta kondikwaa ɡboo baa ka.

¹³ Awola bɛl, Josua ne Israel tena dɛ bɛne bwɛjen Jeriko, asɛ o na baa bɛl o kpoŋe kere dɛ che o sie. Josua la o be dɛ ka pɛɛro ŋɔ, “Ya bini bɛlee hen kɛɛ ya dɔmee hen ɔ?”

¹⁴ Asɛ baa la chaŋe ŋɔ, “N toole a bɛlbwa bini, Korowiirii lee mɛ ŋɔ ń ba tɔ o laa tena sie, asɛ n ba nɔ.” Ate, Josua ɡuŋu dɛ duuru ŋɔ, “N dɔɔ, bɔkwaa hɛɛ nyin kɛ he bonɔɔ ɛ tɛɛ nɔ?”

¹⁵ Anee Korowii laa sitɔɔ la ŋɔ Josua be ŋɔ, “Laa he naŋɡawa foo, bela haa cheɡa nɔ do ɡoroŋ.” Ate, Josua laa o naŋɡawa la foo.