Josua 4 - mzwDBL

Bwea baa paaɡa dɛ kpɔ dɛɛ lii wa

¹ Israel tena la bwa sekwaraa aa ɛɡɛ Jɔɔdan Moo le la, Korowii ŋɔ Josua be ŋɔ,

² “Le baala beŋkpoŋa le Israel deene fi dɛ anɛ la bɛlbwa ta,

³ dɛ́ ŋɔ bá la bela tenten sɔfore la aa cheɡɛ Korowii Fɔo Daka la nenabɔɔ la baah ta, ásɛ bɛlbwa ka kpɔ bwe beŋkpoŋ ka bil bela baa dɛ ba chɔe jwaana nɔ ne.”

⁴ Ate, Josua yerɛ baala waa lee ba le Israel deene fi dɛ anɛ bɛlbwa ta la,

⁵ dɛ ŋɔ ba be ŋɔ “Hé berɛ kaa Jɔɔdan Moo nenabɔɔ la baah ta bela sɔfore la aa cheɡɛ Korowii Ne Nɛwɛnyina Fɔo Daka la sie, ásɛ bɛlbwa ka kpɔ bwe beŋkpoŋ dawɛ o vam á che tɛ Israel deene fi dɛ anɛ la.

⁶ Bwea nɔɔ dɛ́ lii heya waa Korowii aa ɛa tɛ heya. Dɛ kerekere he bii ba dɛ bɔɔ ɡɛ bwea la aa cheɡa tɛ aa,

⁷ ásɛ he ŋɔ ba be ŋɔ, ‘A cheɡɔ dɛ tɛ saŋ bɛl baa kpɔ Korowii Ne Nɛwɛnyina Fɔo Daka la le Jɔɔdan Moo dɛ ba bonɔ la, moo la teŋo ba valɛ o baah harɛpɛɛ ta dɛ le.’ Anomanta, bwea nɔɔ ya Israel tena kpɔ dɛɛ lii ɡɛ waa nɔ á chɔ le saŋ bɛlbwa dɛɛ la.”

⁸ Israel tena ɛ ɡɛ Josua aa do ba ŋɔ ba ɛ la. Dea bɛlbwa kpɔ bwe beŋkpoŋ a ɛ bwea fi dɛ anɛ, dɛ le Jɔɔdan Moo nenabɔɔ la baah ta, dɛ che tɛ Israel deene la bɛlbwa, asɛ ba kpɔ ka bil bela baa soɡa.

⁹ Josua ɡe kaa kpɔ bwefala fi dɛ anɛ Jɔɔdan Moo la nenabɔɔ baah ta, dɛ kpɔ paaɡe bela sɔfore baa cheɡɛ Korowii Ne Nɛwɛnyina Fɔo Daka la fa aa cheɡa la. A ta cheɡɛ bela ba le fini.

¹⁰ Sɔfore baa cheɡɛ Korowii Ne Nɛwɛnyina Fɔo Daka la cheɡɛ Jɔɔdan Moo nenabɔɔ la baah ta ka tel kɛŋɔ, waa Korowii aa do Josua ŋɔ ó ŋɔ Israel tena la be ŋɔ ba ɛ la aa tona, ɡɛ tenten Mosis aa bol Josua be la. Dɛ nɛra la ɛɡɛ Jɔɔdan Moo la le kaa warane.

¹¹ Nɛra la bwa aa lea tonɛ la, sɔfore la ɡe kpɔ Korowii Ne Nɛwɛnyina Fɔo Daka la le ba ka tɔ ba sie ba bwa siwi ta.

¹² Belaa Rubin ne Gad deene dɛ Manasɛ dea la pera tena bane baa tela ne yoi kpɔ ba te, dɛ ka tɔ Israel tena la bwa sie, ɡɛ Mosis aa ŋɔ ba be la.

¹³ Nɛra dɛ ɛ kaɡboŋa fifraanaarɛ baa tela ne yoi kpɔ ba te, dɛ ɛɡɛ Jɔɔdan Moo la le harɛpɛɛ waa chɔa kaa dɛ bɛne bwɛjen Jeriko ta. Dɛ Korowii ja ba nɛ.

¹⁴ Awola Korowii ɛ waa Israel tena bwa siwi ta ba na kɛ Josua ɛ nɛnjen. Ba kpɔ duure tɛo o soɡa bini bwa, ɡɛ tenten baa duu Mosis la.

¹⁵ Sɔfore la taa cheɡɛ Jɔɔdan Moo nenabɔɔ baah ta la, Korowii ŋɔ Josua be ŋɔ,

¹⁶ “Gel sɔfore la baa cheɡɛ Korowii Fɔo Daka la le moo la baah ta ba baŋ.”

¹⁷ Josua ŋɔ sɔfore la be ŋɔ, “Hé le baŋ.”

¹⁸ Ate, sɔfore baa cheɡɛ Korowii Ne Nɛwɛnyina Fɔo Daka la le ba che baŋ. Baa lea ba che moo la nyoa la, buɡ la ta, dɛ nee o fa aa teŋa la berɔ su dɛɛ palɛ kɛ wubwa la.

¹⁹ Korobie waa tɔ sie, o tɔpera fi taa ba le Jɔɔdan Moo la, dɛ ka baŋre ba tɛnte deene Gelɡal. O lɔ bwɛjen Jeriko harɛ jwɛh wee leebɔr.

²⁰ Gelɡal belaa Josua ɡel ba kpɔ bwea fi dɛ anɛ la baa paa le Jɔɔdan Moo nenabɔɔ baah ta la tɛo o kpɔ paaɡe.

²¹ Asɛ dɛ ŋɔ Israel tena la be ja ŋɔ, “Kerekere dɛ he bii ba dɛ bɔɔ heya bwea nɔ mun aa,

²² hé ŋɔ ba be ŋɔ, ‘Harɛpɛɛ taa Israel tena kpɔ ɛɡɛ Jɔɔdan Moo le.’

²³ Hé berɛ ŋɔ ba be ŋɔ, ‘Korowii yaa dɛ tomɔ la ɡelɔ Jɔɔdan Moo teŋe ya won ɛɡɛ le o baŋ ɡɛ waa ɡela Mposwɛm teŋe tɛ ya naawa la.

²⁴ Korowii ɛ ɡɛ waa nɔ ásɛ harɛ nɔ ta nɛra bwa jemɛ kɛŋɔ o kpeɡri kan, ásɛ hɛɛ duu Korowii haa dɛ tomɔ saŋ bɛlbwa.’ ”