Josua 3 - mzwDBL

Israel tena Jɔɔdan Moo ɡala

¹ Ate, tɔ aa pera chɔmbibi la, Josua ne Israel tena la le Sitim dɛ ka so Jɔɔdan Moo nyoa tama mɔɔ dɛ ɛɡɛ le o baŋ.

² Tɔpera atoro habɔɔ la, nomonome la valɛ ba be bela baa soɡa la,

³ dɛ ŋɔ, “He baa na kɛŋɔ Lewi dea tena baa ɛ sɔfore la cheɡɛ Korowii Ne Nɛwɛnyina Fɔo Daka dɛɛ kaa laa, bɛlbwa ir dɛ́ teŋɛ ba nɛ.

⁴ Haa ŋwɛnɛ la ta jemɛ, banee dɛɛ ba he sie tɔe, dɛ́ baɡle heyaa bela haa kpɔ. He bɛ Korowii Ne Nɛwɛnyina Fɔo Daka la dɛɛ bɛne, hé ɡel dɛ ɛ naɡale kaɡboŋa atoro ta he ne o baah ta.”

⁵ Josua ŋɔ Israel tena la be ŋɔ, “Hé laa he te kpɔ doŋa bɛlbwa ta dɛ́ do ɡoroŋ, kere Korowii ɛɛ ɛ nyokpowaa tɛ heya.”

⁶ Tɔ aa pera chɔɔ la, Josua ŋɔ sɔfore la be ŋɔ, “Hé kpɔ Korowii Ne Nɛwɛnyina Fɔo Daka la che, dɛ́ tɔ sie nɛra la teŋɛ.” Asɛ ba kpɔ che dɛ tɔ ba sie.

⁷ Belaa Korowii ŋɔ Josua be ŋɔ, “Finii mɛɛ ba mun pae dɛ́ ɡel Israel tena bwa jemɛ kɛŋɔ henee ba sitɔɔ, ásɛ ba jemɛ kɛrɛdɛ kɛŋɔ n ja he nɛɛ kɛŋɔ n fa aa ja Mosis nɛɛ la.”

⁸ Dɛ berɛ ŋɔ o be ŋɔ, “Ŋɔ sɔfore baa cheɡɛ N Ne Nɛwɛnyina Fɔo Daka la be ŋɔ, ‘Haa dɛɛ jo Jɔɔdan Moo nee la ta la, hé den che bela, dɛ bɛ sie kaa.’ ”

⁹ Anee Josua yerɛ Israel tena la ŋɔ, “Hé ba, dɛ́ ba no waa Korowii haa dɛ tomɔ la aa dɛ bol.

¹⁰ Anɔ taa hɛɛ ba cheɡa, dɛ́ jemɛ kɛŋɔ Korowii waa lole saŋ bɛlbwa la ja he nɛ, dɛ́ doŋi nɛra baa soɡe harɛ waa kpɔa tɛ heyaa ŋɔ hé ka so o ta he sie, baa yer ba Keenan ne Hiti ne Hivi ne Pɛrɛs ne Girɡasi ne Amɔre dɛ Jebus tena la.

¹¹ Hɛɛ nao kɛŋɔ sɔfore baa cheɡɛ Korowii waa dɔ harɛ nɔ bwa, O Ne Nɛwɛnyina Fɔo Daka la aa tɔ he sie dɛɛ ɡale Jɔɔdan Moo la.

¹² Name, hé le nɛmbeŋkpoŋa le ya Israel deene fi dɛ anɛ la bɛlbwa ta.

¹³ Sɔfore baa cheɡɛ Korowii waa dɔ harɛ nɔ bwa Daka la jo moo la ta naa, Korowii ɛɛ ɡeloo ó ɡel pala dɛ́ teŋe.”

¹⁴ Belaa a ba kɛ Israel tena la chuɡro le ba sobɔr bela dɛ ɡale Jɔɔdan Moo la, asɛ sɔfore la kpɔ Korowii Ne Nɛwɛnyina Fɔo Daka la che dɛ tɔ ba sie.

¹⁵ Dɛ koo kwaa koma saŋee, asɛ moo la su halalaa ken. Sɔfore baa cheɡɛ Daka la aa kaa tel nee la nyoa la, ba napaala ne o leɡa dɛ o teŋo,

¹⁶ o nyunduabɔr la tenɛ chɔ kaa kɛŋɔ baa teŋo bio ken. O chɔɔ kaa bojaŋ bwɛjen bɛl baa dɛ yerɔ Adam, o bɛne Saretan. O harɛbɔr pera waa kaa su Yar Mpo ta la hweehrɔ kwaraa, asɛ ba den kpɔ bela ɛɡɛ le, bela ne bwɛjen Jeriko sie chaɡɛ dɔŋa.

¹⁷ Sɔfore baa cheɡɛ Korowii Ne Nɛwɛnyina Fɔo Daka la valɛ harɛpɛɛ ta, Jɔɔdan Moo nenabɔɔ la bini dɛ ka jaɡɛ che, asɛ nɛra la bwa sekwaraa kpɔ harɛpɛɛ la ta ba bɛɡ ba dɛ le o baŋ.