Josua 24 - mzwDBL

Josua bol waa Israel tena be Sɛkem

¹ Josua berɔ yerɛ Israel deene la bwa, ba nomonome la ne nɛra baa bol waa dɛɛ pa bole bwa cheme bwɛjen Sɛkem. Baa tel bela la, o yerɛ ba bwa ka che Korowii sie.

² Asɛ Josua ŋɔ ba be ŋɔ, “Korowii ya Israel tena aa dɛ tomɔ la ŋɔ, ‘A saŋ la, he nabaala fa soɡe Yufretis Moo la baŋ le dɛɛ tomɛ voɡa. Ba bini bɛlee Tɛɛra waa ɛ Abraham ne Neehɔ bwa mɛɛ.

³ Asɛ n lawɛ he nabaa Abraham le Yufretis Moo la baŋ bela, dɛ tɔ o sie ba o ne Keenan harɛ ta, dɛ swee andɛɛɡa tɛo o dɔ naanar warɛ. O lolɛ Aesek,

⁴ asɛ Aesek lolɛ Jekɔb ne Esɔ. N kpɔ Edom deŋɡarere harɛ tɛ Esɔ, asɛ Jekɔb te ne o bibaala kaa Ijipt harɛ ta.

⁵ A habɔɔ la, n tomɛ Mosis ne Arɔn, dɛ ɡel ba kpɔ wahala ta Ijipt tena nɛ, asɛ n lawɛ heyaa le he dɔ he te.

⁶ Maa lawɛ he naawa le Ijipt harɛ la, asɛ Ijipt tena so torɔɡore baa vɔwa pɛl jaɡre ta, ne laa tena baa soɡe jaɡre ta ti ba ka tel Mposwɛm ta.

⁷ Ba wio no men Korowii ŋɔ ń cha ba, asɛ n ɡel bɔr bir ba ne Ijipt tena la baah ta. Anee n ɡel mpo la nee su ba bɔle ba nɛ. He ɡbabir na ɡɛ maa ɛ Ijipt tena la. Asɛ he so pua hɛŋle ɡbo harɛ ta dɛ biɡri taeh.

⁸ N ba he ne Amɔre tena harɛ waa lɔ Jɔɔdan Moo wee leebɔr la ta. He ne ba yoo, asɛ n che he mun ta he pɔ ba nɛ, asɛ he ka kpɔ ba harɛ la ɛ he kapɛrɛ kon.

⁹ Dɛ Sepɔ bibaa Balak di kora Moab harɛ ta ɡɛ saŋ. O kpɔ o te dɛ ka yo Israel tena, dɛ ɡel Beɔ bibaa baa dɛ yerɔ Balam no kɛŋɔ ó ba dɛ́ ba taah heya.

¹⁰ Kɛ n ta sɛɛh o taah heya, n ɡelɔ o swee heyaa andɛɛɡa kohona, dɛ lɛ heyaa le o nɔn ta.

¹¹ Asɛ he le Jɔɔdan Moo la baŋ dɛ ba bwɛjen Jeriko ta. Jeriko tena yo heya, ɡɛɛ Amɔre tena ɡe ne Pɛrɛs ne Keenan ne Hiti ne Girɡasi ne Hivi dɛ Jebus tena ɡe yo heya, kɛ n ɡelɔ he pɔ ba nɛ.

¹² N ɡelɔ jeŋibotoola tɔ he sie dɛ ba doŋ ba, bane Amɔre tena koranar banɛ la. Hɛma ne keri laa he kpɔ yoo ba.

¹³ N tɛ heyaa harɛ haa wola o ta koɛh, dɛ so bwɛjena aa wera haa wola an vɔrɔwɛ ta, dɛ di daa kooni ne ɔleve kooni nɔna haa wola an due.’ ”

¹⁴ Asɛ Josua berɛ ŋɔ Israel tena be ŋɔ, “Hɛ́ɛ ɔmɛ Korowii dɛɛ tomɔ kasinteŋ ne. Hé pa he naawa voɡa baa toma Yufretis Moo la baŋ le ne Ijipt harɛ ta la ta, ásɛ dɛ tomɛ Korowii ɡbo.

¹⁵ Dɛ a ta maɡrɛ he be kɛŋɔ hé tomɛ Korowii aa, amɔ te hé le fini nyin kon haa tomɛ. Dɛ he naawa voɡare baa toma moo la baŋ le kɛɛ Amɔre tena haa soɡe ba harɛ ta taraken nɔ voɡaree yoo. N te ne n dem tena te, yaa tomɛ Korowiirii.”

¹⁶ Anee ba ŋɔ, “Korowii ɛɛ la ane bojaŋ kɛŋɔ ya ɡel o toma, dɛ́ berɛ kaa tomɛ voɡa.

¹⁷ Korowii yaa dɛ tomɔ nɔɔ le ya ne ya naawa le Ijipt harɛ ta, dɛ ya ɛ yoma bela. Ya na nyokpowaa kohona waa ɛa. O kpɔ nɔn tɔ ya nɛɛ ya vala bini bwa, ne harɛre yaa kpɔ a ta bwa.

¹⁸ Onee doŋi harɛre nɛra bwa ya sie, ne Amɔre tena bwa ba fa aa soɡe harɛ nɔ ta la. Ya ɡee tomɔɔ, onee Korowii aa chɛ kɛŋɔ yá tomɛ.”

¹⁹ Ate, Josua ŋɔ nɛra la be ŋɔ, “He ken aa won tomɛ Korowii, o do ɡoroŋ dɛɛ we bwara. Waa he kasinteŋ bɛ dɔe ne he wechɔɡaa kpɔ kɛ heya.

²⁰ He bɛ Korowii toma ɡel, dɛ́ kaa tomɛ harɛre ane voɡa. A lole kɛŋɔ o fa ɛ wedɛɛɡa tɛ heya te, o bandia ɛɛ ir he nɛɛ ó tɛr he deŋne ka tel kɛŋɔ waa chɔɡ heyaa kwaraa.”

²¹ Asɛ Nɛra la bwa ŋɔ Josua be ŋɔ, “Akai! Korowiirii yaa ba toma.”

²² Anee Josua ŋɔ, “Heyaa he ɡbaɡba danseɛ kɛŋɔ haa le Korowii cheɡ ŋɔ onee hɛ́ɛ ba toma nɔ.” Ba ŋɔ, “Ɔɔh, ya ɛ ya ɡbaɡba danseɛ.”

²³ Josua ŋɔ, “Amɔ te hé pa harɛre ane voɡare aa lɔ he be la ta, dɛ́ kpɔ he bambili bwa tɛ Korowii he Israel tena aa dɛ tomɔ la.”

²⁴ Asɛ ba ŋɔ, “Korowii yaa dɛ tomɔ la ɡboo yaa ba toma, dɛ́ɛ teŋɛ waa waa do yaa a ta la ta.”

²⁵ Awola tɔpere la, Josua ne Israel tena la fɔwɛ fɔo Sɛkem bela baa chema la, asɛ o berɛ kpɔ mmarare ane báa dɛɛ teŋɛ a ta tɛɛ ba.

²⁶ Josua chwerɛ ɡɛ waa nɔ do Korowii Mmara tɔn bini, dɛ berɛ kpɔ bwe damanta bɛl pa dajen bɛl mun, Korowii boɡoroŋ la jwɛh.

²⁷ Dɛ ŋɔ ba be ŋɔ, “Hé na, bwe nɔɔ ɛ ya bwa danseɛ, o no wobɛlbwa Korowii aa bol ya be. Wɛɛ ɛ danseɛɛ, dɛ he baa le habɔɔ ŋɔ haa Korowii tomɛ kpa aa, o le heyaa tɛ.”

²⁸ Asɛ Josua ta ba ŋwɛnɛ bɛlbwa kaa ba harɛre ta.

Josua seo wa

²⁹ Anɔ habɔɔ la, Korowii bonɔɔ Josua baa dɛ yerɛ o mɛɛ Nun baa sewɛ. Dɛ o di bene lafa dɛ fi.

³⁰ Ba huɡo o ɡbaɡba harɛ ta Timnat Sera. O lɔ Efrem deŋɡarere ta, dɛ do Gaas Bwejen weekaŋle nyunduabɔr.

³¹ Israel tena la tomɛ Korowii le ɡɛ saŋ Josua ne baa lole bwa. Waa sewa habɔɔ kwaraa la, dɛ ba ta teŋɔ dɛɛ tomɔ, dɛkalkɛ dɛ nomonoma baa ja Josua nɛ dɛ na nyokpowaa Korowii aa ɛa tɛ Israel tena la bwa ta lole.

³² Gɛ saŋ baa le Ijipt harɛ ta dɛɛ ba la, ba kpɔ Josef hoɡa kaa dɛ ka huɡe Sɛkem. Harɛ Jekɔb aa yawa le Sɛkem bibaa Hamɔ bibaala be suuɡapoŋa lafa la ta. Harɛ la baa ɛ Josef naanar kapɛrɛ kon.

³³ Sɔfo Eliasa ɡe baa sewɛ, asɛ ba huɡo bwɛjen Gebea harɛ waa ɛ o bibaa Fenehas kon ta. O lɔ Efrem deŋɡarere harɛ ta.