Josua 23 - mzwDBL

Josua kal Israel nomonome

¹ Korowii baa ɡel Israel tena dɔ ba te ba dɔma nɔn ta biɡri, dɛ Josua hwɛɛhrɔ kɛrɛdɛ,

² anomanta, Josua yerɛ Israel tena, ne nomonome bwa dɛ nɛra baa bol waa dɛɛ pa bole cheme dɛ ŋɔ, “Taraken, n hwɛɛhrɔ kɛrɛdɛ.

³ Hé ɡbabir na ɡɛ Korowii haa dɛ tomɔ la aa koh he waa dɛ ɛ harɛre nɛra ba fa aa soɡe bonɔ. Dɛ on Korowiirii yoa dɛɛ tɛ heya.

⁴ Hé na kɛŋɔ, n kpɔ harɛ aa kaa maa wola yoi lɛ la, ne anɔ la maa yoa lɛ la bwa tɛ he Israel deene kɛ á ɛ he kapɛrɛ kwa. Harɛ la le Jɔɔdan Moo wee leebɔr, dɛ kaa Mɛdetereenea Mpo ta wee cholibɔr.

⁵ Korowii haa dɛ tomɔ la ŋɔ wɛɛ ɡeloo he dɔma chwa le he sie. Wɛɛ doŋ baa tɔ sie, ásɛ he ka kpɔ ba harɛ la ɛ he kapɛrɛ kon. Korowii yaa dɛ tomɔ la ɛɛ teŋɛ nyobaɡa nɔ taa, dɛ́ doŋi harɛre nɛra ba taa ka o ta la.

⁶ Anomanta, hé nyiŋi kɛrɛdɛ dɛ́ɛ teŋɛ waa Mosis aa chwera do Korowii Mmara tɔn la bini la, dɛ bɛ ba koni.

⁷ Hé laa he te kpɔ harɛre nɛra baa kaa he ne ba so nɔ nɛ, he bɛ ba voɡare sɔna dɛɛ yerɛ kɛɛ dɛɛ ŋwɛɛra. He bɛ an tomɛ, he bɛ an ɡuŋi ɡe.

⁸ Hé kpɔ he te pɛl Korowii haa dɛ tomɔ la kiŋkiŋ, ɡɛ haa ɛa dɛ ba le fini nɔ.

⁹ Korowii doŋi harɛre aa kana dɛ do kpeɡri nɛra le he sie, ba le fini bɛlbwa ta wone ba che he sie kpa.

¹⁰ He bini beŋkpoŋ ɛɛ won doŋi kɛɛ dɛ́ pɔ laa tena kaɡboŋ nɛ, dɛkalkɛŋɔ Korowii haa dɛ tomɔ laanee yoa dɛɛ tɛ heya, ɡɛ waa baɡɛ heyaa nyoa la.

¹¹ Anomanta, hé nyiŋi kɛrɛdɛ dɛ́ɛ nyin Korowii haa dɛ tomɔ la wa.

¹² Kɛ dɛ he kpɔ he te ka pɛ ɡɛ nɛra baa kaa he ne ba so nɔ nɛ, dɛ mo ba bihaahna asɛ ba ɡe mo he kwa aa,

¹³ ate he jemɛ kɛrɛdɛ kɛŋɔ Korowii haa dɛ tomɔ la aa he sie tɔ dɛ́ doŋ ba tɛ heyaa kpa. Baa doo kɛŋɔ bela ken dɛ́ tɛ heya, ne chweremi dɛɛ cha he nyaŋ ta, dɛ sɔɔhne aa tɔɡre he sibie, ka tel kɛŋɔ he bwa aa serewa le harɛdɛɛɡe nɔ Korowii haa dɛ tomɔ aa kpɔa tɛ heyaa nɔ ta.”

¹⁴ Josua ŋɔ, “N tɔpere telo kɛŋɔ n sewɛ. Hé bwa jemɛ he bambile ne he liire bwa bini kɛrɛdɛ kɛŋɔ wedɛɛɡa Korowii haa dɛ tomɔ la aa baɡɛ heyaa nyoa la bwa ɛɔ beŋkpoŋ kwaraa ta kae.

¹⁵ Gɛ Korowii aa wona baɡɛ heyaa nyoa a bwa won ɛ nɔ, ɡɛɛ wɛɛ ba wona chɔɡ heya, ka tel kɛŋɔ waa kpoo heyaa le harɛdɛɛɡe nɔ waa kpɔa tɛ heyaa la ta.

¹⁶ Dɛ he koni fɔo he ne Korowii haa dɛ tomɔ la aa fɔwa o do heyaa a ta la, dɛ berɛ kaa tomɛ voɡa dɛɛ ɡuŋa aa, o baah ɛɛ di he nɛɛ kohonaa, ásɛ he serewe le harɛdɛɛɡe waa kpɔa tɛ heyaa nɔ ta.”