Josua 22 - mzwDBL

Rubin ne Gad deene dɛ Manasɛ dea pera dem kaala

¹ Josua yerɛ Rubin ne Gad deene, dɛ Manasɛ dea pera nɛra cheme,

² dɛ ŋɔ ba be ŋɔ, “He ɛ wobɛlbwa Korowii bonɔɔ Mosis aa do heyaa a ta la tonɛ, dɛ berɛ teŋɛ n waa maa do heyaa a ta la ɡe bwa ta.

³ Le saŋ la bwa dɛ ba le fini, he ta he bala Israel tena chae ɡelɛ. He ta waa Korowii haa dɛ tomɔ la bɛlbwa vɛɛh.

⁴ Gɛ Korowii haa dɛ tomɔ aa ɡela he bala la dɔ bosɔɔhna ɡɛ waa baɡɛ nyoa la nomanta, hé berɛ kaa harɛre Korowii bonɔɔ Mosis aa kpɔa tɛ heyaa Jɔɔdan Moo wee leebɔr la ta.

⁵ Hé nyiŋi kɛrɛdɛ dɛ bɛ Mmara Korowii bonɔɔ Mosis aa do heyaa a ta la soh. O ŋɔ hé nyin N Naa Korowii dɛɛ teŋɛ o Mmarare bwa ta, dɛɛ tomɔ he bambile bwa, ne he hweera bwa ne.”

⁶ Asɛ Josua swee ba andɛɛɡa, dɛ ta ba ŋwɛnɛ ba kaa ba sobɔra.

⁷ Dɛ Mosis dɔɔ tɛ Manasɛ dea pera tena la harɛ o do Basan harɛ ta, asɛ ba kabora la, Josua tɛ ba dɔɔranar ne nimanar ɡe harɛ Jɔɔdan Moo wee cholibɔr pera. Josua ta ba ŋwɛnɛ, dɛ swee ba andɛɛɡa baa kaa bela baa soɡa,

⁸ dɛ ŋɔ ba be ŋɔ, “Hé dɔma laala haa paa laa ta la ɡelɔ he ɛ kondɔɔhna kohona. He dɔ kondɛɛra kohona, ne suuɡapoŋa ne suuɡaswɛm ne ayaawa ne bune, dɛ yale pirim. Hé kpɔ a bwa kaa, ásɛ he ne he bala la ka bɔne.”

⁹ Asɛ Rubin ne Gad deene, dɛ Manasɛ dea pera tena la le bela bane Israel tena laa soɡa bwɛjen Silo, o lɔ Keenan harɛ ta, dɛ laa berɛ ba kaa ba ɡbaɡba harɛ ta Gelead, ɡɛ Korowii aa cheɡɛ Mosis nɛɛ dɛ do ba la.

Saraha kon baa ɛo cheɡ Jɔɔdan Moo nyoa

¹⁰ Baa kaa tel Gelilɔt, Keenan harɛ waa lɔ Jɔɔdan Moo nyoa wee cholibɔr pera la, Rubin ne Gad dɛ Manasɛ dea pera deene ma kon baa ɛ saraha o ta tɛ Korowii cheɡ Jɔɔdan Moo nyoa bela, o kan dɛ do wer kɛrɛdɛ.

¹¹ Israel tena kabora la aa noa kɛŋɔ Rubin ne Gad, dɛ Manasɛ dea pera deene la ma kon baa ɛ saraha o ta tɛ Korowii Gelilɔt ba harɛ ta la,

¹² ba bwa chemo Silo bela kɛŋɔ ba la ka puu ba yo.

¹³ Anomanta, Israel tena la tomɛ sɔfo Eliasa bibaa Fenehas a ɡɛ deene la nɛra be, Gelead harɛ ta bela.

¹⁴ Israel tena la le baala fi le dea bɛlbwa ta ja Fenehas nɛ. Ba ɛ nomonnyuune dɛ chɔ dea lolanar nyoo, dɛ le Israel deene kabora la bɛlbwa ta.

¹⁵ Asɛ ba la Gelead harɛ ta bela Rubin ne Gad deene, dɛ Manasɛ dea pera la be ka ŋɔ,

¹⁶ “Ya cheɡɛ Korowii nɛra naa ta dɛɛ bɔɔ heya kɛŋɔ, Ɛrɛɛ he ɛ Korowii Israel tena aa dɛ tomɔ wechɔɡa aa do ken nɔɔ? Ɛrɛɛ hɛɛ ba wona le o habɔɔ dɛ́ ka ma kon baa dɛ ɛ saraha o ta tɛ he te nɔ? He vɛh o nɛɛ teŋa.

¹⁷ Ya wechɔɡa yaa ɛ Korowii Peɔ ɡɛ saŋ yaa lɔ pua hɛŋle ɡbo harɛ ta dɛɛ ɡaaɡe o tɛr ya deŋne la ɡbo ta maɡraa? A lole kɛŋɔ Korowii kpɔ weechɔɡa ba ta ya nɛɛ te, kɛ ya ta charɛ, wechɔɡa la ta lɔ ya nɛɛ dɛ ba le fini.

¹⁸ He laa sie dɛɛ kpɔ Korowii nɛɛ taraken ja aa? He vɛoh fini naa, kere o baah ɛɛ di Israel tena bwa nɛɛ.

¹⁹ Dɛ hé dɛ lii kɛ he harɛ baa kpɔa tɛ heyaa la kah doŋa aa, hé le Jɔɔdan baŋ, dɛ́ ba so harɛ Korowii Tɛnte Dea aa lɔ o ta nɔ. He bɛ sie laa kpɔ Korowii nɛɛ kɛɛ dɛ́ kpɔ yaa berɛ dɔma, dɛ́ ma kon baa dɛ ɛ saraha o ta tɛ he te ja Korowii yaa dɛ tomɔ kon nɔ ta.

²⁰ Hé lii ɡɛ saŋ Sɛra bibaa Akan aa ɛ deŋnekpeɡ kwaa baa lea cheɡ tɛ Korowii la wa. Korowii baah ta Israel tena bwa nɛɛ dii o tɛr ba deŋne aa? Akan ɡbo laa sewa o wechɔɡa wa.”

²¹ Asɛ Rubin ne Gad deene dɛ Manasɛ dea pera la chaŋe ŋɔ,

²² “Ya dɛ soŋe Nemenɛ Korowii waa do kpeɡri, ásɛ o ɛ ya danseɛ, ásɛ Israel tena jemɛ kɛŋɔ saraha kon yaa mao tɛ ya te nɔ ɛ deŋnekpeɡ, kɛɛ dɛ vɛɛh ya vɛoh waa, ó bɛ yaa ɡel fini.

²³ Dɛ ya ɛo deŋnekpeɡ, dɛ ma ya ɡbaɡba saraha kon dɛɛ fuh kwaa o ta, kɛɛ dɛɛ ɛ mea saraha kɛɛ deŋnesɔɔhna saraha o ta naa, Korowii ɡbaɡba tɛr ya deŋne.

²⁴ Ɔmaa ya ɔmɛ dɛ ɛ ɡɛ, dɛkalkɛ kerekere he naanar ɛɛ ba bɔɔ ya naanaree ŋɔ, ‘Bɔkwa waa binii he ne Korowii Israel tena aa dɛ tomɔ doɔ?’

²⁵ Korowii kpɔ Jɔɔdan Moo ɛ ya ne he Rubin dea ne Gad dea jwɛh. He ne Korowii toole wobɛlbwa bini, ásɛ he naanar ba ɡel yá ɡel Korowii toma.

²⁶ A waa ya ŋɔ, ‘Hé ɡel ya pa mun ma saraha kon, kɛ dɛ fuh kwaa dɛɛ ɛ saraha kɛɛ dɛɛ kpoo kwaa o ta waa laa.’

²⁷ Akai! Ya mao kɛŋɔ ó ɛ ya ne heya ne ya naanar baa ka ba la danseɛ kɛŋɔ yaa tomɛ Korowii o Dea la ta, dɛ́ kpɔ saraha kwaa baa fuah ne kwaa baa kpoora ne sarahare dɛɛ ba o sie. Gɛ aa ɛ kerekere he naanar bɛ ba ŋɔ ya naanar ne Korowii toole wobɛlbwa bini.

²⁸ Asɛ ya ŋɔ, ‘Dɛ ba baa bɔɔ ya ne ya naanar aa, yaa ŋɔɔ, “Hé na kon baa dɛ ɛ saraha o ta dɛɛ tɛ Korowii ya naawa aa maa la siwi. Kwaa fuih kɛɛ kwaa kpoora o ta dɛɛ tɛ Korowii waa laa ba mao, kɛ o ɛ ya ne he baah danseɛ kon.” ’

²⁹ Korowii ɛɛ la ane bojaŋ kɛ ya ɛo deŋnekpeɡ dɛ́ vɛh o nɛɛ teŋa, dɛ́ ma saraha kon baa dɛ fuh kwaa dɛɛ tɛo ta, kɛɛ dɛ́ ɛ mea saraha kɛɛ dɛɛ kpoo kwaa o ta, dɛ́ le onɔ la baa mao o che Korowii Tɛnte Dea sie la.”

³⁰ Sɔfo Fenehas ne nomonome fi baa ja o nɛɛ la aa no ɡɛ Rubin ne Gad deene, dɛ Manasɛ dea pera aa ŋɔa la, a do ba som.

³¹ Ate, sɔfo Eliasa bibaa Fenehas ŋɔ ba be ŋɔ, “Ya jemɔ name kɛŋɔ Korowii ja ya nɛɛ fini, he ta he te laa kpɔ Korowii nɛɛ waa nɔ ta, he lɛ Israel tena bwa nyu le tɛra Korowii fe aa tɛr he deŋne la ta.”

³² Belaa sɔfo Eliasa bibaa Fenehas, ne nomonome baa ja o nɛɛ la le Gelead harɛ bela baa cheme Rubin ne Gad deene dɛ Manasɛ dea tena la, dɛ ba Keenan harɛ ta dɛ ba bol Israel tena la be.

³³ Israel tena kabora aa no waa la la, ba sie lɛo dɛ kpɛɛ Korowii. Ba ta berɛ lii kɛŋɔ baa vɔrɔwe laa, dɛ́ ka chɔɡ harɛ Rubin ne Gad deene aa soɡe o ta laanee kpa.

³⁴ Asɛ Rubin ne Gad deene tena ŋɔ, “Saraha kon nɔ ɛ danseɛ tɛ ya bwa kɛŋɔ Korowiirii ya dɔɔ.” Asɛ dɛ pa o sɔn “Danseɛ.”