Josua 21 - mzwDBL

Lewi dea tena bwɛjena

¹ Lewi dea lolanar nomonome la sɔfo Eliasa ne Nun bibaa Josua, dɛ Israel deene la lolanar nomonome kar be

² dɛ ka ŋɔ, “Korowii cheɡɛ Mosis nɛɛ dɛ ŋɔ hé tɛ yaa bwɛjena ya so, ne bɔra ya kondɛɛra aa dɛɛ di.” Gɛ saŋee Israel tena la bwa baŋre ba tɛnte deene, dɛ ta so Silo waa lɔ Keenan harɛ ta bela la.

³ Anomanta, Israel tena la tɛ Lewi dea tena la bwɛjena ane, ne ba kondɛɛra dibɔra, dɛ le ba harɛre ta, ɡɛ Korowii aa ŋɔa la.

⁴ Kohat dea tena lolanar baa le Lewi deaa ba tɔ sie tɛ bwɛɛre. Asɛ Lewi dea tena baa le sɔfo Arɔn luɡe ta ɡe, ba tɛɛ ba bwɛjena fi dɛ atoro dɛ le Juda ne Simeon dɛ Bɛnjamen deene harɛre ta.

⁵ Kohat dea lolanar bane baa kaa ɡe dɔ bwɛjena fi dɛ le Efrem ne Dan deene dɛ Manasɛ dea pera harɛ ta.

⁶ Gɛsɔn dea lolanar ɡe, ba tɛɛ ba bwɛjena fi dɛ atoro dɛ le Isaaka ne Aasa ne Naftale deene dɛ Manasɛ dea pera harɛ waa lɔ Basan harɛ ta.

⁷ Merari dea lolanar ɡe, ba tɛɛ ba bwɛjena fi dɛ anɛ dɛ le Rubin ne Gad dɛ Sebulon deene harɛre ta.

⁸ Gɛɛ a do Israel tena la bɔne bwɛjena ne kondɛɛra dibɔra tɛ Lewi dea tena la, ɡɛ Korowii aa cheɡɛ Mosis nɛɛ bol ba be la.

⁹ Bwɛjena ane aa le Juda ne Simeon deene harɛre ta ba kpɔ tɛ Lewi dea tena laanee,

¹⁰ a ɡɛ bwɛjena baa kpɔa tɛ Kohat dea lolanar baa le Arɔn luɡe ta, dɛ le Lewi dea bini la, banee ba tɔ sie tɛ.

¹¹ Bwɛjen Kiriat Aaba waa lɔ Juda dea deŋɡarere harɛ ta, ne ba kondɛɛra dibɔraa Israel tena kpɔ tɛɛ ba. Anak nabaa sɔne Aaba.

¹² Bwɛjen la harɛpare ne o bwɛjeɡre te, dɛ ba kpɔɔ tɛ Jefune bibaa Kaleb o ɛ o kapɛrɛ kon.

¹³ Bwɛjen Hɛbrɔn habɔɔ la, o ɛ bwɛɛ baa lea cheɡ dɛ nɛn kpo o dɔŋ aa, ó chwa ka so o ta dɛ dɔ o nyu, Arɔn waa ɛ sɔfo naanar bwɛjena baa tɛɛ ba teŋa nɔ, Lebna

¹⁴ ne Jatir dɛ Ɛstemoa,

¹⁵ ne Holon dɛ Debir,

¹⁶ ne Ain ne Juta dɛ Bɛt Sɛmɛs. A lɔ bwɛjena anuanaarɛ, a bwa ne a kondɛɛra dibɔra dɛ le Juda ne Simeon deene harɛre ta.

¹⁷ Bɛnjamen dea harɛ ta ɡe, bwɛjena baa kpɔa tɛɛ ba laanee, Gebeɔn ne Geba,

¹⁸ ne Anatɔt ne Almɔn, dɛ a kondɛɛra dibɔra. A lɔ bwɛjena anaarɛ.

¹⁹ Arɔn naanar baa ɛ sɔfore bwɛjena baa kpɔa tɛɛ ba la lɔ fi dɛ atoro, ane a kondɛɛra dibɔra.

²⁰ Kohat dea tena lolanar kabora baa le Lewi dea la, ba dɔ bwɛjena ane le Efrem dea harɛ ta.

²¹ Bwɛjena anaarɛɛ ba kpɔ tɛɛ ba. Anee Sɛkem ne o kondɛɛra dibɔra waa lɔ Efrem deŋɡarere harɛ ta. O ɛ bwɛɛ dɛ nɛn kpo o dɔŋ aa, ó chwa ka so o ta, dɛ́ dɔ o nyu. Bwɛɛre la ane ɡee, Gɛsa,

²² ne Kebsaim ne Bɛt Hɔrɔn, dɛ a kondɛɛra dibɔra.

²³ Dan dea harɛ ta ɡe, ba dɔ Ɛlteke ne Gebɛtɔn,

²⁴ ne Aejalɔn ne Gat Remɔn, dɛ ba kondɛɛra dibɔra.

²⁵ Manasɛ dea pera tena ɡe dɔ Taanak ne Gat Remɔn, dɛ ba kondɛɛra dibɔra. A lɔ bwɛjena anɛ.

²⁶ A ɡɛ bwɛjena la ne a kondɛɛra dibɔra la, Kohat dea lolanar kaboraa ba kpɔ tɛ.

²⁷ Gɛsɔn tena lolanar baa le Lewi dea la, ba tɛɛ ba bwɛjena anɛ. Manasɛ dea pera harɛ ta la, Golan ɛ bwɛɛ dɛ nɛn kpo o dɔŋ aa, ó chwa ka so o ta, dɛ́ dɔ o nyu. O lɔ Basan harɛ ta, bɛl ɡee Be Ɛstɛra, dɛ a kondɛɛra dibɔra.

²⁸ Isaaka dea ɡe harɛ ta, Gɛrsɔn dea lolanar dɔ Keseɔn ne Daberat,

²⁹ ne Jaamut dɛ Ɛn Ganim. A lɔ bwɛjena anaarɛ, a ne a kondɛɛra dibɔra.

³⁰ Ba berɔ dɔ bwɛjena ane le Aasa dea ɡe harɛ ta, anee Misal ne Abdɔn,

³¹ ne Hɛlkat dɛ Rehob. A lɔ bwɛjena anaarɛ, a ne a kondɛɛra dibɔra.

³² Naftale dea harɛ ta ɡe, bwɛjena baa dɔa laanee Kedes, o ɛ bwɛɛ dɛ nɛn kpo o dɔŋ aa, ó chwa ka so o ta, dɛ́ dɔ o nyu, o lɔ Galilia harɛ ta, ne Hamɔt Dɔr ne Kaatan. A lɔ bwɛjena atoro, ne a kondɛɛra dibɔra.

³³ Gɛsɔn dea lolanar bwɛjena baa dɔa lɔ fi dɛ atoro, a ne a kondɛɛra dibɔra.

³⁴ Merari dea lolanar kabora ɡe bwɛjena baa dɔa dɛ le Sebulon dea harɛ ta laanee, Jokneam ne Kaata,

³⁵ ne Dimna dɛ Nahalal. A lɔ bwɛjena anaarɛ, a ne a kondɛɛra dibɔra.

³⁶ Ba berɔ dɔ bwɛjena ane le Rubin dea tena ɡe be. Anee Bɛsa ne Jahas,

³⁷ ne Kedemɔt dɛ Mɛfaat. A lɔ bwɛjena anaarɛ, a ne a kondɛɛra dibɔra.

³⁸ Ba berɔ dɔ bwɛjena ane le Gad dea. Anee Ramɔt, o ɛ bwɛɛ dɛ nɛn kpo o dɔŋ aa, ó chwa ka so o ta, dɛ́ dɔ o nyu, o lɔ Gelead harɛ ta, ne Mahanaim,

³⁹ ne Hɛsbɔn dɛ Jasa. A lɔ bwɛjena anaarɛ, a ne a kondɛɛra dibɔra.

⁴⁰ Lewi dea kabora, baa ɛ Merari dea lolanar bwɛjena baa dɔa lɔ fi dɛ anɛ.

⁴¹ Lewi dea tena bwɛjena baa kpɔa tɛɛ ba Israel harɛ ta bwa lɔ fifraanaarɛ dɛ anuatoro, a ne a kondɛɛra dibɔra.

⁴² A ɡɛ bwɛjena nɔ bɛlbwa dɔ kondɛɛra dibɔra a baro cheme, dɛ a ɛ kasinteŋ ɡe.

Korowii teŋɛ o nyobaɡa ta

⁴³ Gɛɛ a do Korowii kpɔ harɛ waa baɡɛ Israel tena nyoa ŋɔ, wɛɛ kpɔɔ tɛ ba naawa la tɛɛ ba, asɛ ba ka kpɔ o ɛ ba kapɛrɛ kon dɛ so o ta.

⁴⁴ Korowii ɡelɔ ba dɔ deŋnesɔɔhna ɡɛ waa baɡɛ ba naawa nyoa la. Ba dɔma bɛlbwa ta wone che ba sie, dɛkalkɛŋɔ Korowii cha ba ba won dɛɛ pɔ ba dɔma bwa nɛ.

⁴⁵ Korowii ta nyoa waa baɡɛ Israel tena la bɛlbwa tae, o teŋɛ a bwa ta.