Josua 20 - mzwDBL

Bwɛjena nɛra aa ka so a ta dɛ́ dɔ ba nyu

¹ Korowii ŋɔ Josua be ŋɔ,

² “Ŋɔ Israel tena be ŋɔ bá le bwɛjena nɛra aa chwa ka so a ta, dɛ́ dɔ ba nyu cheɡ, ɡɛ maa cheɡɛ Mosis nɛɛ dɛ bol he be la,

³ ásɛ nomɛlbwa waa wola saahnɛ dɛ kpo o dɔŋ la chwa ka so bela, dɛ́ lɛ o nyu le nɛn waa sewa la nɛn bɛl waa dɛ nyin dɛ kpoo bɔ kem la nɔn ta.

⁴ Dɛ naate chwao dɛɛ kaa bwɛjena la bɛlbwa ta naa, ó ka che o doonyoa, dɛ́ bol ɡɛ waa ɛa baɡle bwɛjena la nomonome, mɔɔ ba den lɛo dɛ́ tɛo bɔr o ne ba so.

⁵ Naate waa dɛ nyin dɛ́ kpoo bɔ kem la tiu la bela aa, bwɛjen la tena bɛ nɛn baa lɛo so la le tɛo, saahna waa wola saahnɛ dɛ kpo o dɔŋ la wa.

⁶ Bwɛɛ la tena ɡel ó so bela ka tel kɛŋɔ baa cheme, dɛ́ nyiŋi naate waa kpo nɛn dɛ chwa ba ba be la waa bini. Sɔfo nomoa waa soɡe le ɡɛ saŋ la ɡe chɛ kɛ ó sewɛ mɔɔ naate waa kpo nɛn la won dɔ bɔr kaa bwɛɛ waa le o ta ba.”

⁷ Asɛ Israel tena la le bwɛjen Kedes waa lɔ Galilia harɛ dɛ do Naftale dea deŋɡarere ta. Dɛ le bwɛjen Sɛkem waa lɔ Efrem dea tena harɛ deŋɡarere ta, dɛ bwɛjen Kiriat Aaba, o do Juda dea tena harɛ deŋɡarere ta.

⁸ Jɔɔdan Moo wee leebɔr pera, deŋɡarere dor harɛ waa chɔa kaa bwɛjen Jeriko wee leebɔr ɡe, ba le bwɛjen Bɛsa waa lɔ Rubin dea harɛ ta ne bwɛjen Ramɔt waa lɔ Gelead harɛ, o lɔ Gad dea tena harɛ ta, dɛ bwɛjen Golan waa lɔ Basan harɛ, o ɡe aa lɔ Manasɛ dea tena harɛ ta.

⁹ Gɛ bwɛjena nɔɔ Korowii che Mosis nɛɛ ŋɔ Israel tena be ŋɔ bá le cheɡ, ásɛ dɛ ba bini bɛlbwa kɛɛ hɔɔh bɛlbwa waa soɡe ba bini ta saahnɛ kpo nɛn baa nyinu dɛ́ kpo aa, ó chwa ka so a ta. Asɛ naate waa dɛ nyinu dɛ́ kpo bɔ kem la bɛ on kpo, dɛ́ ka tel kɛŋɔ ɡɛ bwɛjen waa chwaa ka so o ta la tena bwaa chema, dɛ́ nyiŋi naate waa kpo nɛn la waa bini mɔɔ.