Josua 18 - mzwDBL

Josua harɛ la kabora bɔna

¹ Israel tena aa yo harɛ la tonɛ la, ba bwa kaa cheme bwɛjen Silo ta, belaa sɔfore la ne ba bala baŋre Korowii Dea Cheremibɔr,

² kɛ dɛ a ta ka Israel deene anuanɛ nɛra baa wola harɛre dɔe a ɛ ba kapɛrɛ kwaa mɔɔ.

³ Asɛ Josua pɛɛ Israel tena la ŋɔ, “Saŋ besoo hɛɛ nyin kɛŋɔ he so ka tel mɔɔ, dɛ́ ta ka lɛ harɛ Korowii he naawa aa tomɔ la aa kpɔa tɛ heyaa laɔ?

⁴ Hé le nɛra batoro le dea bɛlbwa ta ba tɛ mɛ, ásɛ n tom ba bá ka ɡaaɡe harɛ la ta, dɛ́ nyiŋi bela baa dɛ nyin dɛ́ chwerɛ o wa, ɡɛ bɛlbwa kapɛrɛ kon aa doa, ásɛ dɛ berɛ ba n be.

⁵ Hé bɔne harɛ la bini bɔre anuanɛ tɛɛ ba. Juda dea tena so ba harɛ ta weekaŋle harɛbɔr, ásɛ Josef naanar ɡe so ba harɛ ta weekaŋle nyunduabɔr.

⁶ Hé chwerɛ harɛ la bɔre anuanɛ la bɛlbwa waa tonaa, hé kpɔ ba tɛ mɛ. Ásɛ n bil daa Korowii yaa dɛ tomɔ la sie tɛ heya.

⁷ Lewi dea tena te aa harɛ la peraa dɔ he bini, ba kapɛrɛɛ kɛŋɔ ba ɛ Korowii sɔfore dɛɛ di a ta. Dɛ Gad ne Rubin deene dɛ Manasɛ dea pera tena te dɔ ba harɛre a ɛ ba kapɛrɛ kwa Jɔɔdan Moo wee leebɔr bela wubwa. Korowii bonɔɔ Mosis bɔna tɛɛ ba.”

⁸ Ate, nɛra la chiɡ ŋwɛnɛ ta dɛ kaa harɛ la ta ɡɛ Josua aa do ba la. Mɔɔ baa kaa la, o dalawe waa la ta ja ŋɔ, “Hé ka ɡaaɡe harɛ la ta, dɛ́ chwerɛ ɡɛ o waa aa doa ba tɛ mɛ, ásɛ n bil daa Korowii sie Silo bonɔ tɛ heya.”

⁹ Asɛ nɛra la kaa, dɛ ka ɡaaɡe harɛ la bwa ta, dɛ chwerɛ wobɛlbwa ɡɛ báa bɔne bwɛɛ bɛlbwa waa lɔ o ta bele anuanɛ, dɛ berɛ ba Josua be Silo bela baa baŋre ba tɛnte deene la.

¹⁰ Ate, o bil daa Korowii sie Silo bela tɛɛ ba, asɛ dɛ bɔne harɛ la tɛ Israel deene aa kaa la.

Bɛnjamen dea tena harɛ baa dɔa

¹¹ Bɛnjamen dea lolanaree tɔ sie dɔ ba harɛ. O chɔ Juda dea tena harɛ ne Josef naanar harɛ baah ta.

¹² Bɛnjamen dea harɛ la jwɛh pa mun le Jɔɔdan Moo weekaŋle nyundua, dɛ kaa Jeriko weekaŋle nyunduabɔr deŋɡarere harɛ ta, dɛ ba jaɡɛ Bɛt Avɛn pua hɛŋle ɡbo harɛ ta.

¹³ Ba jwɛh la berɔ kpɔ bwɛjen Lus, weekaŋle harɛbɔr, dɛ wili kaa Atarɔt Adaa, deŋɡare bɛl ta Bɛt Hɔrɔn harɛbɔr.

¹⁴ Jwɛh la berɔ kpɔ bobɛl dɛ ba kpɔ bwe la wee cholibɔr, dɛ berɛ kpɔ weekaŋle harɛbɔr dɛ kaa Kiriat Baal, waa ɛ Juda dea tena harɛ ta. Ba jwɛh waa lɔ wee cholibɔr laanee la.

¹⁵ O weekaŋle harɛbɔr jwɛh ɡe kpɔ bwɛjen Kiriat Jearim dahare wee cholibɔr, asɛ ba jwɛh ba jaɡɛ Neftoa bule ta.

¹⁶ Harɛ la jwɛh berɔ le bela dɛ kpɔ bwejen bɛl lɔɡa o sie aa chaɡɛ Bɛn Henɔm Fɛlembɔjen ta, o lɔ Refaim Fɛlembɔjen weekaŋle nyunduabɔr. Dɛ kpoŋe kaa Henɔm Fɛlembɔjen ta dɛ kaa Jebus tena bwɛjen Jerusalam harɛbɔr, weekaŋle harɛbɔr dɛ kaa Ɛn Roɡel nee nyoa.

¹⁷ O berɔ ɡole kpɔ weekaŋle nyundua, dɛ kaa Ɛn Sɛmɛs nee nyoa, ne Gelilɔt o sie aa chaɡɛ ŋwɛnɛ waa chɔa kaa Adumim, dɛ che bela kaa Rubin bibaa Bohan ŋwam ta.

¹⁸ O berɔ kpɔ Bɛt Araba weekaŋle nyunduabɔr, dɛ kaa Jɔɔdan Moo Fɛlembɔjen bini.

¹⁹ Dɛ berɛ kpɔ Bɛt Hoɡla harɛbɔr weekaŋle nyunduabɔr, dɛ ba le Yar Mpo la ta bela Jɔɔdan Moo la aa baa su o ta. Belaa ɛ harɛ la weekaŋle harɛbɔr jwɛh ta.

²⁰ Jɔɔdan Moo laanee ba wee leebɔr harɛ jwɛh ta. Gɛɛ harɛ Bɛnjamen dea tena kapɛrɛ kon baa bɔna lolanar ta la jwɛhre la bwa waa do.

²¹ Bwɛjena aa ɛ Bɛnjamen dea lolanar kwaa laanee Jeriko ne Bɛt Hoɡla dɛ Ɛmɛk Kesis,

²² ne Bɛt Araba ne Semaraem dɛ Bɛtel,

²³ ne Avim ne Para dɛ Ofra,

²⁴ ne Kefa Amɔne ne Ofni dɛ Geba. A bwa lɔ bwɛjena fi dɛ anɛ, a ne a bwɛjeɡre.

²⁵ Ane ɡee Gebeɔn ne Rama dɛ Beɛrɔt,

²⁶ ne Mispa ne Kefira dɛ Moosa,

²⁷ ne Rekem ne Irpeel dɛ Tarala,

²⁸ ne Sɛla ne Haelef ne Jebus, ne Gebea dɛ Kiriat Jearim. A bwa lɔ bwɛjena fi dɛ anaarɛ, a ne a bwɛjeɡre. Harɛ Bɛnjamen dea tena lolanar aa dɔa o ɛ ba kapɛrɛ kon laanee la.