Josua 17 - mzwDBL

Manasɛ dea tena harɛ baa dɔa

¹ Ba bɔne Jɔɔdan wee cholibɔr harɛ la pera tɛ Josef binomoa Manasɛ ne o lolanar, o ɛ ba kapɛrɛ kon. Josef binomoa sɔne Manasɛ, asɛ o ɡe binomoa sɔne Makir. Makirii Gelead tena naa, dɛ o jemɛ yoi taeh. Anomanta, Gelead ne Basan harɛ aa lɔ Jɔɔdan wee leebɔr la baa ɛ o kwa.

² Harɛ waa lɔ Jɔɔdan Moo wee cholibɔr la baa ɛ Manasɛ lolanar baa kaa la ɡe kapɛrɛ kon. Banee, Abeɛsa ne Hɛlɛk ne Asriel ne Sɛkem ne Hɛfa dɛ Sɛmeda. Banɔɔ Josef bibaa Manasɛ naanar bibaala, dɛ ba bwa ɛ nomonnyuune.

³ Manasɛ bibaa sɔne Makir, Makir ɡe bibaa sɔne Gelead, o ɡe bibaa sɔne Hɛfa, Hɛfa ɡe lolɛ bibaa, o sɔne Selofehad. Selofehad te aa ira la, o ta bibaa dɔe, bihaahna ɡboo o lolɛ. Banee Maala ne Nowa ne Hoɡla ne Milka dɛ Tirsa.

⁴ Gɛ haahna nɔ la sɔfo Eliasa ne Nun bibaa Josua, ne nomonome baa chɔ ba nyoa la be ŋɔ, “Korowii bol Mosis be ŋɔ ó tɛ ya ne ya lolanar baala harɛ la pera ó ɛ ya kapɛrɛ kon.” Anomanta, Josua tɛ bihaahna ne ba lolanar bibaala bwa harɛre ɡɛ Korowii aa ŋɔa la.

⁵ A waa Manasɛ dea tena dɔ harɛ la bɔre fi dɛ ja Gelead ne Basan harɛ aa lɔ Jɔɔdan Moo la wee leebɔr,

⁶ dɛkalkɛ dɛ Manasɛ dea bihaahna la, ne ba lolanar bibaala la dɔ harɛ bɛl o ɛ ba kapɛrɛ kon. Gelead harɛ la baa ɛ Manasɛ naanar baa kaa la ɡe kapɛrɛ kon.

⁷ Manasɛ dea tena harɛ le Aasa dea tena harɛ ta dɛ kaa bwɛjen Mekmɛtat, Sɛkem wee leebɔr. Harɛ la jwɛh chɔɔ kaa weekaŋle harɛbɔr, dɛ che bela kaa bela nɛra bane aa soɡa baa yerɛ bela Ɛn Tapua.

⁸ Manasɛ dea tenaa dɔ Tapua harɛ la, kɛ Tapua bwɛdaa waa lɔ ba harɛ jwɛh ta la te ɛ Efrem dea tena kon.

⁹ Harɛ la jwɛh kaalɔ ka tel Kana nenabɔjeɡa ta. Dɛ bwɛjena ane lɔ nenabɔɔ la weekaŋle harɛbɔr, dɛ do Manasɛ dea harɛ ta, kɛ dɛ ɛ Efrem dea tena kwa. Manasɛ dea tena harɛ la jwɛh berɔ kpɔ nenabɔɔ la weekaŋle nyunduabɔr, dɛ ka chiɡ Mɛdetereenea Mpo la ta.

¹⁰ Efrem dea tena harɛ lɔ weekaŋle harɛbɔr, asɛ Manasɛ dea tena kon do weekaŋle nyunduabɔr. Manasɛ dea tena harɛ kaa chiɡ Mɛdetereenea Mpo ta, ba ne Aasa dea tena harɛ jwɛh ta do weekaŋle nyunduabɔr, asɛ ba ne Isaaka dea tena jwɛh ɡe do wee leebɔr.

¹¹ Isaaka dea tena harɛ ne Aasa dea tena harɛ ta la, Manasɛ dea tena dɔ bwɛjena. Anee Bɛt San ne Ibleam ne Dɔr ne Ɛndɔr ne Taanak ne Meɡido dɛ a bwɛɛre aa bara.

¹² Manasɛ dea tena la ta wone doŋi nɛra baa soɡe bwɛjena la ta, anomanta, Keenan tena la kwaarɔ so bela.

¹³ A habɔɔ Israel tena aa baa do kpeɡri la, ba ta Keenan tena la bwa doŋe. Ba ɡelɔ ba so dɛ ɛ toma dɛɛ tɛɛ ba.

¹⁴ Asɛ Josef naanar ir la Josua be dɛ ka bɔɔro ŋɔ, “Ɛrɛ waa he tɛ yaa harɛ bɔrbeŋkpoŋ ɡbo o ɛ ya kapɛrɛ kon nɔɔ? Korowii swee andɛɛɡa tɛ yaa, dɛ́ ɡel ya warɛ.”

¹⁵ Anee Josua chaŋe ŋɔ, “Dɛ he warɔ asɛ Efrem deŋɡarere harɛ la aa kanɛ tɛ heya aa, hé kaa Pɛrɛs ne Refa tena kɔne la bini, dɛ́ ka parɛ bela dɛ́ so.”

¹⁶ Asɛ Josef dea bii la ŋɔ, “Deŋɡarere dor harɛ waa chɔa kaa la aa kanɛ tɛ yaa, kɛ Keenan tena baa soɡe harɛpɛɛ waa chɔa kaa ta la, ba dɔ kwaa aa do kɛŋɔ torɔɡore ba vɔwa dɛɛ pɛl jaɡre, ba ne Bɛt San tena ne o bwɛɛre aa baro, dɛ banɔ la baa soɡe Jesreel Fɛlembɔjen la ta bwa.”

¹⁷ Josua ŋɔ Efrem ne Manasɛ deene tena la be ŋɔ, “Kasinteŋ, he warɔ, dɛ do kpeɡri ɡe kohona. Hɛɛ dɔ bɛlee

¹⁸ dɛ́ kpɔ deŋɡarere harɛ waa ɛ kɔr la ɡe ja. Hé teŋni kɔr la daa la, dɛ́ parɔ kaa sie. A lole kɛŋɔ Keenan tena dɔ kwaa aa do kɛŋɔ torɔɡore ba vɔwa pɛl jaɡre dɛ do kpeɡri te, kɛ hɛɛ won doŋ ba le.”