Josua 16 - mzwDBL

Efrem ne Manasɛ deene harɛ baa dɔa

¹ Harɛ baa kpɔa tɛ Josef naanar la jwɛh le weekaŋle harɛbɔr, dɛ pa mun le Jɔɔdan Moo la bɛne Bwɛjen Jeriko, bobɛl neerare aa chɔa wee leebɔr, dɛ kpɔ bela kaa pua hɛŋle ɡbo harɛ la ta, dɛ kaa Bɛtel waa lɔ deŋɡarere harɛ ta.

² Dɛ le bwɛjen Bɛtel, dɛ ɡale kaa bwɛjen Atarɔt ta. Nɛra bane baa dɛ yer ba Aaki tena soɡe bela,

³ dɛ berɛ wili kpɔ wee cholibɔr Jaflɛt tena harɛ ta, dɛ kaa Bɛt Hɔrɔn harɛbɔr, dɛ kaa ka jaɡɛ Mɛdetereenea Mpo nyoa Gɛsa.

⁴ Harɛ Josef naanar baa ɛ deene ane baa dɛ yera Efrem ne Manasɛ aa dɔa o ɛ ba kapɛrɛ kon laanee.

Efrem dea tena harɛ wa

⁵ Harɛ Efrem dea tena aa dɔa lolanar ta laanee nɔ. Ba harɛ baa dɔa o ɛ ba kapɛrɛ kon la jwɛh le bwɛjen Atarɔt Adaa wee leebɔr dɛ kaa Bɛt Hɔrɔn harɛ nyunduabɔr,

⁶ dɛ chɔ kaa Mɛdetereenea Mpo nyoa. Dɛ le bwɛjen Mekmɛtat weekaŋle nyunduabɔr, dɛ ɡoŋe kpɔ wee leebɔr kaa bwɛjena Taanat Silo, dɛ fɛrɔ kaa Janoa ɡe wee leebɔr.

⁷ O berɔ le Janoa dɛ wili kaa bwɛjena Atarɔt ne Naara, dɛ ka jaɡɛ bwɛjen Jeriko, dɛ ka tonɛ Jɔɔdan Moo la nyoa.

⁸ Harɛ la jwɛh kpɔ Tapua wee cholibɔr, dɛ kaa Kana nenabɔjeɡa ta, dɛ kaa ka tonɛ Mɛdetereenea Mpo la ta. A ɡɛ harɛ nɔɔ Efrem dea lolanar dɔ o ɛ ba kapɛrɛ kon.

⁹ Bwɛjena ne bwɛjeɡre ane aa lɔ Manasɛ dea tena harɛ jwɛh ta ɡe jao, kɛ ba kpɔɔ ja Efrem dea tena.

¹⁰ Efrem dea tena la ta Keenan tena baa soɡe Gɛsa la doŋe le bela. Anomanta, ba ne ba bwa pɛo so dɛ ba le fini. Kɛ Efrem dea tena la ɡelɔ baa ɛ toma kɛŋɔ ba yoma ken.