Josua 14 - mzwDBL

Jɔɔdan Moo wee cholibɔr harɛ bɔna

¹ Kenii Keenan harɛ waa lɔ Jɔɔdan wee cholibɔr la bɔna waa do. Sɔfo Eliasa ne Nun bibaa Josua, dɛ nomonome baa chɔ Israel deene la nyoo laanee bɔna tɛɛ ba.

² Dɛ Korowii ŋɔ Mosis be wubwa kɛŋɔ, Jɔɔdan Moo wee cholibɔr harɛ waa dɛ ba bɔna tɛ deene anuanaarɛ ne dea beŋkpoŋ pera la, bá bil daa ásɛ bɛlbwa dɔ o kon.

³ Dɛ Mosis dɔɔ kpɔ harɛ waa lɔ Jɔɔdan Moo wee leebɔr la tɛ deene anɛ ne beŋkpoŋ pera tena, a ɛ ba kapɛrɛ kwa. Kɛ Lewi dea tena te, o ta ban harɛ la bɛl tɛɛ.

⁴ Josef dea tena lɔ bele banɛ, Manasɛ ne Efrem deene tena. Lewi dea tena ta harɛ la bɛlbwa dɔe, nemenɛ bwɛɛre waa ɡela ba so a ta ne bela waa tɛɛ ba ŋɔ ba nae ne peera ɛɛ di la ɡbo.

⁵ Gɛ Korowii aa do Mosis la taa Israel tena che dɛ bɔne harɛ la.

Josua kpɔ bwɛjen Hɛbrɔn do Kaleb nɔn ta

⁶ Awola bɛl, Juda dea tena bane ne Kaleb, baa dɛ yerɛ o mɛɛ Jefune o ɛ Kenis te iro, dɛ la Josua be Gelɡal, asɛ Kaleb ŋɔ o be ŋɔ, “Lii ɡɛ saŋ yaa lɔ Kades Baanea asɛ Korowii bol n ne he waa baɡle Mosis waa ɛ Korowii bonɔɔ waa ya be la.

⁷ A ɡɛ saŋ la dɛ n di bene fifraanaarɛ. Asɛ Korowii bonɔɔ Mosis tom mɛ le Kades Baanea ba Keenan harɛ nɔ ta ŋɔ ń ba sɔh nyiŋi harɛ la. Asɛ n berɛ laa berɛ ba baɡle ɡɛ tenten harɛ la waa aa doa o be.

⁸ Nɛra n ne baa laŋa la ɡelɔ ya nɛra la bwara yɔr baa ɔmɛ, kɛ n te, dɛ n dɛ yarada Korowii kɛrɛdɛ.

⁹ Anomanta, awola tɔpere la, Mosis ŋwɛɛrɔ baɡ mɛ ŋɔ, ‘Harɛ haa laŋa ka valɛ o ta la ɛɛ ɛ he ne he bii kapɛrɛ konee saŋ bɛlbwa dɛɛ la, dɛkalkɛ he yarada Korowii maa dɛ tomɔ la bambile bwa ne.’

¹⁰ Na, bene fifraanaarɛ dɛ anue la, Korowii aa bol waa nɔ Mosis be. Gɛ saŋee Israel tena do pua hɛŋle ɡbo harɛ ta dɛɛ ɡaaɡe la. Asɛ Korowii ɡel n ta so le dɛ ba le fini ɡɛ waa baɡ mɛ nyoa la. Na, fini nɔ, n di bene fifraanuatoro dɛ anue,

¹¹ n ta kpeɡri fini kɛŋɔ ɡɛ saŋ Mosis aa tom mɛ la. N ta kpeɡri dɛ́ won la laa kɛŋɔ wubwa la ken.

¹² Anomanta, n dɛ soŋe kɛ hé kpɔ deŋɡarere harɛ Korowii aa kpɔa baɡ mɛ nyoa awola tɔpere la tɛ mɛ fini. He ɡbabir noɔ kɛŋɔ Anak tena baa kpeɡa kohona lɔ harɛ la ta, asɛ ba bwɛjena do kan ba ma danjwɛkpeɡa bara. Kɛ dɛ Korowii cheɡɛ n mun ta naa, mɛɛ won doŋ ba le, ɡɛ waa bola la.”

¹³ Ate, Josua swee andɛɛɡa tɛ Jefune bibaa Kaleb, dɛ kpɔ bwɛjen Hɛbrɔn tɛo ŋɔ ó ɛ o kapɛrɛ kon.

¹⁴ Kaleb yarada Korowii Israel tena aa dɛ tomɔ o bambile bwa ne kɛrɛdɛ, anomanta, Korowii kpɔ bwɛjen Hɛbrɔn tɛo. O naanar ta soɡe bela ba le fini.

¹⁵ Ba fa dɛ yerɛ Hɛbrɔn, bwɛjen Aaba. Dɛ Aaba ɛ nɛnjen tenten Anak tena la bini. Ate, deŋnesɔɔhna berɛ ba harɛ la ta.