Josua 13 - mzwDBL

Harɛ waa kaa Israel tena ka yo dɛ lɛ

¹ Josua baa hwɛɛh kɛrɛdɛ. Asɛ Korowii ŋɔ o be ŋɔ, “Taraken he hwɛɛhrɔ kohona, kɛ a ta ka harɛre warɛ kɛŋɔ Israel tena yo dɛ lɛ.

² Harɛre aa kaa laanee Filisti ne Gesur harɛre,

³ dɛ kpɔ le Sehɔ Moo waa lɔ Ijipt wee leebɔr, dɛ ka tel Ekron tena jwɛh ta weekaŋle nyundua, a bwa lɔ Keenan harɛ ta. Dɛ Filisti tena koranar banue soɡe bwɛjena Gasa ne Asdɔd ne Askɛlɔn ne Gat dɛ Ekron, dɛ Avi tena ɡe harɛ.

⁴ Keenan tena harɛre bwa ne bwɛjen Meara waa lɔ Sidon tena harɛ ta, dɛ kpoŋe kaa bwɛjen Afɛk waa lɔ Amɔre tena harɛ jwɛh ta jao.

⁵ Dɛ a chɛ kɛ hé yo Gebal tena harɛ dɛ́ pɔ ba nɛ, dɛ́ teŋɛ kaa Lɛbanɔn harɛ bwa wee leebɔr, le Baal Gad waa lɔ Hɛmɔn Bwejen lɔɡa ŋwɛnɛ waa chɔa kaa Lebo Hamat.

⁶ Harɛ aa chɛ kɛ hé ka yo dɛ́ pɔ ba nɛɛ ja laanee Sidon tena harɛ baa soɡe deŋɡarere bwɛɛre ta dɛ do Lɛbanɔn bwejena ne Mesrefɔt Maim harɛ baah ta bwa la. N ɡbaɡba ɛɛ doŋi nɛra la bwaa le he sie, ásɛ he nyiŋi kɛrɛdɛ dɛ́ bɔne harɛ la tɛ Israel tena la, ó ɛ ba kapɛrɛ kon ɡɛ maa ŋɔ he be la,

⁷ ásɛ dɛ bɔne harɛ la tɛ deene anuanaarɛ aa kaa la ne Manasɛ dea pera tena bane, ásɛ o ɛ ba kapɛrɛ kon.”

Jɔɔdan Moo wee leebɔr harɛ bɔna

⁸ Dɛ Korowii bonɔɔ Mosis tɔ sie kpɔ Jɔɔdan Moo wee leebɔr harɛ tɛ Rubin ne Gad dɛ Manasɛ dea pera tena la bane, ásɛ o ɛ ba kapɛrɛ kon.

⁹ Harɛ la chɔɔ ka le Arowa, o lɔ Aanɔn Fɛlembɔjen la nyoa ne bwɛjen bɛl waa lɔ fɛlembɔjen la bini dɛ kpɔ harɛpɛɛ bɛl waa chɔa le Medeba dɛ kaa Debɔn.

¹⁰ Harɛ la le Amɔre tena Kooro Sihon waa di kora Hɛsbɔn la bwɛjena bwa ta, dɛ ka le Amɔn tena harɛ jwɛh ta,

¹¹ o teŋɔ ka le Gelead waa lɔ Gesur ne Maaka harɛre ta, ne Hɛmɔn Bwejen la bwa ne Basan harɛ bwa dɛ́ kpoŋe kaa Saleka bwa jao.

¹² Kooro Ɔɡ waa ka mun ɛ Refa te dɛ di kora Astarɔt ne Edrei la harɛ jao. Dɛ Mosis yo a ɡɛ nɛra nɔ dɛ pɔ ba nɛɛ dɛ doŋ ba le harɛ la ta.

¹³ Israel tena ta Gesur tena ne Maaka tena te doŋe, bane ba ta pɛo so dɛ ba le fini.

¹⁴ Mosis ta Lewi dea tena la te harɛ tɛɛ, kwaa nɛra aa kpɔ ba fuh ɛ saraha tɛ Korowii Israel tena aa dɛ tomɔ laanee chɛ kɛŋɔ bá dɔ. Gɛ Korowii aa ŋɔ Mosis be la.

¹⁵ Mosis kpɔ harɛ la pera tɛ Rubin dea tena kɛŋɔ ó ɛ ba kapɛrɛ kon.

¹⁶ Ba harɛ nyoa le Arowa, o lɔ Aanɔn Fɛlembɔjen la nyoa dɛ kaa bwɛjen waa lɔ fɛlembɔjen la baah ta, dɛ kpɔ harɛpɛɛ waa chɔa kaa dɛ ka ɡarɛ bwɛjen Medeba,

¹⁷ ne Hɛsbɔn ne bwɛjena bwa aa lɔ harɛpɛɛ waa chɔa kaa la ta, Debɔn ne Bamɔt Baal dɛ Bɛt Baal Meɔn,

¹⁸ ne Jahas ne Kedemɔt dɛ Mɛfaat,

¹⁹ ne Kiriataim ne Sibma dɛ Sɛrɛt Saha aa lɔ deŋɡare waa lɔ fɛlembɔjen bini la doa,

²⁰ ne Bɛt Peɔ ne Pesɡa Bwejen la lɔɡa dɛ kaa Bɛt Jɛsemɔt,

²¹ ne bwɛjena aa lɔ harɛpɛɛ waa chɔa kaa la ta bwa, ne Amɔre Kooro Sihon o fa aa di kora bwɛjen Hɛsbɔn ka la harɛre bwa. Mosis yo Kooro Sihon ne Midian koranar bane baa dɛ yer ba Evi ne Rekem ne Sor ne Hur dɛ Reba dɛ pɔ ba nɛ. Dɛ Midian koranar la bwa ɛ koojeɡre dɛ do Kooro Sihon lɔɡa ba ne o nyoa pɛ harɛ la ta.

²² Nɛra baa jaa Israel tena la kpoo ba laa ta la, ba bini bɛlee Balam, o mɛɛ sɔne Beɔ. Dɛ a ɡɛ Balam nɔ ɛ voɡre.

²³ Jɔɔdan Moo wee cholibɔree ɛ Rubin dea tena harɛ jwɛh ta. Bwɛjena ne bwɛjeɡre aa lɔ bela laanee Mosis kpɔ tɛ Rubin dea tena o ɛ ba kapɛrɛ kon.

²⁴ Harɛ la pera Mosis aa kpɔa tɛ Gad dea tena ɡe ŋɔ ó ɛ ba kapɛrɛ kon laanee nɔ,

²⁵ Jasa ne Gelead bwɛjena bwa, ne Amɔn tena harɛ la pera, dɛ́ kpoŋe kaa Arowa waa lɔ bwɛjen Raba wee leebɔr,

²⁶ dɛ́ le bwɛjen Hɛsbɔn dɛ́ kaa bwɛjena Ramat Mispa ne Bɛtɔnem, dɛ́ berɛ le bwɛjen Mahanaim dɛ́ kaa Debir harɛ ta.

²⁷ Jɔɔdan Fɛlembɔjen ta ɡe, bwɛjena Bɛt Haram ne Bɛt Nimra ne Sukot dɛ Safɔn, dɛ Kooro Sihon waa di kora bwɛjen Hɛsbɔn la harɛ bwa. Jɔɔdan Moo la wee leebɔr, harɛ la teŋɔ kaa Galilia Moo nyoa.

²⁸ Bwɛjena nɔ ne a bwɛjeɡre nɔ ɛ Gad dea tena kapɛrɛ kwa.

²⁹ Dɛ Mosis kpɔ harɛ la pera tɛ Manasɛ dea pera tena la ɡe o ɛ ba kapɛrɛ kon.

³⁰ Harɛ la nyoa le Mahanaim jwɛh ta dɛ kaa Kooro Ɔɡ waa di kora Basan harɛ bwa, ne bwɛjeɡre fifraanumɛl baa bɛl baa dɛ yerɔ Jɛɛ aa yoa dɛ pɔ ba nɛ a do Basan harɛ,

³¹ ne Gelead harɛ pera ne bwɛjena Astarɔt dɛ Edrei jao, a bwa ɛ Basan harɛ Kooro Ɔɡ koobwɛjena. Anɔɔ ɛ Makir bibaa Manasɛ naanar bwɛjena baa dɔa.

³² Harɛ Mosis aa bɔna tɛ Israel tena o ɛ ba kapɛrɛ kon, ɡɛ saŋ waa lɔ bwɛjen Jeriko wee leebɔr ne Jɔɔdan Fɛlembɔjen ta, ɡɛ saŋ waa tel Moab harɛpɛɛ waa chɔa kaa ta laanee la.

³³ Kɛ Lewi dea tena la te, Mosis ta ban harɛ tɛɛ o ɛ ba kapɛrɛ kon. O ŋɔ ba be ŋɔ kwaa nɛra aa kpɔ ba ɛ saraha dɛɛ tɛ Korowii Israel tena aa dɛ tomɔ la peraa dɛɛ ba ba kwaa ɛɛ.