Josua 12 - mzwDBL

Koranar Mosis aa yoa dɛ pɔ ba nɛ

¹ Koranar Israel tena aa yoo ba dɛ pɔ ba nɛɛ dɛ lɛ ba harɛre laanee nɔ. Harɛre la le Jɔɔdan Moo wee leebɔr, dɛ le Aanɔn Fɛlembɔjen dɛ kaa Jɔɔdan Fɛlembɔjen ta, dɛ kpoŋe kaa Hɛmɔn Bwejen weekaŋle nyundua. Koranar banɛɛ ba yo dɛ pɔ ba nɛ.

² Kooro la bɛl sɔne Sihon, Amɔre tena kooroo wɛɛ di kora bwɛjen Hɛsbɔn. O harɛ nyoa le bwɛjen Arowa, o lɔ Aanɔn Fɛlembɔjen nyoa, dɛ le fɛlembɔjen la baah ta dɛ kaa Jabɔk Moo waa ɛ Amɔn tena harɛ jwɛh ta. Gelead harɛ pera ɡe ja o ta.

³ O harɛ la teŋɔ ba le Jɔɔdan Fɛlembɔjen la ta, dɛ le Galilia Moo weekaŋle harɛbɔr, dɛ kaa Bɛt Jɛsemɔt harɛ ta, o lɔ Yar Mpo wee leebɔr. Dɛ kpoŋe kaa Pesɡa Bwejen lɔɡa.

⁴ Basan Kooro Ɔɡ harɛ ja a ta. O ɛ Refa tena kooro waa ka mun dɛ di kora bwɛjena Astarɔt ne Edrei ta.

⁵ O harɛ la pera berɔ le Hɛmɔn Bwejen ta, dɛ kaa bobɛla baa dɛ yera Saleka ne Basan bwa, dɛ kpoŋe ka le Gesur ne Maaka harɛre jwɛh ta. Dɛ́ berɛ kpoŋe le Gelead harɛ pera dɛ́ kaa Hɛsbɔn Kooro Sihon harɛ jwɛh ta.

⁶ Mosis ne Israel tena la kpoo ba, asɛ dɛ kpɔ ɡɛ harɛ la tɛ Israel deene atoro ŋɔ bá kpɔ. Banee Rubin ne Gad deene dɛ Manasɛ dea pera bane.

⁷ Josua ne Israel tena yoo dɛ pɔ koranar baa lɔ Jɔɔdan Moo wee cholibɔr nɛ. Dɛ le bwɛjen Baal Gad, waa lɔ Lɛbanɔn Fɛlembɔjen ta, dɛ kaa Halak Bwejen weekaŋle harɛbɔr, dɛ kpoŋe kaa Sɛɛ Bwejen pera. Josua bɔne ɡɛ harɛ la tɛ Israel deene la ŋɔ, bá kpɔ ɛ ba kon kwaraa.

⁸ Harɛre a ɡe aa jaa laanee, deŋɡarere ta ne wee cholibɔr deŋɡarere lɔɡa ne Jɔɔdan Fɛlembɔjen ne o bwejena lɔɡre, pua hɛŋle ɡbo harɛ ne Nɛɡɛv. Dɛ harɛre Hiti ne Amɔre ne Keenan ne Pɛrɛs ne Hivi dɛ Jebus tena aa soɡe a ta laanee.

⁹ Koranar Israel tena aa yoo ba dɛ pɔ ba nɛɛ laanee koranar baa le Bwɛjena Jeriko ne Ai, aa bɛne Bɛtel.

¹⁰ Jerusalam ne Hɛbrɔn koranar,

¹¹ Jaamut ne Lakes koranar,

¹² Ɛɡlɔn ne Gɛsa koranar,

¹³ Debir ne Gɛda koranar,

¹⁴ Hɔrma dɛ Arad koranar.

¹⁵ Lebna ne Adulam koranar,

¹⁶ Makeda ne Bɛtel koranar,

¹⁷ Tapua ne Hɛfa koranar,

¹⁸ Afɛk ne Lasarɔn koranar.

¹⁹ Madɔn ne Hasɔ koranar

²⁰ Simron Mɛrɔn ne Aksaf koranar,

²¹ Taanak ne Meɡido koranar

²² Kedes ne Jokneam koranar, a lɔ Kaamɛl Bwejen lɔɡa.

²³ Dɔr, o ɡe lɔ mpo nyoa ne Goim, dɛ do Galilia harɛ ta,

²⁴ dɛ Tirsa kooro. Koranar la bwa lɔ fifraatoro dɛ beŋkpoŋ.