Josua 11 - mzwDBL

Josua pɔ weekaŋle nyundua koranar nɛ

¹ Dɛ Kooro Jabin dɛ di kora Hasɔ. O baa no kɛŋɔ Josua ne o nɛra Israel tena pɔ harɛre nɛɛ warɛ, asɛ o ɡel koranar bane kɛŋɔ Jobab waa ɛ Madɔn kooro ne Simron dɛ Aksaf ɡe no a wa.

² O ɡelɔ koranar baa lɔ weekaŋle nyunduabɔr deŋɡarere ta dɛ do Jɔɔdan Fɛlembɔjen ta, ne Galilia Moo weekaŋle harɛbɔr, ne banɔ la baa lɔ deŋɡarere lɔɡre, ne banɔ la baa lɔ mpo nyoa weekaŋle harɛbɔr dɛ bɛne bwɛjen Dɔr, nɛra ɡe no dɛ ba chao.

³ Kooro Jabin berɔ ɡel Keenan tena baa lɔ Jɔɔdan Moo la baŋne anɛ la bwa no. Amɔre ne Hiti ne Pɛrɛs dɛ Jebus tena baa soɡe bela deŋɡarere ta, ne Hivi tena baa soɡe Hɛmɔn Bwejen lɔɡa dɛ do Mispa harɛ ta.

⁴ Ate, koranar la bwa sɛh dɛ kpɔ ba laa tena pɛ, ne kwaa aa do kɛŋɔ torɔɡo ba vɔwa pɛl jaɡre dɛɛ yo ane la ba cheme. Laa tena la warɔ kɛŋɔ mpo nyoa hɛŋle ken.

⁵ A ɡɛ koranar nɔ bwa kpɔ ba laa tena pɛ, dɛ baŋre ba tɛnte deene nee Mɛrɔm nyoa, dɛ́ yo Israel tena.

⁶ Anee Korowii ŋɔ Josua be ŋɔ, “Hɛ́ɛ berɛ ɔma, kere saŋ nɔ bɔr, mɛɛ kpɔ baa do he Israel tena nɔn taa hé kpoo ba. Hé ɛ dɛ́ chaa ba jaɡre la nadɛɛne, dɛ́ fuh kwaa aa do kɛŋɔ torɔɡo ba vɔwa pɛl jaɡre la.”

⁷ Ba ne jara dɛ Josua ne o laa tena bwa deno ba lɔ tɔ ba nɛɛ Mɛrɔm nee la nyoa bela,

⁸ asɛ Korowii den kpɔ ba do Israel tena nɔn ta. Ba pɔ ba nɛɛ dɛ ti ba ka le weekaŋle nyundua bwɛjena ane baa dɛ yera Sidon ne Mesrefɔt Maim, ne wee leebɔr ka le Mispa Fɛlembɔjen ta, hale ba bini beŋkpoŋ kwaraa ta kae.

⁹ Josua ɛ ɡɛ Korowii aa doo la. O ɡelɔ ba chaa ba jaɡre la nadɛɛne, dɛ fuh torɔɡore baa vɔwa pɛl jaɡre la.

¹⁰ Dɛ bwɛjen Hasɔɔ ɛ harɛre aa lɔ bela bwa bwɛjen. Josua berɔ ba o ta ɡɛ saŋ dɛ ba yo ba ɡe, dɛ kpo bela kooro kere ne.

¹¹ Ba kpo nomɛlbwa waa lɔ bwɛɛ la ta, bɛlbwa ta kae, dɛ fuh bwɛɛ la ɡe bwa.

¹² Josua yo a ɡɛ bwɛjena nɔ bwa ne a koranar, dɛ kpo nɛra baa lɔ a ta bwa, ɡɛ Korowii bonɔɔ Mosis aa doo la.

¹³ Josua ta ɡelɛ ba fuh bwɛjena aa lɔ deŋɡarere ta la bɛlbwa, nemenɛ Hasɔ ɡbo.

¹⁴ Israel tena la cheɡɛ kondɛɛɡa ne kondɛɛra aa lɔ ɡɛ bwɛjena la ta bwa kaa a ɛ ba kwa. Ba kpo nɛra baa lɔ bwɛjena la ta bwa, bɛlbwa ta kae.

¹⁵ Gɛ Korowii aa do o bonɔɔ Mosis la, ɡɛɛ Mosis ɡe do Josua, asɛ o teŋɛ a ta. O ɛ waa Korowii aa do Mosis la bwa.

¹⁶ Josua ne o laa tena yoo dɛ kpɔ harɛ la bwa, deŋɡarere ne bwea lɔɡre bwɛɛre, anɔ la aa lɔ weekaŋle nyundua ne weekaŋle harɛbɔr harɛ baa dɛ yerɔ Nɛɡɛv pua hɛŋle ɡbo harɛ bwa ta. Le Gosen harɛ dɛ́ kpoŋe kaa Jɔɔdan Fɛlembɔjen ta bwa.

¹⁷ Dɛ́ kpoŋe le Halak Bwejen dɛ́ kaa Sɛɛ Bwejen ta, dɛ́ kpoŋe kaa Baal Gad waa lɔ Lɛbanɔn Fɛlembɔjen bini dɛ do Hɛmɔn Bwejen la lɔɡa. Josua yo koranar la bwa, dɛ kpoo ba.

¹⁸ Josua yo ɡɛ koranar nɔ biɡri taeh, kɛ o pɔ ba bwa nɛɛ dɛ kpoo ba.

¹⁹ Nemenɛ Hivi tena baa lɔ bwɛjen Gebeɔn la ɡbosoo ne Israel tenaa pɛa fɔwɛ nyopɛo fɔo ba ta dɔŋa yoi. Ba kpoo banɔ la baa lɔ bwɛjena la bini bwa laa ta.

²⁰ Korowiirii saahna dɛ ɡel ba bambile do kpeɡri ba ka pu Israel tena yo, ásɛ Israel tena bɛ ba sum na, dɛ́ kpoo ba dɛ́ he ba. Gɛ Korowii aa ŋɔ Mosis be la.

²¹ A ɡɛ saŋ la ta la, Josua kaa kpoo Anak tena baa soɡe deŋɡarere ta, dɛ kpoŋe le bwɛjena ane baa dɛ yera Hɛbrɔn ne Debir dɛ Anab, dɛ deŋɡarere bwɛɛre aa lɔ Juda ne Israel harɛ ta. Gɛ nɛra nɔ kpeɡo taeh.

²² A ɡɛ Anak tena nɔ bɛlbwa ta Israel harɛ ta kae. Nemenɛ bwɛjena ane baa dɛ yera Gasa ne Gat dɛ Asdɔdee tamaa bane ka.

²³ Josua yoo lɛ ɡɛ harɛ la bwa, ɡɛ Korowii aa ŋɔ o bonɔɔ Mosis be la. O bɔna tɛ Israel deene fi dɛ anɛ la, asɛ bɛlbwa dɔ o bɔr. A habɔɔ deŋnesɔɔhna ba harɛ la ta, bɛlbwa ta yoi kpa.