Josua 10 - mzwDBL

Israel tena yo Amɔre tena dɛ pɔ ba nɛ

¹ A kaa ba kɛ Kooro Adoni Sɛdɛk o fa aa di kora Jerusalam noɔ kɛŋɔ Josua ne o nɛra kaa yo bwɛjen Ai, dɛ chɔɡo kwaraa. Gɛ tenten Josua aa ɛ bwɛjen Jeriko tena ne o kooro la, ne ɡɛ Gebeɔn tena aa la Israel tena be ba ne ba ka fɔwɛ darame fɔo dɛ so bɛne ba la.

² Ɔmee chole Kooro Adoni Sɛdɛk ne o nɛra nɛ, dɛkalkɛ dɛ Gebeɔn ɛ bwɛjen dɛ ɛ koobwɛɛre la bini bɛl, dɛ do kan ɡwaa bwɛjen Ai, o nɛra ɡe jemɛ yoi kɛrɛdɛ.

³ Ate, Kooro Adoni Sɛdɛk kpɔ kala tɛ Hɛbrɔn Kooro Hoham ne Jaamut Kooro Piram, ne Lakes Kooro Jafia dɛ Ɛɡlɔn Kooro Debir ŋɔ,

⁴ “Hé ba cha mɛ ń ka yo bwɛjen Gebeɔn tena. Ba ne Josua ne o nɛra Israel tena kaa fɔwɛ darame fɔo.”

⁵ Ate, a ɡɛ Amɔre koranar banue baa le Jerusalam ne Hɛbrɔn ne Jaamut ne Lakes dɛ Ɛɡlɔn la kpɔ ba laa tena dɛ ka bar bwɛjen Gebeɔn dɛɛ ba ba yoi.

⁶ Belaa Gebeɔn tena den tomɛ nɛra Josua ne o nɛra Israel tena be bela baa baŋre ba tɛnte deene Gelɡal la ŋɔ, “Nomoa, Amɔre harɛ koranar baa lɔ deŋɡarere bwɛɛre ta bwa lɔɔ pɛ, dɛ kpɔ ba laa tena dɛɛ ba ba yo yaa, anomanta, kpɔ he nɛra ba warane dɛ́ ba cha he bonɔɔna, dɛ́ lɛ yaa ta.”

⁷ Ate, Josua kpɔ o laa tena bwa, banɔ la baa jemɛ yoi kɛrɛdɛ dɛ le Gelɡal.

⁸ Belaa Korowii ŋɔ Josua be ŋɔ, “Dɛɛ berɛ ba ɔma, n dɔɔ kpɔ ba do he nɔn ta. Ba bini bɛlbwa toole dɛ́ won che he sie.”

⁹ Josua ne o laa tena valɔ jwaana la ne bwa le Gelɡal ba bwɛjen Gebeɔn ta, dɛ ka piɡri Amɔre tena bela baa soɡa, dɛ yoo ba.

¹⁰ Ate, Korowii den ɡel Amɔre tena la wili Israel laa tena la sie, asɛ ba pɔ ba nɛɛ kohona dɛ kpoo ba Gebeɔn. Israel tena ti ba kaa bwɛɛ Bɛt Hɔrɔn ŋwɛnɛ ta, dɛ teŋɛ kpoo ba kaa bwɛɛre Aseka ne Makeda.

¹¹ Amɔre tena la aa chwaa tɔ Israel tena laa tena sie dɛ ka tel Bɛt Hɔrɔn dɛɛ kaa Aseka la, Korowii ɡelɔ dombwea lee ba nɛɛ kohona asɛ ba ɡalɡa bwa serewe ɡwaa ɡɛ Israel tena la aa kpoo ba la kwara.

¹² Awola tɔpere Korowii aa kpɔ Amɔre tena do Israel tena nɔn ta la, Josua soŋe Korowii kohona Israel tena la bwa siwi ta ŋɔ, “N Naa Korowii, ɡel wee che bobeŋkpoŋ Gebeɔn harɛ ta, ɡel korobie ɡe che bobeŋkpoŋ Aejalɔn fɛlembɔjen ta kiŋkiŋ ken!”

¹³ Anee wee che bobeŋkpoŋ, korobie ɡe ta che bobeŋkpoŋ, dɛ ka tel kɛŋɔ Israel tena aa kpoo ba dɔma la tonɛ. Gɛɛ a do ba chwerɛ a ɡɛ waa nɔ do tɔn baa dɛ yerɔ Jashar Tɔn bini ŋɔ, “Wee cheɡɛ nyufala o ta harɛ lee tɔpebir bwa la.”

¹⁴ Waa nɔ dɔŋa ta chiɡe saŋ bɛlbwa bwa, kɛɛ Korowii no nɛwɛnyini wesoŋa ken bwa. Kasinteŋ, dɛ Korowiirii fa yoa dɛɛ tɛ Israel tena.

¹⁵ Laa la aa tona la, Josua ne o laa tena bwa berɔ kaa Gelɡal bela baa baŋre ba tɛnte deene dɛ so la.

Amɔre koranar banue kpoora

¹⁶ Gɛ saŋ la, Amɔre koranar banue la chwao ka sɔh Makeda bwebɔɔ bɛl bini.

¹⁷ Dɛ Josua noɔ kɛŋɔ ba ŋɔ koranar banue la chwao ka sɔh bwebɔɔ bini Makeda,

¹⁸ asɛ o ŋɔ, “Hé ɡbili bwejena ba tɔ bwebɔɔ la nyoa, dɛ́ le n nɛra la bane bá che dɛɛ daah bela.

¹⁹ Hé ɡbabir bɛ bela che. Hé ti he dɔma la, he bɛ ban ɡel. Hé teŋɛ ba nɛɛ dɛ́ɛ yoo ba, he bɛ ɡel ba dɔ bɔr ba jo ba bwɛjena ta. Korowii yaa dɛ tomɔ la laa nɔn kpɔ ba nɛɛ dɛ kpɔ ba do he nɔn ta.”

²⁰ Josua ne Israel tena la kpoo nɛra la ɡalɡa bwa. Tamaa kenii baa ka dɛ won tel ba bwɛjena baa ma danjwɛkpeɡa bara ta.

²¹ Laa tena la bwa berɔ ba Josua be Makeda bela baa baŋre ba tɛnte deene la sɔnɔnɔɔ ken. Nomɛlbwa ta liire kɛ wɛɛ bol Israel tena wechɔɡe bɛlbwaa harɛ la ta kpa.

²² Ate Josua ŋɔ, “Hé ka ɡbili bwea la le bwebɔɔ la nyoa, dɛ́ lawɛ koranar banue la ba tɛ mɛ.”

²³ Ate, ba ka ɡbili bwea la le bɔɔ la nyoa, dɛ lawɛ a ɡɛ koranar baa le Jerusalam ne Hɛbrɔn ne Jaamut ne Lakes, dɛ Ɛɡlɔn le bwebɔɔ la bini.

²⁴ Baa laɡ ba le ba tɛ Josua la, o yerɛ Israel tena la ne laa nomonome la bwa cheme, asɛ dɛ ŋɔ nomonome la be ŋɔ, “Hé kpɔ he nakpale ɛɡre a ɡɛ koranar nɔ baŋare ta.” Ate, koranar la le dɛ ba chɔ harɛ, ba kpɔ ba nakpale ɛɡre ba baŋare ta.

²⁵ Josua berɛ ŋɔ laa nomonome la be ŋɔ, “Hɛ́ɛ berɛ ɔma, he bɛ ɡel he bambile ɡe chɔɡ. Hé che kiŋkiŋ dɛ́ dɔ bambile. Kenii Korowii ɛɛ ba he dɔma bwa he ne baa dɛ ba yoi ɛɛ.”

²⁶ Ate, Josua kpoo koranar la, dɛ kpɔ ba saɡre daa anue ta, ba saɡre ɡɛ naa, dɛ ka tel jɔmɔra.

²⁷ Wee aa dɛ ba joe la, o ɡelɔ ba ka laa ba kpɔ le daa baa saɡre a ta la ta, dɛ paa ba ka ta bwebɔɔ ba fa aa chwaa ka sɔh o bini la bini. Bwea baa ɡbila tɔ bwebɔɔ la nyoa kan kɛrɛdɛ dɛ ta tɔ o nyoa ba le fini.

²⁸ Awola tɔpere la, Makeda bwɛdaa do kɛŋɔ jahal ken Josua nɔn ta. O ne o laa tena kpoo bela kooro ne nɛra baa lɔ bwɛjen la ta bwa, o ta nɛn ɡelɛ. Gɛ waa ɛ bwɛjen Jeriko kooro laanee o ɛ Makeda kooro ɡe.

Weekaŋle harɛbɔr bwɛjena yoi dɛ́ pɔ a nɛ

²⁹ Ate, Josua ne o laa tena kpɔ le Makeda, dɛ ka pu bwɛjen Lebna dɛ ka yo nɛra baa lɔ o ɡe ta.

³⁰ Korowii cheɡɛ Josua ne o laa tena mun ta, dɛ kpɔ bwɛjen la ne o kooro do ba nɔn ta. Ba kpoo nɛra baa lɔ o ta bwa, nomɛlbwa ta kae. Gɛ baa ɛ bwɛjen Jeriko kooro laanee ba ɛ kooro la ɡe.

³¹ Josua ne o laa tena berɔ kpɔ le Lebna ɡe, dɛ kpɔ ka pu bwɛjen Lakes tena, dɛ ka bar ba dɛ yoo ba.

³² Tɔpera anɛ habɔɔ la, Korowii laa nɔn kpɔ bwɛjen Lakes tena ne o nɛra bwa nɛ, asɛ Josua ne o laa tena kpoo ba bwa sekwaraa ɡɛ waa ɛ Lebna la.

³³ Ba yoi la ta la, Horam waa ɛ bwɛjen Gɛsa kooro kpɔ o laa tena dɛ ba cha Lakes tena, kɛ ane a bwa, Josua ne o laa tena wono pɔ o ne o laa tena nɛ dɛ kpoo ba bwa, nomɛlbwa ta kae.

³⁴ Josua ne o laa tena berɔ kpɔ le Lakes ka pu bwɛjen Ɛɡlɔn tena dɛ ka bar ba ɡe dɛ yoo ba.

³⁵ Ba wono ka pɔ bwɛjen Ɛɡlɔn ne o nɛra bwa nɛɛ awola tenten dɛ kpoo ba bwa, dɛ ɛ bela kɛŋɔ baa ɛ Lakes la ken.

³⁶ Dɛ berɛ kpɔ le bwɛjen Ɛɡlɔn ka pu bwɛjen Hɛbrɔn ne o nɛra dɛ ka yo ba ɡe.

³⁷ Ba pɔ ba ɡe nɛɛ dɛ kpoo ba ne ba kooro bwa, dɛ ka yo ba bwɛjeɡre nɛra dɛ kpoo ba bwa, nomɛlbwa ta kae, dɛ ɛ bela kɛŋɔ baa ɛ bwɛjen Ɛɡlɔn la ken.

³⁸ Josua ne o laa tena la berɔ laa berɛ dɛ ba yo bwɛjen Debir tena ɡe.

³⁹ Ba pɔ bwɛjen Debir kooro ne o nɛra bwa nɛ, dɛ ka yo bela bwɛjeɡre bwa dɛ kpoo a nɛra bwa kwaraa, nomɛlbwa ta kae. Gɛ baa ɛ bwɛjen Debir ne o kooro la, ɡɛ tentenee ba ɛ Hɛbrɔn ne Lebna koranar ɡe.

⁴⁰ Josua pɔ harɛre la bwa nɛ, bwɛɛre aa lɔ deŋɡarere ta ne Nɛɡɛv, ne anɔ la aa lɔ wee cholibɔr, ne anɔ la aa lɔ mpo nyoa pua hɛŋle ɡbo harɛ ta, ne anɔ la aa chɔ bwea lɔɡre ne a koranar bwa. Nomɛlbwa ta o nyu dɔe. Ba kpo hweera kon te bɛlbwa. Gɛ Korowii Israel tena aa dɛ tomɔ aa doo laanee o ɛ.

⁴¹ Josua pɔ harɛre ane baa dɛ yera Kades Baanea dɛ kpoŋe kaa bwɛjen Gasa ne Gosen harɛ ta, dɛ ka tel bwɛjen Gebeɔn ne o harɛre aa baro cheme ta.

⁴² Josua ne o laa tena kaa yo a ɡɛ koranar nɔ ne ba nɛra, dɛ ba harɛre la teŋɛ dɔŋa nɛ, dɛ pɔ ba nɛ. Korowii Israel tena aa dɛ tomɔ laanee yoa tɛɛ ba.

⁴³ Anɔ habɔɔ la, Josua ne o laa tena bwa kaa Gelɡal bela baa baŋre ba tɛnte deene la dɛ ka so.