Josua 1 - mzwDBL

Korowii baɡle Josua waa waa ɛ

¹ Korowii bonɔɔ Mosis seo habɔɔ la, Korowii ŋɔ Nun bibaa Josua, o fa aa dɛ cha Mosis la be ŋɔ,

² “Josua, n bonɔɔ Mosis sewɔ, anomanta, he ne Israel tena kpɔ he te dɛ́ ir ɡale kaa Jɔɔdan Moo baŋ harɛ maa kpɔa dɛɛ ba heyaa tɛɛ la ta.

³ Gɛ n fa aa baɡɛ Mosis nyoa laanee kɛŋɔ mɛɛ kpɔ harɛ la bobɛlbwa haa kpɔ o ta laanee tɛ heya.

⁴ He harɛ la nyoa ɛɛ le weekaŋle harɛbɔr pua hɛŋle ɡbo harɛ la taa, dɛ́ kaa weekaŋle nyunduabɔr Lɛbanɔn bwejena ta, dɛ́ kpoŋe kaa Yufretis Moo ta wee leebɔr, dɛ́ kaa Hiti tena harɛ ta bwa, dɛ́ kpoŋe kaa wee cholibɔr Mɛdetereenea Mpo la ta.”

⁵ Korowii berɔ ŋɔ Josua be ŋɔ, “Nomɛlbwa toole dɛ́ won pɔ he nɛɛ wobɛlbwa ta he soɡa bini. Gɛ maa ja Mosis nɛɛ la, ɡɛɛ mɛɛ ba he ɡe nɛɛ jae maa wola habɔɔ le bwa.

⁶ Kɛ che kiŋkiŋ, dɔ bambile, henee dɛɛ ba Israel tena sie tɔe ba ka so harɛ maa kpɔa baɡɛ ba naawa nyoa la ta.

⁷ Che kiŋkiŋ, dɔ bambile kohona. Gel he sie chɔ harɛ hɛɛ teŋɛ mmarare la bwa n bonɔɔ Mosis aa kpɔa tɛɛ la ta. Bɛ sie laa kpɔ a ta dɛ́ dɔ kɛrɛdɛ bela bwa haa kaa.

⁸ Nyiŋi kɛrɛdɛ dɛ bɛ ɡel waa aa lɔ mmarare tɔn la bini paŋɛ saŋ te bɛlbwa. Dɛɛ kuro chɔɔ ne jwaana dɛ́ nyiŋi kɛŋɔ hɛɛ dɛɛ teŋɛ wobɛlbwa aa lɔ o bini taa. Anee dɛ́ ɡel wobɛlbwa do wer tɛ heya, he won ka so harɛ la ta.

⁹ Bɛ soh kɛŋɔ maa ŋɔ he be ŋɔ he che kiŋkiŋ dɛ́ dɔ bambile la! Bɛ ɔmɛ, bɛ ɡel he bwara ɡe yɔr. Men, Korowii haa dɛ tom mɛ la, n teŋɛ he nɛɛ bobɛlbwa haa kaa.”

¹⁰ Ate, Josua ŋɔ ba bini nomonome be ŋɔ,

¹¹ “Hé valɛ Israel tena be bela bwa baa soɡa, dɛ́ ɡel ba no kɛŋɔ kerele ɡbosoo yaa le Jɔɔdan Moo baŋee, dɛ́ ka lɛ harɛ Korowii haa dɛ tomɔ la aa kpɔa dɛɛ tɛ heyaa ŋɔ he kpɔ la. Anomanta, he nyin kondikwaa cheɡ.”

¹² Josua ŋɔ Rubin ne Gad deene dɛ Manasɛ dea pera tena bane be ŋɔ,

¹³ “He bɛ soh kɛŋɔ Korowii bonɔɔ Mosis fa aa ŋɔ he be ŋɔ, ‘Korowii haa dɛ tomɔ la aa ŋɔa wɛɛ kpɔ harɛ waa chɔ Jɔɔdan Moo wee leebɔree tɛ heyaa he so o ta la.’

¹⁴ Anomanta, hé ɡel he haahna ne bii ne he kondɛɛra te ka harɛ Mosis aa bɔna tɛ heyaa Jɔɔdan Moo wee leebɔr la ta bela, ásɛ he laa tena kpɔ ba te dɛ́ tɔ sie ɛɡɛ Moo la le he bala Israel tena la nɛ, dɛ́ ka cha ba,

¹⁵ dɛ́ ka tel kɛŋɔ Korowii aa ɡela ba bwara sɔɔh ba ɡɛ waa ɛa tɛ heyaa la, ka tel kɛŋɔ ba ɡe aa kaa dɔ harɛ Korowii haa dɛ tomɔ aa kpɔa tɛɛ baa la. Mɔɔ he berɛ kaa he ɡbaɡba harɛ Korowii bonɔɔ Mosis aa kpɔa tɛ heyaa o do Jɔɔdan Moo wee leebɔr la ta.”

¹⁶ Anee ba ŋɔ Josua be ŋɔ, “Yaa ɛ wobɛlbwa haa bol ya be nɔɔ, dɛ́ la bobɛlbwa ɡe haa tomɛ yaa.

¹⁷ Yaa no he nyoa wobolee ɡɛ ya fa aa dɛ no Mosis waa la. Ya dɛ soŋe Korowii kɛŋɔ ó ja he nɛ ɡɛ o fa aa ja Mosis nɛɛ la.

¹⁸ Nomɛlbwa waa ɛ deŋnekpeɡ waa wola he waa taa teŋɛ la, kpoe yaa ba o kpoe. He te che kiŋkiŋ, dɔ bambile!”