Jona 3 - mzwDBL

Jona Niniwe laŋa

¹ Korowii berɔ ŋɔ Jona be ja ŋɔ,

² “Ir kaa bwɛjen Niniwe, dɛ́ ka bol waa n fa aa bol he be la bela tena be.”

³ Ate, Jona ta vɛɛh kpa, dɛ ir kpɔ waa la kaa Niniwe. Bwɛjen la kan taeh. Tɔpera atoroo nɛn ɛɛ ba wona valɛ dɛ ɡaaɡe bwɛɛ la bini bwa.

⁴ Jona jo bwɛjen la bini dɛ valɛ tɔpebir. Waa waa dɛ bol laanee kɛŋɔ, “Bonɔ tɔpera fifraanaarɛ Korowii ɛɛ chɔɡ Niniwee.”

⁵ Niniwe tena la aa no waa la la, ba yarada Korowii dɛ ŋɔ, nomoa oo, bechala oo, bɛlbwa vɔwɛ nyoa dɛ́ kpɔ lweyal tɔ á baɡle kɛ ba charɛ ba liire dɛ le ba wechɔɡa ta.

⁶ Hale bwɛɛ la kooro aa no o bwɛɛ la chɔɡa waa la, o fuɡro ir o kookara ta, dɛ wur o yal waa tɔɔ la ta, dɛ kpɔ lweyal tɔ dɛ ka so tɔɔ ta.

⁷ Asɛ ba lɔ dawuro bwɛɛ la bwa ŋɔ, “Kooro ne o nomonome ŋɔ, ‘Nomɛlbwa bɛ kwaa di, o bɛ nee nyɔ, o bɛ o kondɛɛra kɛŋɔ nae ne peera dɛ boohna ya ta á ka di, kɛɛ á ka nyɔ ne.

⁸ Nomɛlbwa tɔ lweyal, ásɛ dɛ pee ane do o kondɛɛra ɡe. Bɛlbwa ɡel o wechɔɡa ne dachɔɡe waa lɔ a ta, dɛ́ wi dɛɛ yerɛ Korowii.

⁹ O baah ken ɛɛ sɔɔhnoo, ásɛ o dɔ tedoma tɛ yaa, dɛ́ charɛ o liire le o bandia waa dɛ ba kpɔe ba chɔɡ yaa la ta, ásɛ ya bɛ serewe.’ ”

¹⁰ Belaa Korowii aa naa kɛ ba charɛ ba liire le ba wechɔɡa ŋwɛnɛre ta la, o tea domɛ ba nɛ, dɛ ɡel chɔɡa waa ŋɔa wɛɛ chɔɡ baa la.