Joel 3 - mzwDBL

Korowii ɛɛ bol harɛre nɛra waa dɛ́ pa bole

¹ Korowii ŋɔ, “Saŋ maa lea cheɡ la telo aa, mɛɛ ɡeloo Juda harɛ ne Jerusalam tena wobɛlbwa berɛ do wer tɛɛ ba.

² Mɛɛ boa harɛre nɛra nyoa dɛ́ ba bane Jehosafat Fɛlembɔjen bini. Belaa mɛɛ ba ń ba bol ba waa dɛ́ pa bole, waa bwa baa kpɔa ɛ n nɛra Israel tena la, dɛkalkɛ ba lɔ ba peɡre harɛre nɛra bini dɛ bɔne n harɛ.

³ Ba ta bie n nɛra nɛ, dɛ́ jemɛ nɛra baa dɔ bá ɛ ba yoma, ba yoɡ ba bibaala ne bihaahna, dɛ kpɔ ba suuɡa bɔ hanjwamanere ne sen kem.

⁴ Nɛra haa lɔ bwɛjena Taaya ne Sidon dɛ harɛre aa lɔ Filisti bwa, bɔkwa waa n ne he dɔɔ? He dɛ bɔ mɛ waane maa ɛ heyaa kem kɛɛ? Dɛ kemee hɛɛ bɔ mɛ tenaa, mɛɛ ɡeloo a berɛ ba ɡure he nyu ta warane.

⁵ Hé kpɔ n suuɡapoŋa ne suuɡaswɛm dɛ n kondɛɛɡa kaa ka cheɡ he voɡa deene bini.

⁶ He lawɛ Juda harɛ ne Jerusalam tena le ba harɛ ta kaa bojaŋ harɛ ta, dɛ ka yoɡ ba tɛ Grik tena.

⁷ N dɛ ba n laɡ ba le harɛre haa yoɡ ba tɛ la ta, ásɛ waa haa ɛɛ ba la ɡure he nyu ta.

⁸ Mɛɛ yoɡ he bibaala ne bihaahnaa tɛ Juda harɛ ta tena, ásɛ ba ɡe yoɡ ba tɛ Seba tena baa soɡe bojaŋ harɛ ta la.” Korowiirii bola.

⁹ “Hé bol harɛre nɛra be ŋɔ, bá kpɔ ba te dɛ́ ka yo laa! Bá yerɛ banyoola la bwa, dɛ́ boa laa tena la bwa nyoa bá ba yo!

¹⁰ Hé kpɔ he para loɡɛ tokobie dɛ́ beɡre he ɡoori lampeare. Asɛ nɛra baa ɡwɛɡra ɡe ŋɔ, ‘Ya bwara kpeɡri!’

¹¹ Harɛre aa bara cheme bwa nɛra, hé le ba ka boa nyoa warane fɛlembɔjen la bini.” N Naa Korowii, ba he banyoola ne dɛ́ ba yoo ba.

¹² Harɛre ta nɛra bwa ir nyu ne, dɛ́ ba kaa Jehosafat Fɛlembɔjen la bini. Belaa men Korowii ɛɛ ba bala dɛ́ ba so, dɛ́ bol harɛre nɛra baa bara cheme bwa waa dɛ́ pa bole.

¹³ Ba nyu bini kpeɡri kohona. Teŋ ba ta kɛŋɔ mea koma saŋ ba yon teŋni a daa la. Tiɡri ba nɛɛ kɛŋɔ ba yon tiɡri ɡrepo nɔna ta, ka tel kɛŋɔ a nee yon su kwa, hale dɛɛ ta la.

¹⁴ Nɛra kaɡboŋa baa wola nyoa dɔe, lɔ Jehosafat Fɛlembɔjen bini. Dɛkalkɛ, Tɔpere Korowii aa lea cheɡ la telo tonɛ, fɛlembɔjen la bini.

¹⁵ Korobie ne wee aa lɔ, ásɛ bɔr bir, weweela ɡe aa chaah kpa.

¹⁶ Korowii ɛɛ kɔroo le Saayɔn Bwejen ta, o taa do kɛŋɔ bwaala aa dɛ kɔɡre ken, o le Jerusalam dɛɛ ba, nyundua ne harɛ ɛɛ jiɡri. Korowii ɛɛ doo kɛŋɔ danjwɛkpeɡ ken, ásɛ o nɛra chwa kaa marɔ.

Korowii ɛɛ swee o nɛra andɛɛɡaa

¹⁷ “Anee dɛɛ ba ɡela he jemɛ kɛŋɔ men Korowii haa dɛ tom mɛ, n soɡe n Saayɔn Bwejen waa do ɡoroŋ la ta. Jerusalam ɛ bwɛjen maa lea cheɡ o do ɡoroŋ, nɛŋhɔɔhra aa won ba yo dɛ́ pɔ n nɛra nɛɛ kpa.

¹⁸ Saŋ la telo aa, daa kooni ɛɛ warɔɔ dɛ́ tɔ bwejena ta, nae warɛ do deŋɡarere bwa ta, ásɛ Juda harɛ nenabɔɔne bwa ɡe su ne. Nenapale bɛl ɛɛ palɔɔ le Korowii Dea dɛ́ kaa Akaasia Fɛlembɔjen ta, dɛ́ sɔɔh bela harɛ la bwa.

¹⁹ Ijipt harɛ dɛ ba pɛɛ chɔe, ásɛ Edom harɛ berɛ pua hɛŋle ɡbo harɛ, yoi baa kaa yo Juda harɛ ta tena, dɛ kpoo nɛra baa wola wechɔɡa ɛɛ la wa.

²⁰ Nɛra ɛɛ so Juda ne Jerusalam harɛ saŋ bɛlbwaa, ka tel naanar baa ka ba bwa saŋ.

²¹ Nɛra baa kpoora maa wola kpɔe kɛ ba la, mɛɛ kpɔɔ kɛ ba, ásɛ dɛ ka so Saayɔn Bwejen ta.”