Joel 1 - mzwDBL

¹ Waa aa le Korowii be dɛ ba Pɛtoɛl bibaa Joel be laanee nɔ.

Tontombɛ ane wa

² Nomonome, hé cheɡ deŋne no, hé no, he nɛra haa lɔ harɛ ta bwa. Waa nɔ dɔŋa chiɡ he bere saŋ kɛɛ he naawa bere saŋ ta ka aa?

³ Hé bola he bii be, ásɛ ba bola ba ɡe bii be, ba bii la ɡe bola ba naanar baa ka ba be.

⁴ Dɛ tontombɛ ane balɔ, dɛ ba di kwaa kaa laa, anɔ la aa wara yon teŋɛ dɛ́ ba di. Anɔ la aa wara baa di kaa laa, anjeɡre ane ɡe ba di dɛ́ kaa, ásɛ ane kapa ɡe yon ba di a kabora.

⁵ Sennyɔdɛɛra, hé ɡel he sie chɔ harɛ hɛɛ wi, hɛɛ wi senfala wa, dɛkalkɛ ɡrepo nɔna baa harama dɛɛ ɛ sen la bwa chɔɡɔ.

⁶ Tontombɛ la do kɛ laa tena dɛ ba yo n nɛra, a kpeɡri dɛ warɛ, aa wola nyoa dɔe, a nyena do kɛŋɔ nyujente nyena ken.

⁷ A chɔɡ n ɡrepo daa maa kpɔa dɛɛ ɛ sen, dɛ chɔɡ n fiɡ daa kooni. A nyee a pɛɡa bwa, asɛ a kpala bwa to.

⁸ Hɛ́ɛ wi kohona kɛŋɔ bitolo aa liɡe lweyal dɛɛ wi o bechajaa waa sewa la ken.

⁹ Mea ne sen sarahare toole Korowii Dea kpa. Sɔfore baa dɛ ɛ toma Korowii Dea la bwa dɛ wi a wa.

¹⁰ Kooni bwa chɔ pɛɛ, asɛ harɛre bwa hol, mea ɡe bwa chɔɡ, ɡrepo nɔna bwa ɡe hol, ɔleve daa bwa chɔɡɔ.

¹¹ Paara, hɛ́ɛ di suna, hé nɛra haa dɔ ɡrepo daa kooni ɡe ɛɛ wi, mea bwa soo siwi chɔɡɔ, kondikwaa bwa chɔɡɔ kwaraa.

¹² Grepo ne fiɡ daa bwa holɔ, ɡɛɛ daa bɛlbwa waa dɛ nɔnɛ sewɛ. Kasinteŋ, nomɛlbwa ta silɛɛ dɔe kpa.

Liire chara wa

¹³ Sɔfore, hé kpɔ lweyale tɔ dɛɛ wi, heyaa dɛɛ ɛ toma saraha kon la ta. Hé la Korowii Dea ka so jwaana bwa dɛɛ wi, dɛkalkɛ mea kɛɛ sen sarahare aa Korowii Dea ba kpa.

¹⁴ Hé yerɛ nɛra bwa ba cheme, bá vɔwɛ nyoa. Hé yerɛ harɛ la nomonome bwa ba Korowii haa dɛ tomɔ Dea, dɛ́ ba wi noo bela.

¹⁵ Tɔpere Korowii aa lea cheɡ la telo, saŋ On Kpeɡri Bwa Dɔɔ la aa ba chɔɡa ne la. Wɛɛ ba ɔmee kohona nee ba ta nɛra nɛ.

¹⁶ Ya kondikwaare dɛ chɔɡ yaa wola won ɛ wobɛlbwa, silɛɛ bɛlbwa toole Korowii Dea kpa.

¹⁷ Harɛ holɔ anomanta, kondwee bwa pɔɔh. Deene baa dɛ cheɡ kondikwaa a bini bwa kuuɡo, dɛkalkɛ mea toole bá kpɔ do a bini.

¹⁸ Ya nae bwa dɛ wi dɛɛ di suna, a ta bɔr dɔe dɛ́ ɡaaɡe ka di, hale peera bwa bwara dɛ nyɛɡ.

¹⁹ N Naa Korowii, henee n wi dɛɛ no, nii fuh kondɛɛra dibɔra, dɛ fuh kpɔɡ bini daa bwa.

²⁰ Hale kpɔɡ bini ola wio dɛɛ noe, dɛkalkɛ nenabɔɔne hweehrɔ, asɛ nii fuh kondɛɛra dibɔra.