Job Tɔn 9 - mzwDBL

Job chaŋe Bildad

¹ Job chaŋe Bildad ŋɔ,

² “Kpelaa, n jemɔ kɛ a ɛ kasinteŋ. Aah ɛrɛɛ nɛwɛnyini ɛɛ ba wona di bole Korowii nɛɔ?

³ Umee dɛ́ won tɔŋle Korowii ɔ? Wɛɛ won pɛɛ webele kaɡboŋ, nɛn aa won chaŋe a bini beŋkpoŋ kwara.

⁴ Korowii dɔ wejema, dɛ do kpeɡri taeh! Umee dɛ́ won ɛ deŋnekpeɡ o nɛ, á chiɡu kɛrɛdɛ nɔ?

⁵ O huɡri bwejena dɛɛ ta, o baah diu waa, o dɛ chɔɡa.

⁶ Korowii ɡelɔ harɛ ɛɛ jiɡri dɛ́ le o buɡ ta, ásɛ kwaa waa chɔŋɛ a ta, a do kɛ pilare la ɛɛ yiiɡi.

⁷ Wɛɛ won ŋɔ wee bɛ le, jwaana ɡe weweela bɛ won chaah.

⁸ O ɡboo paɡri nyundua bɔle kɛ yal, dɛ berɛ won valɛ mpo nehɛma ta.

⁹ Onee ta weweela bwa soo siwi, ne anɔ la aa lɔ nyundua weekaŋle harɛbɔr.

¹⁰ O dɛ ɛ wejena nomɛlbwa aa wola won jemɛ a mun, dɛɛ ɛ nyokpowe-ɛɛla aa wola nyoa dɔe.

¹¹ Korowii kpɔ n jwɛɛh ba kaa laa, maa on na.

¹² Dɛ o ŋɔ wɛɛ lɛ komɛlee yaa, umee dɛ́ won tɔɔ ŋwɛnɛ ɔ? Umee dɛ́ won ŋɔ o be ŋɔ, ‘Bɔkwaa hɛɛ ɛ nɔɔ?’

¹³ Korowii baah diu waa, o ɡbaɡba aa won o te larawe warane, o dɛ sɔɔh mpo bini oljen ne kwaa aa dɛ chao la nyoa, á do o lɔɡa.

¹⁴ A do ɡɛ naa, n dɔ waane dɛ chaŋe Korowii aa? N ne waa won cheme.

¹⁵ Dɛ n waa fe toɡrɔ kwaraa naa, n fe aa won chaŋo, waa maa ɛ bwaa kɛ ń fe soŋe Korowii waa dɛ di n waa la ó sune n nɛ.

¹⁶ Dɛ n fe yerɔ o sɛh n be naa, maa lii kɛŋɔ o fe ɛɛ no n bee.

¹⁷ Wɛɛ ɡeloo peuchɔɡe ta dɛ́ lɔ mɛ bil, n bwara foɡri, aa wola mun dɔe.

¹⁸ Waa ɡel ń won hwee ɡba, dɛ́ kpɔ suna dii ta n nɛɛ kohona.

¹⁹ Dɛ kpeɡri waa yaa, onee kpeɡa dɛ ɡwaa mɛ! Dɛ kɔɔto ɡee yaa, umee dɛ́ won la o ne nɔ?

²⁰ N waa fe toɡrɔ kwaraa naa, n wobol fe ɛɛ pa mɛ bolchɔɡee. Wobɛlbwa fe toole n nɛɛ aa, n waa fe ta maɡrɛ.

²¹ N waa toɡrɔ te, kɛ n waane laa wobɛlbwa aa ba n nɛ. N soɡa bini pe mɛ.

²² A bwa beŋkpoŋ, a waa n ŋɔ, ‘Korowii dɛ chɔɡ nɛra ba wa aa toɡra, ne wechɔɡ-ɛɛra bwa la.’

²³ Wekpeɡa piɡro ba seo ne naa, Korowii dɛ mamɛ nɛn wobɛlbwa aa wola toole o nɛ.

²⁴ Harɛ bɛl baa do nɛnchɔɡa nɔn ta naa, Korowii dɛ damɛ nɛra baa dɛ di ba waa liire. Dɛ o laa aa, umee dɛ́ won ɛ ɡɛ nɔ?

²⁵ N soɡa bini tɔpera dɛ kaa warawara kɛŋɔ nɛn waa dɛ chwa, silɛɛ bɛlbwa ɡe toole a ta.

²⁶ A do kɛŋɔ ɡbera aa chɔŋɛ nee sie dɛɛ kaa warane, kɛɛ kee aa le nyundua, dɛɛ ba ba lawɛ kon di la ken.

²⁷ Dɛ n ŋɔ mɛɛ soh n weweelee yaa, atane n tɔ nyoa, dɛ́ kwaa n sie do, dɛ mamɛ.

²⁸ N weweele bwa ta, n dɛ ɔmɛ, n jemɔ kɛ Korowii ɛɛ pa mɛ bolchɔɡee.

²⁹ Dɛ n di bolchɔɡe aa, a chɛ kɛŋɔ ń koh ta pɛɛ ja aa?

³⁰ Hale n sɔ semina dɛ sarame nɔɔra o ne kwaraa naa,

³¹ Korowii ɛɛ taɡ mɛɛ do bɔluŋ doŋa aa lɔ o bini, n bwara laala kwaraa aa men nyin, kɛŋɔ nɛn yon hah o dɔŋ la.

³² O ta nɛn ɛɛ ásɛ n ŋɔ mɛɛ chaŋoo, kɛɛ dɛ́ ŋɔ n ne wɛɛ ka che kɔɔtoo.

³³ Kɛ nomɛlbwa toole dɛ́ ba che n ne Korowii baah ta dɛ́ bol ya wa.

³⁴ N Naa Korowii, ɡel n deŋne tɛra, laa ɔmee bɛlbwa kpɔ n nɛ.

³⁵ N fe ɛɛ bol waa maa wola ɔmɛ, kɛ ɡɛ aa doa taraken nɔ, maa won bol.”