Job Tɔn 8 - mzwDBL

Job dam Bildad wobol

¹ Bildad waa le Su la chaŋe Job ŋɔ,

² “Saŋ besoo he wobobala nɔ ɛɛ ba tona ɔ? He wobol do kɛŋɔ peukpeɡ, kɛ a ɛ wepuu.

³ Waa aa ɛ kasinteŋ la, Korowii dɛ ɡolaa? Waa aa toɡraa Korowii Waa Ɛ Kpeɡri Bwa Dɔɔ la ɛɛ ɛ.

⁴ He bii ken ɛ Korowii wechɔɡa, a waa o tɛr ba deŋne ɡɛ aa chɛa.

⁵ Dɛ he dɛ nyin Korowii bɔr, dɛ́ ɡuŋi dɛɛ soŋe On Waa Ɛ Kpeɡri Bwa Dɔɔ la,

⁶ dɛ he waa wer dɛ toɡre aa, wɛɛ ba chae dɛ́ berɛ tɛɛ sobɔrdɛɛɡe a ɛɛ kembɔr.

⁷ Kwaa haa dɔa mumpar la ken aa kanɛ, anɔ la Korowii aa ba tɛɛ a habɔɔ la ɛɛ do kanee kohona.

⁸ Ta sie nyiŋi, saŋ la tena waa bini, dɛ na waa ya naawa aa hwela.

⁹ Ya te aa biɡri, yaa wobɛlbwa jemɛ, ya soɡa bini do kɛŋɔ lileo ken harɛ nɔ ta.

¹⁰ Hé ɡel ya naawa wejema baɡle heyaa wa, dɛ́ nyiŋi waa baa bola bil la ta kɛrɛdɛ.

¹¹ Bela nee aa lole laanee pul won kpeɡa kɛrɛdɛ, aa won kpeɡ bela nee aa wola toole.

¹² Nee la hweehraa, anee tɔ sie dɛɛ hol, kɛ dɛ a ta kpeɡe kɛŋɔ ba kua dɛ́ kpɔ ɛ wobɛlbwa.

¹³ Gɛɛ nɛra baa soh Korowii waa la bwa do, baa vɛh Korowii nomanta, ba ta hwɛɡa dɔe.

¹⁴ Kon baa kpɔ ba hwɛɡa dawɛ o ta, do kɛ ŋwandare yal ken.

¹⁵ Ba yale ŋwandare yal ta naa, wɛɛ won laɡ ba kpoŋaa? Ba lawɔ kpoŋe aa, baa won che naa?

¹⁶ Wechɔɡ-ɛɛra do kɛ kpɔɡa aa kpeɡa dɛ che webaah, ba do kɛŋɔ anɔ la aa moɡa tɔ bodɛɛɡe baa du daa.

¹⁷ A dɛ ta lune bar bwea, ásɛ dɛ lawa kpoŋe kiŋkiŋ.

¹⁸ Kɛ dɛ nomɛl tua le bela aa, nomɛlbwa aa jemɛ kɛŋɔ a fa lɔ bela.

¹⁹ Gɛɛ a do, silɛɛ wechɔɡ-ɛɛra aa dɔa laanee, banfalaa yon ba so ba buɡ ta.

²⁰ Kpelaa, Korowii aa nɛra ba waa aa dɔ kasinteŋ la vɛh bwa, ɡɛɛ waa wola wechɔɡ-ɛɛra ɡe cha.

²¹ Wɛɛ ɡeloo he sie lɛ he mamɛ, dɛ́ hɛɡre dɛɛ moo.

²² Wɛɛ ɡeloo sihiih kpo he dɔma, wechɔɡ-ɛɛra deremi ɡe chɔɡ.”