Job Tɔn 7 - mzwDBL

¹ Job berɔ ŋɔ, “Nɛwɛnyini soɡa bini, tomkpeɡaa chɔ le dɛ tɛo, kɛŋɔ paate waa dɛ ɛ toma la.

² A do kɛŋɔ yom aa nyin chunchule dɛɛ onɛ, kɛɛ paa te aa dɛ kpa o kembɔr la.

³ Gɛɛ mɛɛ so korobie bɛlbwa pɛɛpɛɛ, jwaana bɛlbwaa mɛɛ na wa.

⁴ N yon chɔ dɛɛ lii ŋɔ, ‘Bɛweeree bɔr ɛɛ ba chaahna ń irɔ?’ Dɛ chɔ kalaŋ ta, dɛ beɡre ɡɛ naa dɛɛ nyin bɔr chaah.

⁵ Dudule ne ŋwɛra su n bwadabii bwa, nee ɛɛ le n ŋwɛra ta.

⁶ N tɔpera teŋo baa kaa warane kɛŋɔ yasɔɔh aa dɛ ta kokorowa la, a dɛ tonɛ kɛ dɛ n ta hwɛɡa dɔe.

⁷ N Naa Korowii, bɛ soh kɛŋɔ me mkpa ka kerabeŋkpoŋ hweera, silɛɛ toole n soɡa bini kpa.

⁸ Taraken haa na mɛ nɔ, haa men na kpa, hɛɛ baa nyin n bɔree, dɛ n toole.

⁹ Gɛ bam aa wola le do saŋ bɛlbwa la, ɡɛɛ nɛn sewaa waa wola ba kpa.

¹⁰ Waa berɛ ba so o dem kpa, bela o fa aa soɡa la, baa on na kpa.

¹¹ Anomanta, maa nyoa tɔ, mɛɛ che n weweele taa, dɛ́ bol waa sum ne.

¹² N ɛ mpo, kɛɛ o bini oljen asɛ hɛɛ do mɛ dɛɛɡɔ aa?

¹³ N Naa Korowii, n baa chɔ kalaŋ ta dɛ́ ŋɔ n onaa, n chɔɔbɔr la ɡelɔ waa aa dɛ ha mɛ la nyoa ɛɛ sɔɔh,

¹⁴ bela kwaraa la, he dɛ aah mɛ deera ta, he ɡelɔ mɛɛ na wepila dɛɛ ɔmɛ,

¹⁵ dɛ́ ɡel n pɛla lawɛ kɛŋɔ baa hamɛ n lobi n sewɛ dɛ ɡwaa kɛ aa ka n hoɡa ɡbo nɔ.

¹⁶ N soɡa bini pe mɛ, maa nyin kɛ n so le dɛɛ la. Gel mɛ, n soɡa ta mun dɔe.

¹⁷ Bɔkwaa nɛwɛnyina ɡe ba waa hiaeh nɔ? Ɛrɛɛ hɛɛ dawɛ waa baa dɛ ɛɔ?

¹⁸ He dɛ nyiŋi ba we-ɛɛla, chɔɔ bɛlbwa dɛɛ daah ba saŋ bɛlbwa.

¹⁹ Haa sie laa kpɔ n nɛɛ tama, dɛ́ ɡel n lile nentane kwaraa naa?

²⁰ Dɛ n ɛ wechɔɡa kwaraa naa, bɔkwa waa n ɛɛ nɔ? He laa dɛɛ daah nɛra la aa? Ɛrɛɛ he fome siwi pa n nɛɛ nɔɔ? N ɛ bone tɛɛ kɛɛ?

²¹ Ɛrɛɛ haa wola n wechɔɡa kpɔe kɛ mɛ, dɛ ɡel waa maa koni a ta la taɔ? Maa biɡri chɔ n banɔn ta, hɛɛ dɛɛ nyin n bɔree, kɛ dɛ n toole.”