Job Tɔn 6 - mzwDBL

Job wobol

¹ Job chaŋe Elifas ŋɔ,

² “Dɛ ba fe kari n wenaale ne n suna maa dɛ di bwa naa,

³ a fe ɛɛ do tɔɡree ɡwaa mpo nyoa hɛŋle bwa, a waa he na kɛŋɔ n wobol la bini nyɛɡre la.

⁴ Korowii Waa Ɛ Kpeɡri Bwa Dɔɔ la ta mɛ hɛma, asɛ tɛɛɡa aa lɔ a ta la jooɡe n bini. Korowii kpɔ wenaale aa do ɔma teŋɛ dɔŋa nɛɛ ta n nɛ.

⁵ Keeɡo dɔ kpɔɡa dɛɛ chwe aa, waa si, ɡɛɛ nabal ɡe dɔ kwaa dɛɛ dia aa, waa wola si.

⁶ Yar toole kondikwaa ta naa, a dɛ do som aa? Jahal kompoŋ ɡbo som aa?

⁷ N pɛla aa ɡɛ kondikwaa nɔ dɔ, a dɛ tɛ mɛ weela.

⁸ N dɛ soŋe Korowii ó tɛ mɛ anɔ la n pɛla aa lawa, kɛ ó fe tɛ mɛ komɛlbwa n hwɛɡa aa lɔ a ta,

⁹ kɛŋɔ wɛɛ sɛoh ba kpo mɛ, ásɛ dɛ teŋe me mkpa ta.

¹⁰ Belaa mɛɛ ba bolarawa dɔe n sie lɛ, n weweele aa wola tonɛ bwa ta, á baɡle kɛŋɔ n ta Korowii O Wa Aa Do Goroŋ la waa vɛɛh.

¹¹ N dɔ bokpeɡa dɛ ta dɛɛ hwɛɡɛ kɛ mɛɛ so lee yaa? Ɛrɛɛ mɛɛ ba le soɡa dɛ n ta hwɛɡa dɔe yɔ?

¹² N bwara kpeɡri kɛŋɔ bwe aa? Kɛɛ n bwadabii do kɛŋɔ ayaawa ɔ?

¹³ N ta kpeɡri dɔe dɛ́ lɛ n te, bobɛlbwa toole ń kpɔ sie chaɡɛ nɛn cha mɛ.

¹⁴ Dɛ waa pu nɛn aa, a chɛ kɛ o daamanar ɛɛ chao, hale dɛ o vɛh Korowii Waa Ɛ Kpeɡri Bwa Dɔɔ ɔma kwaraa noo.

¹⁵ Kɛ n bala ta nɛra maa kpɔ n te dawɛ ba nɛɛ ɛɛ, ba do kɛŋɔ nenabɔɔne bwaala yon nɛ a su, o baa ɡel nɛɛ yaa, a yon hweeh la ken.

¹⁶ Dombwea baa ta aa, nenabɔɔne dɛ suuɡi,

¹⁷ kɛ wee baa lɔ aa, dɛ a mwɛɛlɔ, a bini yon hol dɛ chɔ pɛɛ.

¹⁸ Nɛra baa soɡe nyoɡmare ta, dɛ valɛ dɛɛ ɡaaɡe nee dɛ nyɔ nyoɡrɔ, ba ɡaaɡɔ dɛ ka serewe pua hɛŋle ɡbo harɛ ta.

¹⁹ Nɛra soɡe nyoɡmare ta le Seeba ne Tema dɛ valɛ dɛɛ ɡaaɡe dɛɛ nyin ne.

²⁰ Ba hwɛɡa kaa tonɛ, nenabɔɔne aa hweehra bini.

²¹ Hé do kɛ nenabɔɔne la n be, he ta chae bɛlbwa dɔe, he na waane aa ba n nɛ dɛ ɔmɛ dɛ le habɔɔ.

²² N bol he be kɛŋɔ he tɛ mɛ komɛl, kɛɛ he che n naa ta bɔ komɛl tɛ nomɛl, dɛ́ le he kondɔɔh ta naa?

²³ Kɛɛ he lɛɛ mɛ le n dɔma nɔn ta, kɛɛ dɛ cha mɛ le nɛn waa dɔɔ mɛ, o nyu bini do kpeɡri nɔn ta nɔ?

²⁴ A wer, hé baɡ mɛ n wechɔɡa maa ɛa, mɛɛ tɔ nyoa dɛ́ no he be.

²⁵ Kasinteŋ dii dɛ we, kɛ waa haa dɛ bol nɔ ta mun dɔe.

²⁶ He dɛ lii ŋɔ n dɛ bol wepuu, ɛrɛɛ hɛɛ chaŋe n waa, kɛŋɔ nɛn waa wola kerekere waa lii nɔɔ?

²⁷ Hɛɛ won ta bie bilalbii waa kwara! Dɛ yoɡ he daamanar dɛ́ dɔ suuɡa.

²⁸ N dɛ soŋe heya, hé nyiŋ mɛ kɛrɛdɛ! Mɛɛ teŋe nyosone he sie yaa?

²⁹ Hé berɛ nyiŋi a bini, dɛ bɛ men bolchɔɡe pa, hé kwaa lii, dɛkalkɛ n waa la wer.

³⁰ Nyosone ane le n nyoa kɛɛ? Maa wedɛɛɡa ne wechɔɡa jemɛ aa?”