Job Tɔn 5 - mzwDBL

¹ Elifas berɔ ŋɔ, “Job yerɛ na, umee dɛ́ chaŋe nɔ? Nyundua torome bɛl lole dɛ́ no he be naa? Akai!

² Bandia dɛ kpo ɡɛne, sibeɡra ɡe ɛɛ kpo nɛn waa wola wobɛlbwa jemɛ.

³ N ɡbabir na nɛn waa ɡɛna o soɡa bini do wer, kɛ buɡ la ta, nyotaahna chole o dem.

⁴ O bii dɛ na sibeɡrewaa kohona, nɛn toole dɛ́ bol ba waa tɛɛ ba kɔɔto.

⁵ Nɛn lɔr aa dɛ kpoo dɛ́ di ɡɛne kondikwaa waa dua, hale anɔ la aa lɔ sɔɔhne baah, asɛ nɛn waa dɛ nyin kafo siwi ɛɛ beɡre ɡɛ ɡɛne la kondɔɔh.

⁶ Teera ta laa wechɔɡa le kɛŋɔ konduuli, a ta laa wenaale le.

⁷ Ba lolɛ nɛn aa, dɛ o ne waa, kɛŋɔ nihɛm yon chuɡri dɛɛ kaa nyundua la.

⁸ Kɛ dɛ menee yaa, n fe ɛɛ soŋe Korowiirii, dɛ́ kpɔ n waa bil o sie.

⁹ Wejena haa wola won no a munii Korowii ɛɛ ɛ, nyokpowaa haa wola won kuraa wɛɛ ɛ.

¹⁰ O ɡelɔ bwaala ɛɛ nɛ harɛ ta, dɛ ɡel wɛɛ tel kpɔɡbaah bwa.

¹¹ Korowii dɛ tɛ nɛŋɡwɛɡra chebɔr, banɔ la baa dɛ wi ɡe dɔ silɛɛ.

¹² O dɛ chɔɡ nɛra baa dɛ lii kɛŋɔ ba jemɛ waa liire, dɛ ɡel baa won wedɛɛɡa bɛlbwa ɛ.

¹³ O ɡelɔ nɛra baa dɛ lii kɛŋɔ ba jemɛ waa la ɡbaɡba liire ɛɛ laɡ ba, wobɛlbwa baa ɛ la aa maɡre.

¹⁴ Biro dɛ ba ba nɛɛ webaŋa, baa laɡre bɔr kɛŋɔ jwaana ken.

¹⁵ Korowii lɛ nɛra dɛɛ le ba seo nyoa, o lɛɛ ba dɛɛ le fiiɡa ta.

¹⁶ Anomanta, banɔ la aa hiah ba dɔ hwɛɡa, nɛnchɔɡa ta waa dɔe dɛ́ bol kpa.

¹⁷ Nomɛlbwa Korowii aa dɛ kaoh la na som, anomanta, dɛ Korowii Waa Ɛ Kpeɡri Bwa Dɔɔ la dɛ toɡre naa, bɛ an wesale lii.

¹⁸ Onee dɛɛ do nɛn bol dɛ berɛ dɛɛ vɔrɔwo, dɛɛ do nɛn weela dɛɛ chaoh.

¹⁹ Saŋ bɛlbwa Korowii ɛɛ lɛɛ le wenaale ta.

²⁰ Lɔr saŋ wɛɛ lɛɛ le seo nyoa dɛ́ lɛɛ le laa ta.

²¹ Wɛɛ lɛɛ le chɔɡa nɛra aa dɛ chɔɡe ta, wekpeɡa dɛ ba he nɛ aa, bɛ ɔmɛ, wɛɛ kpɔ nɔnee tɔ he nɛ.

²² Lɔr ne wekpeɡa dɛ ba naa, hɛɛ soo dɛɛ mamɛ, haa kpɔɡ bini olaa ɔmɛ.

²³ Koo haa parɛ la, bwea aa o taa do, kpɔɡ bini olchɔɡa aa hen ɡbaa bwa.

²⁴ Hɛɛ nao kɛŋɔ he dem sɔɔhnɔ kɛrɛdɛ, he kure he kondɔɔh, dɛ́ na kɛŋɔ bɛlbwa ta nyoɡrɛ.

²⁵ Hɛɛ nao ɡe kɛŋɔ he bii warɔ, ásɛ he naanar warɛ kɛŋɔ kpɔɡa ken.

²⁶ Hɛɛ dɔ mkpajaŋee, he bwara ta do kpeɡri mɔɔ he sewɛ, kɛŋɔ mea yon be kɛrɛdɛ mɔɔ ba koma la.

²⁷ Job, ya ɡbabir nyiŋi ɡɛ waa nɔ, dɛ na kɛŋɔ a ɛ kasinteŋ. Anomanta, kpɔ dɛ ɛ ɡɛ tenten.”