Job Tɔn 42 - mzwDBL

Job chaŋe Korowii

¹ Anee Job chaŋe Korowii ŋɔ,

² “N Naa Korowii, n jemɔ kɛŋɔ henee dɔ kpeɡri kohona. Nomɛlbwa aa won tɔe ŋwɛnɛ wobɛlbwa ta.

³ He bɔɔ mɛ ŋɔ, ‘Umee hen hɛɛ tɔŋle n waa wobol aa wola mun dɔe ne nɔɔ?’ Kasinteŋ, n bol waa maa wola a mun no, waa aa ɛ nyokpoa kohona, maa wola a mun jemɛ.

⁴ He ŋɔ, ‘Cheɡ deŋne ń bol waa he be, mɛɛ bɔɔre waa ásɛ he chaŋ mɛ.’

⁵ Noe n no nɛra ɛɛ bol he wa, kɛ taraken, n ɡbabir kpɔ siwi nae.

⁶ Anomanta, sihiih kpo mɛ n charɛ n liire dɛ so bomboɡ ne tɔɔ ta, á baɡle kɛŋɔ n bambile chɔɡɔ.”

Waa la jaɡa

⁷ Korowii aa bol ɡɛ waa nɔ baɡle Job tonɛ la, o ŋɔ Elifas, Teman te la be ŋɔ, “N baah di he ne he daamanar banɛ la nɛ, dɛkalkɛ he ta n bwara wedɛɛɡe bolɛ kɛ n bonɔɔ Job.

⁸ Anomanta, lawɛ nabala anuanɛ ne pebala anuanɛ ka tɛ n bonɔɔ Job ó kpɔ ɛ saraha baa dɛ fuah tɛ heya. Wɛɛ soŋoo tɛ heya, ásɛ n no dɛ bɛ he deŋne tɛr he ɡɛna waa kpa. He ta n waa kasinteŋ bolɛ kɛ n bonɔɔ Job.”

⁹ Asɛ Elifas ne Bildad, dɛ Sofar ɛ ɡɛ Korowii aa ŋɔ ba be la, asɛ Korowii no Job wesoŋa la.

¹⁰ Ate, Job aa soŋa tɛ o daamanar batoro la tonɛ la, Korowii ɡelɔ o ɛ kondɔɔh ja. O dɔ anɔ la o fa aa dɔa la bele anɛ ja.

¹¹ O dɔɔranar ne nimanar ne nimambii, dɛ nɛra ba fa aa jemɔ bwa ba o dem, ba ne o di kwaa dɛ lɛ ba sie. Ba bwɛɛlo dɛ larawe o bwara wenaale Korowii aa ɡela o na la wa, asɛ bɛlbwa tɛo suuɡa ne suuɡaswɛm noniseɡ.

¹² Korowii swee andɛɛɡa tɛo dɛ ɡwaa loɡla la. O berɔ dɔ peera kaɡboŋa fi dɛ anaarɛ, nyoɡmare kaɡboŋa anumɛl, nae baa kpɔa dɛɛ parɛ kaɡboŋ, dɛ keeɡore kaɡboŋ.

¹³ O bibaala lɔ banuanɛ dɛ bihaahna batoro.

¹⁴ Bihaah waa tɔ sie sɔne Jemima, nɛɛte sɔne Kesia, asɛ toorote ɡe Keren Hapuk.

¹⁵ Dɛ haah bɛlbwa toole dɛ do wer harɛ la ta kɛŋɔ Job bihaahna la, asɛ ba mɛɛ tɛ bane ba nimanar ne dɔɔranar o kondɔɔh la pera.

¹⁶ Anɔ habɔɔ, Job berɔ dɔ bene lafa fifraanaarɛ. O soɡo dɛ na o bii ne ba ɡe bii ka tel naanar bele banaarɛ.

¹⁷ Anomanta, waa sewa dɛ o biɡro kɛrɛdɛ.