Job Tɔn 41 - mzwDBL

¹ Korowii berɔ bɔɔ Job ŋɔ, “Hɛɛ won ta ɡoŋa lawɛ lɛŋɔ, kɛɛ dɛ́ kpɔ ŋwɛn vɔwɛ o nyoa aa?

² Hɛɛ won kpɔ ŋwɛn do o mebɔɔ bini, kɛɛ dɛ́ kpɔ ɡoŋa lawɛ o nyoa aa?

³ Wɛɛ teŋɔɔ dɛɛ soŋe wobopwɛra ne ŋɔ hé na o sum aa?

⁴ Wɛɛ sɛoh he ne o fɔwɛ fɔo, ásɛ dɛɛ tomɛ saŋ bɛlbwa naa?

⁵ Hɛɛ won dɛɛro kɛŋɔ jumbie, kɛɛ dɛ́ do ŋwɛn o nakpala, he toli ɛɛ hɛlɛ o ne naa?

⁶ Bonadiire ɛɛ ba chemoo, dɛɛ nyin ba yawɔ, kɛɛ dɛ́ bɔne o bini naa?

⁷ Hɛɛ won yaɡɛ o bɔtɔn, kɛɛ o nyu tim ne naa?

⁸ He te kpɔ nɔn dawɛ o nɛɛ dɛ́ na, hɛɛ nao ɡɛ waa vuuɡi, haa won leɡo nɛɛtena kpa.

⁹ Nomɛlbwa toole dɛ́ won sɔɔh o nyoa, he siwi ne o nɛɛ dawa, dɛ he bwara yɔrɔ.

¹⁰ O ɡɔɔ o te naa, dɛ́ o ɔma. Nomɛlbwa toole dɛ́ won ba che o sie.

¹¹ Nomɛlbwa aa won ŋɔ men Korowii di o kem, komɛlbwa aa lɔ harɛ nɔ ta ɛ n kwa.

¹² Gel n baɡle ɡɛ lɛŋɔ nakpale, ne o kan ne o bokpeɡa aa doa.

¹³ Umee dɛ́ won wur o bɔtɔn, kɛɛ dɛ́ kpɔ kabaɡrare ba che o sie nɔ?

¹⁴ Umee dɛ́ won hah o nyoa, nyena aa do ɔma dɛ bar cheme nɔɔ?

¹⁵ O nyaŋ pɛɡa kpeɡri dɛ tɔ o nɛ, dɛ marɛ dɔŋa kiŋkiŋ ken.

¹⁶ Bɛlbwa marɛ dɔŋa, peu ɡba aa won jo a baah.

¹⁷ A deno marɛ dɔŋa kɛrɛdɛ ken, komɛlbwa aa wola won pere a baah.

¹⁸ O sio waa, a do kɛ nii aa dɛ le o mee ne o nyoa, o sibie swɛɛ kɛŋɔ chɔɔlen wee aa dɛ le ken.

¹⁹ Ninlao dɛ le o nyoa, nihɛma ɡe ɛɛ chuɡri kohona.

²⁰ Chuu dɛ le o mebɔɔne bini, kɛŋɔ vii aa chɔŋɛ kpɔɡa nii ta ken.

²¹ O hweeraa, hɔla dɛ lawɛ nii, ninlao chuɡri dɛɛ le o nyoa.

²² O kpeɡri lɔ o baŋa ta, a ɡelɔ nomɛlbwa waa chemo la, dɛ o dɛ ɔmɛ.

²³ O bwara bobɛlbwa kpeɡri kɛŋɔ buni, dɛ che kiŋkiŋ nomɛlbwa aa wola won taɡɔ.

²⁴ O bambile kpeɡri kɛ bwe ken, o kpeɡri ɡwaa nambwe kwara.

²⁵ O ɡɔɔ o te naa, ɔmee dɛ́ chole kpeɡnɛra nɛ, bá chwa le o sie dɛɛ kaa.

²⁶ Tokobii aa won ɛo waane, hale lampea kɛɛ hɛm wa bini bɛlbwa.

²⁷ Buni do kɛŋɔ haahra o siwi ta, ayaawa ɡe do kɛŋɔ daa waa pɔah ken.

²⁸ Waa hɛma nae dɛɛ chwa, vamtor bwea do kɛŋɔ haahra o be, aa on wobɛlbwa ɛ.

²⁹ Guli kpɔe dɛ lɔɔ do kɛŋɔ kpɔɡ o be, lampeare tae dɛ yaɡɔ ɛ wesoma tɛo.

³⁰ O tea pɛɡa do kɛŋɔ kaŋle, o dɛ tuuɡi kpechɛɡre ta kɛŋɔ baa tuuɡi daa ken.

³¹ O jo mpo vile ta naa, a dɛ wure kɛŋɔ newɔb, dɛ ɡel mpo ɛɛ wure kɛŋɔ, baa kpɔ sooma noo chɔŋɛ nii ta la.

³² O pere nee dɛɛ kaa laa, nehɛma dɛ to teŋɛ o nɛɛ kɛŋɔ nyumpompoŋa ken.

³³ Haa won kpɔ komɛlbwa maɡɔ harɛ nɔ ta, o ɛ hweera kon waa wola ɔmɛ.

³⁴ O na oljen bɛlbwa naa, o jeɡa tɛo o siwi ta, o dɛ di kora kpɔɡ bini oljena bwa nɛ.”