Job Tɔn 40 - mzwDBL

¹ Korowii berɔ ŋɔ Job be ŋɔ,

² “Umee hen hɛɛ tɔŋle Men Kpeɡri Bwa Dɔɔ rɔ? Dɛ ɡɛɛ yaa, amɔ te chaŋ mɛ.”

³ Anee Job chaŋe Korowii ŋɔ,

⁴ “N Naa Korowii, menee ume, ń ŋɔ mɛɛ chaŋee yɔ? Maa wobɛlbwaa bol.

⁵ N bol waa kpee he ta men chaŋɛ, dɛ bol nɛɛ, kɛ taraken maa waa bol kpa.”

⁶ Belaa Korowii bol waa Job be dɛ le peujen la bini ŋɔ,

⁷ “Ir dɛ́ ba che n sie, ásɛ n bɔɔree wa, he chaŋ mɛ.

⁸ Hɛɛ ŋɔɔ he waa wer, dɛ́ chɔɡ mɛ ŋɔ n te waa aa were kɛɛ?

⁹ He kpeɡri tel men Korowii aa? He nyɛɡa ɡe ɛɛ won do kan kɛŋɔ n nyɛɡa, kɛŋɔ bwaala aa kɔra aa?

¹⁰ Job, dɛ ɡɛɛ yaa, baɡle he nyanyini ne he kan haa doa, baɡle kɛŋɔ he kan nɛra ɛɛ duuri.

¹¹ Nyiŋi nɛra baa dɛ ɛ mbarafo, ɡel he baah di ba nɛ, ásɛ ba nyoa sɔɔh,

¹² nyiŋi, dɛ́ ba mbarafo te bɛlbwa ne harɛ, chɔɡ wechɔɡ-ɛɛra bobɛlbwa baa lole.

¹³ Huɡe ba bwa pɛ, kwaa ba sie sɔh lalbɔɔ bini.

¹⁴ Ate, n fe ɛɛ tɔ sie kpɔ jaamee tɛɛ, dɛ́ sɛh kɛ he kpeɡri ɛɛ won lɛɛ.

¹⁵ Nyiŋi kaka maa ta he ne on la na, wɛɛ chwe kpɔɡaa kɛŋɔ nao aa dɛ chwe la aa?

¹⁶ O bwara kpeɡri taeh, o dɛɛhne ɡel o dɔ bokpeɡa!

¹⁷ O din pao kɛŋɔ peleme daa ken, o nakpadɛɛhne do kpeɡri.

¹⁸ O hoɡa kpeɡri kɛŋɔ ayaawa, o nakpale do kɛŋɔ bune ken.

¹⁹ Korowii kontaala bwa bini, onee tɔ sie. Korowii waa tao la ɡboo dɛ́ won bɛno.

²⁰ Kpɔɡa le deŋɡarere ta o dɔa dɛɛ chwe, asɛ kpɔɡ bini olchɔɡa bwa ɛɛ hɛlɛ o jwɛh.

²¹ O chɔ sɔɔhne bini, o sɔh kataŋa bini kpɔɡa tɔ o nɛ.

²² Sɔɔhne la tɔ o nɛ, asɛ daa aa cheɡɛ nee nyoa baro cheme.

²³ Hale Jɔɔdan Moo suu ba tɔ o nɛɛ kwaraa naa, waa ɔmɛ.

²⁴ Umee dɛ́ won bɛɛlo dɛ́ dɔɔ lawɔ ɔ? Umee dɛ won lawɔ bel ne dɛ́ do ŋwɛn o mee ta nɔ?”