Job Tɔn 4 - mzwDBL

Job dam Elifas

¹ Belaa Teman te Elifas ŋɔ Job be ŋɔ,

² “Dɛ n bol waa baɡle naa, hɛɛ no n bee yaa? Maa won tɔ nyoa ɡɛ kpa.

³ He chaɡle nɛra ɡalɡa wa, dɛ cha banɔ la baa ɡwɛɡra ɡe ba dɔ bokpeɡa.

⁴ He wobol cha nɛra baa nyoɡre Korowii ŋwɛnɛ, dɛ ɡel ba won che ja.

⁵ He ɡe kwaa bala fini, dɛ kpɔ bambichɔɡa ba ta he nɛɛ la.

⁶ He tomɛ Korowii, wechɔɡa bɛlbwa aa wola toole he nɛ, a chɛ kɛ hɛɛ yarada dɛ dɔ hwɛɡa.

⁷ Nyiŋi waa nɔ, umee wola wechɔɡa ɛɛ dɛ sewɛ bwa nɔ? Nɛn o wa aa toɡra ɡe dɛ dɔ wekpeɡa aa?

⁸ N ɡbabir nao kɛŋɔ nɛra baa dɛ vɔrɔwe wechɔɡa vɔrɔwa, ne banɔ la baa dɛ nyin waa la, anee baa dɔ.

⁹ Korowii bandia do kɛŋɔ dompeu, o hwee ta ba nɛɛ ba serewe.

¹⁰ Nyubinikpeɡ tena do kɛŋɔ nyujentena aa dɛ si, kɛ Korowii sɔɔh a nyoa dɛ kuuɡi a nyena.

¹¹ Nyujente ta ol dɔe lawɛ di aa, o dɛ sewɛ, ásɛ o bii bwa ɡe lɔ peɡre.

¹² Nomɛl sɔɔh ba lɔɡ mɛ waane tamaa ken, aa do ɡɛ la, n ta wone no a bini kɛrɛdɛ.

¹³ A do kɛŋɔ jwaanen deechɔɡa ken, a chɔɡ n dom,

¹⁴ ɔmee ne bochela laɡ mɛ, n bwara bwa ɛɛ sa.

¹⁵ Komɛl ɡale n sie ta, asɛ n bwara ɛɛ mɛ nyirr.

¹⁶ Kon la cheɡɔ, kɛ n ta wone jemɛ o konsoo. N na o dor o che n sie, asɛ n no taa bɛl o ŋɔ,

¹⁷ ‘Nɛwɛnyini waa ɛɛ won toɡre ɡwaa Korowii aa? Nɛn ɛɛ won do ɡoroŋ ɡwaa Korowii waa tao wa aa?

¹⁸ Dɛ Korowii ta hwɛɡa dɔe o nyundua toroma nɛ, hale o na wechɔɡa ba nɛ aa,

¹⁹ he dɛ lii kɛŋɔ wɛɛ dɔ hwɛɡa nɛn waa kpɔ teera mao nɛɛ ya? Wɛɛ won sewɛ warane kɛŋɔ baa dɛ kpo konɡaahle la!

²⁰ Hɛɛ nao chɔɔ kɛ jɔmɔra ne tela dɛ o sewɔ dɛ he ta ɡɛ liire.

²¹ Baa pa o kondɔɔh bwaa kaa, o sewɛ dɛ o ta wejema bɛlbwa dɔe le Korowii be.’ ”