Job Tɔn 39 - mzwDBL

¹ Korowii berɔ ŋɔ, “He jemɛ saŋ bwea dor boohna aa dɛ lolɛ a bii aa? He siwi nao kweɡla lolɛ o bie ka aa?

² Hɛɛ won kure korobie aa kpoŋe a teene aa? Hɛɛ won jemɛ saŋ aa dɛ loɡle aa?

³ He jemɛ saŋ loltea aa lɔa aa loɡle a bii aa?

⁴ Kpɔɡ binii a bii yon do dɛ́ kpeɡ, a bwara do kpeɡri dɛ kaa, aa berɛ ba a be kpa.

⁵ Keeɡo waa kpaŋa la, umee ɡela o dɔ o te nɔ? Umee pur ŋwɛɛra baa kpɔa vɔrɔwo wɔ?

⁶ Pua hɛŋle ɡbo harɛ taa n kpɔ tɛo o so, bela kpɔɡa aa wola won kpeɡ.

⁷ Waa ɡbɔɡa aa dɛ le bwɛjena ta nyin, nomɛlbwa aa won dɛɛro dɛ́ kpɔɔ dɛɛ ɛ toma.

⁸ Bwea doree o do dɛɛ ɡaaɡe, dɛɛ nyin kpɔɡlwɛɛ bɛlbwa waa lea dɛ́ chwe.

⁹ Kpɔɡ bini nao ɛɛ sɛoh ɛ toma tɛɛ naa? Wɛɛ sɛoh chɔ he kondɛɛra kondikondibɔr jwaana aa?

¹⁰ Hɛɛ won lawɛ o par ŋwɛn kpoŋe ó ɛ toma aa? Wɛɛ won parɛ he harɛ tɛɛ naa?

¹¹ O bokpeɡa kohona nomanta, hɛɛ kpɔ he tenee dawɛ o nɛ aa? Hɛɛ ɡel he tomkpeɡaa ta o nɛ aa?

¹² He dɛ yarada kɛ o kpɔ he mea ba, dɛ ba boa a nyoa a lɔ bɔr aa?

¹³ Taataa dɛ lɔ a kena silɛɛ ne, kɛ a ta do kɛŋɔ chaŋɡal kwa,

¹⁴ harɛɛ taataa yon hwe hala bil, dɛ́ ɡela a chɔ bomboɡ ta wɔrɔbe.

¹⁵ Waa jemɛ kɛŋɔ a ken ɛɛ won paɡre, kɛɛ kpɔɡ bini ol bɛl ɛɛ won ba tiɡri a ta.

¹⁶ O nyu bini kpeɡri o bii nɛ, á do kɛ o bii laa ken, o waane laa kɛŋɔ o koeh waa koah la ɛ pɛɛ.

¹⁷ Men Korowii ta ɡelɛ o jemɛ wa, kɛɛ dɛ tɛo waa mun noe bɛlbwa.

¹⁸ Kɛ dɛ o paɡri kena dɛɛ ba chwae yaa, o dɛ mamɛ jaaɡɔ waa won chwae kohona ne nɛn waa soɡe o ta.

¹⁹ Job, henee ɡela jaaɡɔ bwara do kpeɡri dɛ tɛo pona a bɔle o baŋa ta naa?

²⁰ He ɡelɔ o won jaeh kɛŋɔ hɔɔhre dɛɛ aah nɛra hweera kohona ne naa?

²¹ O nafikoko kwii harɛ dɛɛ ta, bokpeɡa nee wɛɛ chwa silɛɛ ne kaa jo laa ta.

²² Waa ɔmee kpɔe dɛɛ ɛ wobɛlbwa, waa tokobii na dɛ́ le habɔɔ.

²³ Dɔmkwaa nɛn waa soɡe o ta aa kpoŋa la dɛ si, dɛɛ nyɛɡle pelɔpelɔ ken.

²⁴ Jaaɡɔ la kpɔ sibeɡra chwa dɛɛ kaa, o no bɛla sii yaa, waa won bobeŋkpoŋ che.

²⁵ Ba hoh bɛla aa, dɛ o sio. O won laa ɡbɔɡa noe dɛ le bojaŋ, laa nomonome nyɛɡa baa dɛ nyɛɡ ne lɔŋɔre baa dɛ do laa ta.

²⁶ Henee baɡle kɔla wɛɛ ir, dɛ́ paɡri kena kaa weekaŋle harɛbɔr aa?

²⁷ He bee kee ɛɛ hweli o kɔr sɔeh nyundua aa?

²⁸ Bwejaŋa baahnee wɛɛ so jwaana, belaa o so o bwara ɛɛ sɔɔhno.

²⁹ Nyundua belaa o do, dɛɛ nyin ola dɛ lawɛ, o siwi dɛ naa dɛ le bojaŋ.

³⁰ Ol lwɛɛ chalee ɛ o bii kondikwa, bela nɛra aa serewa chɔ laanee baa nao.”