Job Tɔn 38 - mzwDBL

Korowii chaŋe Job

¹ Korowii chaŋe Job le peujen la bini ŋɔ,

² “Umee hen hɛɛ tɔŋle n waa wobol aa wola mun dɔe ne nɔɔ?

³ Ir dɛ́ ba che n sie, ń bɔɔre wa, ásɛ he chaŋ mɛ.

⁴ Maa ta harɛ dɛ ɡel o ba che o chebɔr, dɛ leperaa he doɔ? He jemaa, he baɡ mɛ.

⁵ Umee maɡɛ o paɡri ne o jaŋne ɔ? Umee tɛr ŋwɛn dɛ maɡɔ wɔ? He jemaa?

⁶ Bɔkwa kwaa taa harɛ chɔŋɛ a lawɔ kpoŋe, kɛɛ umee pa o mun ɔ?

⁷ Awola chɔmbibii la weweela ɡo yela kɛŋɔ nɛra ken, nyundua toroma ɡe sie lɛ dɛɛ dooɡe lɔŋɔre.

⁸ Men Korowiirii ɡela mpo nyoa boa chɔ bobeŋkpoŋ, ɡɛ saŋ maa ɡela nee le o vile ta, kɛ baa lolɛ bie,

⁹ dɛ kpɔ baama tɔ o ta, dɛ kpɔ biro tenten fɔrɔwo,

¹⁰ dɛ pe bela waa baa jaɡɛ, dɛ kpɔ kwaa tɔ o nyoa kɛŋɔ ɡbera,

¹¹ dɛ ŋɔ, ‘Bonɔɔ hɛɛ ba wona ba jaɡɛ, haa ɡarɛ! He nehɛma aa kpeɡa la nyoa ɡe jaɡɛ bonɔ.’

¹² Job, le saŋ baa lolɛ, he wono ɡel jwaana berɛ webaŋa aa?

¹³ He wono ɡel bɔr chaah harɛ bwa ta, asɛ wechɔɡ-ɛɛra na dɛ chwa le ba sɔɔhbɔra kaa la aa?

¹⁴ Bɔr chaahnaa, a ɡelɔ baa na deŋɡarere ne nenabɔjena, a do kɛŋɔ baa kpɛrɛwe yal, kɛɛ baa di ɡwine vii ta ken.

¹⁵ Wechɔɡ-ɛɛra aa bɔchaah ta nyin, aa ɡelɛ ba dɔ bɔr dɛɛ di ba dichɔɡa.

¹⁶ Job, he wono valɛ mpo vile bini ka aa? He wono valɛ mpo bɔluŋ tenten bini naa?

¹⁷ Nomɛl baɡle bela baa kpɔa dɛɛ jo lalabwɛɛ waa ɛ biro la ta kaa?

¹⁸ He jemɛ ɡɛ harɛ nɔ aa kana aa? He jemɛ anɔ bwa naa, he chaŋ mɛ.

¹⁹ He jemɛ bela bɔr chaahna aa lea ba naa? Leperaa biro doɔ?

²⁰ Hɛɛ won kpɔa kaa bela aa lea aa? He wono jemɛ bela a fa aa lole naa?

²¹ He jemɔ, dɛkalkɛ baa lolɛ biɡro! Gɛ saŋ maa ta harɛ nɔ la dɛ he lole.

²² He jemɛ bela maa ɡela mɛn ne dombwea do aa?

²³ N lea cheɡ tɛ wenaale ne laa yoi tɔpera.

²⁴ Hɛɛ won jemɛ bela bɔr chaahna aa lea dɛɛ ba, kɛɛ bela wee leebɔr peu aa taa le dɛɛ kaa la aa?

²⁵ Umee baɡle bwaala luɡri o che a ta dɛɛ ba, ne bwaala kɔra ŋwɛnɛre ɔ?

²⁶ Umee ɡela bwaala ɛɛ nɛ pua hɛŋle ɡbo harɛ ta, harɛ nomɛlbwa aa wola o ta soɡe,

²⁷ dɛ ɡel o do wer, kpɔɡa won le o ta nɔ?

²⁸ Bwaala do kɛ nɛn dɛ dɔ mɛɛ aa? Nomɛlee lolɛ mɛn aa dɛ le ɡe aa?

²⁹ Umee lolɛ dombwea ɔ? Umee lolɛ mɛn aa le nyundua ɡeɔ?

³⁰ Gɛ kwaa nɔ yon sɔɔh dɛ hel, dɛ tɔ neerare ne mpo sie.

³¹ Hɛɛ won ta weweela aa wera bwa soo siwi pɛ, kɛɛ dɛ pere ane bini, bɛlbwa ka che a che bɔr aa?

³² Hɛɛ won baɡle saŋ weweela bɛlbwa aa le, kɛɛ dɛ ɡel Baŋɡaahna le dɛ tɔ o bii nɛ aa?

³³ He jemɛ Mmarare aa dɛ baɡle weweela aa lɔ nyundua dɛɛ chaah wa aa? Hɛɛ won jemɛ ɡɛ tenten tɛ kwaa aa lɔ harɛ ta ɡe aa?

³⁴ Hɛɛ won do baama ŋɔ á kpɔ nee ba bɔle he nɛɛ kɛŋɔ nee yon su la aa?

³⁵ Hɛɛ won do bwaala ó nyɛɡle dɛ ba ŋɔ, ‘Ya dɔɔree hen naa?’

³⁶ Umee kpɔ wejema do nɛn liire bini, kɛɛ nɛn ɛɛ no waa mun ɔ?

³⁷ Umee dɔ wejema kohona dɛ́ won kure baama ɔ? Umee ɡela aa nɛ bwaala ɔ?

³⁸ Umee ɡela bwaala yon nɛ kohona, ásɛ harɛ bwa lamɛ nɔɔ?

³⁹ Hɛɛ won tɛ nyujentena kondikwa, ásɛ a bii lɔr aa dɛ kpoa won vaɡɛ,

⁴⁰ ɡɛ saŋ aa sɔh a bɔɔne bini, kɛɛ dɛ chɔ dɛɛ kpa, dɛɛ nyin ola dɛ́ lawɛ di la aa?

⁴¹ Umee tɛ ɡaahɡaah bii kondikwa aa di dɛ a wio dɛɛ no Korowii, dɛ ɡaaɡe dɛɛ nyin kondikwa dɛ diɔ?”