Job Tɔn 37 - mzwDBL

Elihu wobol nuetena

¹ Elihu berɔ ŋɔ, “N bambile dɛ lɔ bwaala kɔra la wa, o dɛ lɔ warawara ken.

² Hé bwa no Korowii taa waa do kɛ bwaala aa dɛ kɔr, kɔɡra aa dɛ le o nyoa.

³ O ɡelɔ bwaala ɛɛ nyɛɡle nyundua bobɛlbwa, o nyɛɡla dɛ tel harɛ jaɡa bwa.

⁴ A habɔɔ, ba no o nyɛɡa waa do kɛ bwaala aa nyɛɡla la, o nyɛɡa la kan kɛ bwaala aa kɔra. O baa nyɛɡ kohona naa, dɛ komɛlbwa chɔ baŋ.

⁵ Korowii bol wa aa, ba dɛ na o nyokpowa, a ɛ wejena nɛn aa wola a mun no.

⁶ O ŋɔ dombwea lee harɛ ta, dɛ ŋɔ bwaalajena nɛ harɛ ta.

⁷ O ɡelɔ nomɛlbwa toma ba a jaɡa, asɛ nɛwɛnyina waa ta ba bwa jemɛ o toma wa.

⁸ Kpɔɡ bini ola kaalɔ, ka chɔ a bɔɔne bini.

⁹ Peujen tao le weekaŋle harɛbɔr, asɛ waa kohona le weekaŋle nyunduabɔr.

¹⁰ Korowii hweero asɛ neerare sɔɔh, a sɔɔhnɔ kohona dɛ hel.

¹¹ Korowii kpɔ nee do baama bini, dɛ ɡel bwaala nyɛɡle do a bini bwa.

¹² Bela waa dɛ nyinii o ɡel baama baa kaa harɛ nɔ ta bwa, dɛɛ ɛ ɡɛ bwa waa dɛ nyin.

¹³ O won baama kpɔe ba tɛr nɛra deŋne, kɛɛ dɛ́ ba sɔɔh harɛ, dɛ́ baɡle o nyina.

¹⁴ Job, dɛɛ no waa nɔ, tɔ nyoa dɛ nyiŋi Korowii nyokpowaa waa ɛ.

¹⁵ He jemɛ ɡɛ aa ɛa Korowii ɡel bwaala nyɛɡle dɛɛ le baama bini naa?

¹⁶ He jemɛ ɡɛ aa ɛa baama saɡɛ nyundua, ne ɡɛ Korowii nyokpowe-ɛɛla aa doa aa?

¹⁷ Bɔwɔb dɛ kpoe he yal bini, ɡɛ saŋ peuchɔɡe waa le weekaŋle harɛbɔr, aa ba ta harɛ la ta dɛ́ chɔɡo la.

¹⁸ Hɛɛ won ja Korowii nɛɛ dɛ́ paɡri nyundua, waa do kpeɡri kɛ ayaawa aa dɛ nyɛɡle kɛ diɡi aa?

¹⁹ Baɡle yaa waa yaa bol Korowii be dɛ́ chaŋo, ya liire damɔ nomanta, ya ta wobɛlbwa dɔe.

²⁰ Nomɛl ɛɛ won ka bol o be ŋɔ n dɛ nyin ń bol wa aa? A chɛ kɛ n tɛo ŋwɛnɛ ó chɔɡ mɛ naa?

²¹ Peu tao dɛ laa baama kpɔ nyundua aa, wee dɛ chaah kohona, nomɛlbwa aa won nyiŋi nyundua.

²² Korowii jirima le weekaŋle nyunduabɔr dɛɛ ba kɛ suuɡaswɛm, ya na o jirima waa kana la dɛɛ ɔmɛ.

²³ Korowii Waa ɛ Kpeɡri Bwa Dɔɔ kan, yaa won bɛno, o waa toɡrɔ dɛ do wer, waa nɛn fiiɡi.

²⁴ Nɛra dɛ duuru a wa, nɛra baa dɛ lii kɛ ba jemɛ wa, kɛ dɛ ɡɛn la, waa ban nyin.”